Read Ngaju 2 SAMUEL 3 Bible Online

2 SAMUEL 3 - Ngaju bible

2 SAMUEL 3

¹Parang kalahi ain oloh je mandohop keluarga Saul malawan oloh je mandohop Dawid tarus manjadi. Dawid sasar abas, tapi musohe sasar balemo.

²Kare anak jarian Dawid je inakan intu Hebron iete jetoh manumon gilire inakan: Amnon. Indue iete Ahinoam bara Yisreel.

³Kileab. Indue iete Abigail, balon Nabal bara Karmel. Absalom. Indue iete Maakha, anak Raja Talmai bara Gesur.

⁴Adonia. Indue iete Hagit. Sepaca. Indue iete Abital.

⁵Yitram. Indue iete Egla. Jahawen anak te inakan intu Hebron.

⁶Metoh parang tarus manjadi marak kare oloh je mandohop Dawid dengan oloh je mandohop keluarga Saul, Abner manggau jalan mangat pangaruhe sasar hai marak kare oloh hong pihak Saul.

⁷Sinde andau Isboset, anak Saul, mandawa Abner hinje dengan ije bara gundik Saul je arae Rispa anak Aya.

⁸Palus Abner rahas toto tuntang hamauh, “En Tuangku mangira aku toh mahianat Saul tuntang mamihak dengan Yuda? Bara solake aku baketep dengan Saul bapa Tuan, tuntang dengan tundah paharie tuntang kare sobate. Aku jari mandohop Tuangku sampai dia olih impakalah awi Dawid. Aloh kalote Tuangku manawah aku baya awi soal oloh bawi!

⁹ Labih bahalap aku mandohop Dawid, mahin tinai TUHAN jari bajanji dengae kareh manduan kerajaan toh bara Saul tuntang bara turonae, palus mangkat Dawid jadi raja intu hapus Israel tuntang Yuda. Keleh Hatalla mampatei aku amon aku dia malalus janjin Hatalla dengan Dawid te!”

¹¹Isboset dia tombah aloh ije kabawak kotak, awi ie dia mikeh dengan Abner.

¹²Palus Abner mangirim sarohan akan Dawid je intu katika te aton intu Hebron,[4] dengan mimbit peteh, “Eweh je kareh manguasa tanah toh? Tampa janji dengangku, kareh aku mandohop Tuangku mangat hapus bangsa Israel mamihak Tuangku!”

¹³Dawid tombah, “Tau! Keleh nyampai petehku akan Abner: Aku nahuang mawi janji dengam, tapi dengan ije sarat: Mikhal anak Saul musti imbitm akangku amon ikau dumah manaharep aku.”

¹⁴ Limbah te Dawid kea mangirim sarohan akan Isboset, dengan mimbit peteh, “Keleh Tuan malian Mikhal sawangku akangku. Ie jari imiliku dengan saratus upak kulop oloh Pilistin.”

¹⁵Palus Isboset manyoho sarohae manduan Mikhal bara banae iete Paltiel anak Lais.

¹⁶Tapi Paltiel palus manuntut Mikhal sambil manangis. Metoh ewen sampai intu lewu Bahurim, Abner hamauh dengae, “Terai, buli ih!” Palus Paltiel buli.

¹⁷Abner hatahiu dengan kare oloh bakas Israel tuntang hamauh, “Jadi tahi keton nahuang Dawid jadi rajan keton.

¹⁸Ingat, TUHAN jari bajanji dengan Dawid, je ie kareh mahapan Dawid indu manyalamat ungkup Ayue Israel bara oloh Pilistin tuntang bara uras kare musohe je beken.”

¹⁹Abner kea hatahiu dengan kare oloh Benyamin, tuntang limbah te ie kea haguet akan Hebron uka mansanan akan Dawid taloh je jari imakat awi oloh Benyamin tuntang Israel te.

²⁰Metoh Abner hayak dengan due puluh biti oloh ayue manaharep intu Hebron, Dawid mawi pesta akan ewen.

