Read Ngaju 2 SAMUEL 4 Bible Online

2 SAMUEL 4 - Ngaju bible

2 SAMUEL 4

¹Metoh anak Saul Isboset mahining je Abner jari impatei intu Hebron, ie mikeh, tuntang hapus rayat Israel tarewen.

²Isboset aton due pangkalima ayue je jadi pamimpin pasukan panyarang; je ije arae Baana, je ije tinai arae Rekhab. Ewen anak Rimon bara Beerot hong suku Benyamin. (Beerot tame tanah Benyamin.

³Panduduk aslie jari hadari akan Gitaim tuntang melai intu hete bara katika te.)

⁴ Turonan Saul je beken iete Mepiboset, anak Yonatan. Ie umur lime nyelo metoh Saul tuntang Yonatan impatei. Metoh te kabar tahiu pampatei ewen dumah bara lewu Yisreel. Oloh bawi je mahaga ie manggatang ie tuntang mimbit ie hadari. Tapi ie paham kaje-kajeng sampai anak te manjato awie, tuntang anak te palus batimpang.

⁵Kadadue pangkalima te, iete Rekhab tuntang Baana haguet akan human Isboset je kanjerae malayan kahekae bentok andau.

⁶Oloh bawi panjaga huma mangantuk metoh marasih gandom, palus tapatiroh. Awi te Rekhab tuntang Baana tau sele-selek tame.[5]

⁷Ewen palus tame akan kamar batiroh eka Isboset kanjerae batiroh mangat, palus manyodok ie sampai matei. Ewen manetek takoloke tuntang mimbite haguet. Hapus alem ewen mananjong mahalau Janah Yordan.

⁸Limbah te ewen manyarah takolok Isboset akan Dawid intu Hebron sambil hamauh, “Jetoh takolok Isboset anak Saul, musoh raja je manggau jalan handak mampatei raja. Andau toh TUHAN jari mambaleh gawin Saul tuntang turonae akan raja.”

⁹Tapi Dawid tombah, “TUHAN je belom je jari manyalamat aku bara kare bahaya, katawan je insanangku toh toto.

¹⁰ Metoh intu Siklag aton oloh je mansanan akangku tahiu pampatei Saul, ingirae ie mimbit kabar bahalap. Tapi ie jari nyingkapku tuntang impateiku. Jete upah je inengaku akae kilau baleh akan barita je imbite te.

¹¹Paham labih babehat hindai hukum je kareh iawiku akan oloh papa je jari mampatei oloh je dia basala tuntang kanjerae batiroh intu humae kabuat. Toh aku manuntut baleh akan keton tagal pampatei te, hayak manganan keton bara hunjun petak!”

¹²Limbah te Dawid marentah oloh ayue mampatei Rekhab tuntang Baana. Limbah impatei, lenge tuntang pain ewen inetek tuntang ingkoak tokep talaga. Tapi takolok Isboset induan tuntang ingubur intu lewu te kea intu huang kubur Abner.