Read Ngaju 2 SAMUEL 24 Bible Online

2 SAMUEL 24 - Ngaju bible

2 SAMUEL 24

¹TUHAN sangit tinai dengan Israel, palus Dawid ingataue dengan maksud mawi kajake akan bangsa te. Koan TUHAN dengae, “Awi sensus hong Israel tuntang Yuda.”

²Palus Dawid hamauh dengan Yoab pangkalima tentarae “Lius hayak kare pangkalimam akan hapus bangsa Israel intu hapus lewu uka mawi sensus. Aku handak katawan jumlah ewen.”

³Tapi Yoab hamauh dengan raja, “Keleh TUHAN Hatallan raja mandahang jumlah rayat Israel sampai saratus lipet bara samandiai ewen toh. Keleh raja magon belom mangat sampet mitee. Tapi kanduen raja mangahandak sensus toh?”

⁴Tapi raja tetep mimbing parentah te. Palus Yoab tuntang kare pangkalima haguet uka mise jumlah bitin bangsa Isarel.

⁵Limbah dimpah Sungei Yordan, Yoab tuntang oloh ayue mampendeng kemah intu hila salatan Aroër, ije lewu intu bentok janah intu tanah Gad.[65] Bara hete ewen haguet akan utara, akan Yaeser,

⁶palus akan Gilead tuntang akan Kades intu tanah oloh Het.[66] Limbah te ewen akan Dan, tuntang bara Dan mambelok akan[67] hila Barat, akan Sidon.

⁷Bara hete ewen haguet akan hila salatan akan Tirus lewu je badinding batu te. Limbah te ewen haguet akan uras lewun oloh Hewi tuntang oloh Kanaan, tuntang kajariae akan Berseba intu hila Salatan Yuda.

⁸Ewen mangombang hapus lewu katahin jalatien bulan tuntang due puluh andau. Limbah te ewen haluli akan Yerusalem.

⁹Tuntang malapor akan raja hasil sensus te. Jumlah oloh hatue je tau inarima akan dinas tantara aton 800.000 biti intu Israel tuntang 500.000 biti hong Yuda.

¹⁰Tapi limbah Dawid hapus mise jumlah bangsa te, ie mangkeme basala, palus hamauh dengan TUHAN, “O TUHAN aku paham badosa! Keleh mampun aku, awi gawingku te paham humong.”

¹¹TUHAN hamauh dengan Nabi Gad je jadi oloh helat akan Dawid dengan TUHAN, “Lius sanan akan Dawid je Aku manenga telo paintih akae. En bewei je iintihe kareh ilalus-Ku.” Andau jewue, limbah Dawid misik batiroh,

¹³Gad dumah mangat manaharep tuntang mansanan akae parentah TUHAN te koae, “Kueh je iintih raja: Lewu toh buah lau katahin telo[68] nyelo, atawa raja hadari inggoang musoh katahin telo bulan, atawa lewu toh inyarang peres panyakit katahin telo andau? Mutus metoh toh en je musti inyampaiku akan TUHAN.”

¹⁴Dawid tombah, “Kayah! Calaka aku! Tapi bara aku ihukum awi olon, labih bahalap itah uras ihukum awi TUHAN, awi hai kasayange.”

¹⁵Palus TUHAN mampalembut wabah panyakit akan oloh Israel nampara bara hanjewu te sampai katika je jari inukas Awie. Intu hapus Israel 70.000 biti matei.

¹⁶Malekat TUHAN je mimbit pampatei te jari sampai akan eka mihik gandom ayun Arauna, oloh Yebus. Metoh TUHAN mite je malekat te jari tatap akan mambinasa Yerusalem, TUHAN mobah putusae, tuntang ie tende mahukum bangsa te. Koae dengan malekat te, “Sukup! Tende!”

¹⁷Dawid mite malekat je kanjerae mampatei rayat te, palus ie hamauh dengan TUHAN, “Aku toh je badosa awi aku je mawi kasalan. Tapi en kasalan bangsa je asi-asi toh? Keleh mahukum aku tuntang keluargaku!”

¹⁸Hong andau te kea Gad dumah manaharep Dawid tuntang hamauh dengae, “Keleh raja mandai akan eka mihik gandom ayun Arauna, tuntang mampendeng mesbeh akan TUHAN.”

¹⁹Palus Dawid haguet tumon parentah TUHAN je inyampai akae mahalau Gad.

²⁰Tabarong Arauna metoh manjengok akan penda, tuntang gitae raja dengan kare pangiringe dumah manalih ie. Arauna sontop intu taharep raja Dawid,

²¹tuntang misek “Narai maksud panumah raja?” Tombah Dawid, “Handak mamili eka mihik gandom toh. Aku handak mampendeng mesbeh akan TUHAN intu hetoh, mangat peres panyakit toh tende.”

²²Koan Arauna, “Duan ih raja, tuntang tenga akan TUHAN taloh je ingkeme raja bahalap. Toh kare sapi akan parapah je ingehu tuntang akan pandok kayue raja tau mahapan tantahan luku tuntang kare papan eka mihik.”

²³Arauna manenga urase te akan raja,[69] sambil hamauh, “Keleh TUHAN, Hatallan Tuan Raja manarima parapah Tuan Raja.”

²⁴Tapi raja tombah, “Ela! Aku handak mamilie. Aku dia maku manenga akan TUHAN, Hatallangku taloh je dinongku inenga bewei.” Palus Dawid mamili eka mihik gandom tuntang kare sapi te dengan rega lime puluh duit perak.

²⁵Palus Dawid mampendeng mesbeh intu hete akan TUHAN tuntang maluput parapah je ingehu tuntang parapah hapa badamai. TUHAN mahining lakudoan Dawid, palus peres te terai intu Israel.