²¹Limbah te Abner hamauh, “Soho aku haguet uka manggerek hapus Israel mangat bagabung dengan Tuangku. Ewen kareh manarima Tuangku kilau raja, tuntang tumon te Tuangku kareh marentah hapus petak danum, tumon kahandak Tuangku.” Limbah te Abner inyoho Dawid haguet tuntang ingalindong kasalamatae.

²²Limbah Abner haguet, Yoab hayak oloh ayun Dawid je beken haluli bara parang tuntang mimbit are kare ramo rampasan.

²³Akan Yoab insanan je Abner jari dumah manaharep raja Dawid tuntang jari inyoho haguet hayak ingalindong kasalamatae.

²⁴Palus Yoab manaharep raja tuntang hamauh, “Kilen gawin raja te? Abner jari dumah manaharep raja. Mbuhen raja manyoho ie haguet kalote bewei?

²⁵Pasti raja katawan je panumah Abner te baya akan manipu raja, tuntang akan mangatawan ampin taloh dengan kare rencana raja.”

²⁶Limbah malihi Dawid, Yoab mantehau kare sarohan uka mantehau Abner. Ewen manuntut Abner sampai tokep kalin danum Sira, palus imbit ewen haluli. Urase te manjadi luar pangatawan Dawid.

²⁷Sana Abner sampai intu Hebron, ie imbit awi Yoab akan balikat tokep lawang, kilau handak mamander taloh rahasia. Salenga Yoab manyodok kanain Abner sampai matei. Tumon te Abner impatei awi Yoab uka mambaleh kasingie tagal pampatei Asael andie.

²⁸Katika Dawid mahining taloh te, ie hamauh, “TUHAN katawan je aku tuntang rayatku dia basala hong gawi mampatei Abner te.

²⁹Keleh Yoab tuntang hapus keluargae ihukum awi gawie te. Keleh hong keluarga Yoab gilir-mangilir harajur aton je buah panyakit kulit je bakaike-ikeh, atawa oloh hatue je dia barakaabas, atawa je matei huang parang atawa je tapas panginan!”

³⁰Tumon te Yoab tuntang Abisai andie mambaleh kasingi ewen mawi Abner, awi Abner jari mampatei Asael andi ewen huang parang intu Gibeon.

³¹Limbah te Dawid marentah Yoab tuntang oloh ayue uka marabit pakaian ewen, tuntang mahapan tapih tatum hayak manatum Abner. Tuntang metoh magah hantu, Raja Dawid kabuat je mananjong intu likut patin hantu.

³²Abner ingubur intu Hebron, tuntang raja dengan hapus rayat manangis hai auhe intu hila baun kubur te.

³³Limbah te Dawid manatum akan Abner, koae, “En musti Abner matei kilau oloh humong:

³⁴lengee dia imasong, tuntang paie dia barantai? Ie matei buah sodok awi oloh je papa tuntang tulas.” Palus hapus rayat labih hai tinai manangis tagal Abner.

³⁵Hapus andau kare oloh manggau jalan mangantau Dawid mangat kuman isut, tapi ie basumpah, “Keleh Hatalla mampatei aku amon aku kuman helo bara matanandau belep!”

³⁶Mahining taloh te rayat mangkeme sanang. Puna, en bewei je ilalus Raja Dawid, mawi atei ewen sanang.

³⁷Hong andau te hapus rayat tuntang hapus bangsa Israel harati, je raja dia nahuang gawi mampatei Abner te.

³⁸Koan raja dengan kare pagawaie, “Tawan keton je andau toh ije biti pamimpin hai intu Israel jari matei?

³⁹Aloh aku toh raja je intih awi Hatalla, tapi metoh toh aku mangkeme balemo. Kare anak Seruya te pahalau tulas. Aku dia sanggup manguasa ewen. Keleh TUHAN mahukum kare oloh papa te, tumon kare gawin ewen!”