Read Ngaju 2 SAMUEL 22 Bible Online

2 SAMUEL 22 - Ngaju bible

2 SAMUEL 22

¹Limbah TUHAN manyalamat Dawid bara Saul tuntang bara kakare musoh je beken, Dawid manyanyi auh nyanyi toh akan TUHAN: [

²Aku sinta dengam, o TUHAN, Ikau wei kaabasku.]

³TUHAN sama kilau dinding batu je dehen ekaku bakalindong. Hatallangku sama kilau bukit batu, ekaku bakanjungen Sama kilau talawang Ie mangalukop aku. tuntang manjaga aku mangat harajur sanang.

⁴Aku mantehau TUHAN je patut inara, Ie mambebas aku bara kare musohku.

⁵Aku ingaliling bahaya pampatei, tuntang impaleteng sohon danum kabinasa.

⁶Aku inggaliling bahaya pampatei, jarat pampatei aton intu taharepku.

⁷Hong kajakengku aku mantehau TUHAN, aku mangkariak akan Hatallangku balaku awat. Bara Human Aie Ie mahining auhku tuntang manyeneh auh tehauku.

⁸Palus petak hongge tuntang hagenjeh kare galang bukit hongge tuntang hagenjeh awi kasangit Hatalla.

⁹Asep manampurus bara rumbak urong Aie, apui tuntang barah apui balua bara nyaman Aie.

¹⁰Langit inyila Awie, palus Ie mohon dengan baunandau kaput penda pain Aie.

¹¹Ie tarawang manungkang kerub; Ie manari hunjun palapas riwut.

¹²Ie manyandurong Arep hapan kakaput, baunandau derem[55] je bakapal mangaliling Ie.

¹³Bara kilat intu taharep baun Ayue, balua baunandau, ujan es tuntang apui.

¹⁴Palus TUHAN mangaruntong bara langit; Je Pangkahai mampalua auh Aie.

¹⁵Ie malekas kare panah Aie tuntang mamisah darai musoh; Ie mawi kilat sir-sar, tuntang mawi ewen hadari.

¹⁶Palempang tasik babala tuntang galang petak buap katika TUHAN malait musoh Aie dengan kasangit.

¹⁷Bara hunjun TUHAN muloh lengen Aie; Ie mimbing aku tuntang injijit Awie bara huang danum je handalem.

¹⁸Ie manyalamat aku bara musoh je gagah tuntang bara kare oloh je basingi aku, awi ewen pahalau abas akangku.

¹⁹Ewen manyarang aku katika aku buah calaka, tapi TUHAN jadi pandohopku.

²⁰Ie malapas aku bara bahaya tuntang manyalamat aku awi Ie mangilak aku.

²¹TUHAN mambaleh gawingku je bujur; ie mamberkat aku awi aku jaton bara kasalan.

²²Aku manumon parentah TUHAN tuntang dia mules bara Hatallangku.

²³Uras hukum Ayue inantuaniku, kare parentah Aie dia ilihiku.

²⁴Ie katawan je aku jaton bara kasalan tuntang mangejau arep bara kasalan.

²⁵Palus TUHAN mambaleh gawingku je bujur awi Ie katawan aku jaton bara kasalan.

²⁶TUHAN ikau baketep dengan oloh je baketep tuntang bahalap dengan oloh[56] je bahalap.

²⁷Akan oloh je barasih Ikau mamparahan arep Aim barasih, tapi oloh papa imusoh Awim.

²⁸Oloh je randah atei inyalamat Awim, tapi oloh je bajoho imparandah Awim.

²⁹Ikau manotong sumbo akangku; TUHAN, Hatallangku mampalawa kakaputku.

³⁰Ikau mampaabas aku akan mampalomos musoh; dengan pandohop Hatallangku inelakku pertahanan ewen.

³¹Gawin Hatalla tinduh janjin TUHAN tau imercaya. Ie sama kilau talawang akan uras oloh je bakalindong intu Ie.

³²Awi baya TUHAN bewei Hatalla; Hatalla bewei pambela itah.

³³Ie wei Hatalla je mampaabas aku tuntang mawi[57] jalangku sanang.

³⁴ Ie mampaabas paingku sama kilau pain bajang, tuntang manjaga kasalamatku intu kare bukit gantong.

³⁵Ie malatih aku akan baparang, sampai aku tau mangancang panah je paling batekang.

³⁶TUHAN, Ikau mangalindong tuntang manyalamat aku, tuntang manyukah aku hapan kuasan Aim; aku manang awi gawin Aim.

³⁷Ikau manjaga aku uka aku dia inawan, tuntang aku dia puji balongkang.

³⁸Aku manggoang musohku tuntang aku mampakalah ewen, tuntang dia undur sampai ewen binasa.

³⁹Aku mahampas ewen sampai dia tau harikas tinai, ewen halelek intu lawin paingku.

⁴⁰Ikau manenga akangku kaabas akan baparang, tuntang kamanang bara kare musohku.

⁴¹Ikau mawi musohku hadari bara aku; kare oloh je basingi aku imbinasaku.

⁴²Ewen mangkariak tapi jaton je mawat, ewen mantehau TUHAN tapi Ie jaton tombah.

⁴³Ewen imparotekku sama kilau kawo je bahambur. tuntang imapasku sama kilau petak kisak hong jalan.

⁴⁴Ikau mambebas aku bara jalahan oloh je darhaka, tuntang mawi aku panguasa kare bangsa; bangsa je dia aku kasenee jadi rewarku.

⁴⁵Kare oloh bangsa beken mamenda aku tuntang manumon amon mahining parentahku.

⁴⁶Kahanyin ewen jari nihau; ewen hagenjeh tuntang balua[58] bara kotae.

⁴⁷TUHAN belom! Tara akan pambela ayungku! Keleh mampahai kahain Hatalla panyalamatku!

⁴⁸Ie manenga akangku kamanang bara musohku kare bangsa impakalah intu taharepku,

⁴⁹Ie manyalamat aku bara kare musohku. TUHAN, Ikau manenga akangku kamanang bara musohku, Ikau mangalindong aku bara kare oloh je tulas.

⁵⁰ Awi te impahaiku Ikau marak kare bangsa, tuntang inyanyiku kare tara Akam.

⁵¹Hatalla manenga kamanang hai akan raja je iangkat Awie, Ie tetep sinta oloh paintih Aie, iete Dawid tuntang turonae sampai katatahie.