Read Ngaju 2 SAMUEL 5 Bible Online

2 SAMUEL 5 - Ngaju bible

2 SAMUEL 5

¹Limbah te hapus pamimpin kare suku Israel dumah manalih Dawid intu Hebron tuntang hamauh dengae, “Ikei toh kolan raja.

²Bara bihin, bara katika Saul haream metoh ie magon marentah ikei, raja kea je mamimpin tantara Israel genep tingkat ewen miar parang. Mahin tinai TUHAN jari hajanji dengan raja je raja te je kareh mamimpin ungkup Ayue tuntang jadi rajan ewen.”

³Dawid mawi janji dengan kare pamimpin Israel te, palus ewen malantik ie jadi raja Israel.

⁴ Umur Dawid telo puluh nyelo metoh ie jadi raja. Ie marentah epat puluh nyelo katahie.

⁵Intu Hebron ie marentah Yuda katahin uju satengah nyelo, tuntang intu Yerusalem ie marentah hapus Israel tuntang Yuda katahin telo puluh telo nyelo.

⁶ Sinde andau raja Dawid tuntang oloh ayue haguet handak manyarang Yerusalem. Oloh Yebus je oloh lewu te, mangira Dawid dia baka tau mampakalah Yerusalem. Awi te ewen hamauh dengae, “Ikau dia baka tau tame akan hetoh; kare oloh babute tuntang kare oloh batimpang mahin olih maharak ikau.” (

⁷Tapi Dawid mampakalah dinding batu ain ewen intu Sion, tuntang jete ingatawan kilau “Kota Dawid.”)

⁸Andau te Dawid hamauh dengan oloh ayue, “En aton intu hetoh oloh je basingi dengan oloh Yebus sama kilau aku basingi dengan ewen? Giri-giri handak mampatei ewen? Amon kalote, lius tame mahalau tarowong danum tuntang sarang kare oloh batimpang tuntang oloh babute je inyingiku te.” (Jete bukue oloh hamauh, “Oloh babute tuntang oloh batimpang dia tau tame Human TUHAN.”)[6]

⁹Limbah marabut kota Sion te, Dawid melai intu hete tuntang manampa arae “Kota Dawid.” Ie mamangun lewu hakalilinge, nampara bara hila timor bukit je impagantong hapan petak.

¹⁰Dawid sasar tahi sasar abas, awi TUHAN, Hatalla Je Jaton Tikas Kuasae mandohop ie.

¹¹Raja Hiram bara lewu Tirus mangirim kare duta ayue manalih Dawid, tinai kayu seder Libanon tuntang kare tukang kayu tuntang kare tukang batu akan hapa mampendeng Istana.

¹²Awi te Dawid percaya je TUHAN jari mandehen ie kilau raja Israel, tuntang mampaabas karajaae akan kapatut ungkup TUHAN.

¹³Limbah Dawid bindah bara Hebron akan Yerusalem, ie kawin tinai dengan pire-pire oloh bawi. Ie manduan pire-pire oloh bawi tinai jadi gundik; maka kare anake mandahang.

¹⁴Kare anake je inakan intu Yerusalem iete: Samua, Sobab, Natan, Salomo,

¹⁵Yibhar, Elisua, Nepeg, Yapia,

¹⁶Elisama, Elyada tuntang Elipelet.

¹⁷Metoh oloh Pilistin mahining je Dawid jari iangkat jadi raja Israel, ewen dumah handak manyingkap ie. Tapi Dawid mahining taloh te tuntang haguet akan kota.

¹⁸Oloh Pilistin sampai intu Janah Repaim tuntang manguasae.

¹⁹Dawid misek dengan TUHAN, “En musti aku manyarang oloh Pilistin te? En Ikau kareh manenga kamanang akangku?” “Sarang!” Tombah TUHAN. “Aku kareh manenga kamanang akam!”

²⁰Limbah te Dawid haguet akan Baal-Perasim tuntang intu hete pasukan Pilistin te impakalah awie. Palus ie hamauh, “TUHAN jari manelak pertahanan musohku, sama kilau danum soho manduroh taloh handiai hanjulo bewei.” Jete bukue eka te inyewut Baal-Perasim.[7]

²¹Pasukan Pilistin hadari dia sampet mimbit hampatong dewan ewen. Kare hampatong te induan awi Dawid tuntang oloh ayue.

²²Dia tahi limbah te oloh Pilistin dumah tinai manguasa Janah Repaim.

²³Sinde tinai Dawid balaku tanda bara TUHAN. TUHAN tombah, “Ela manyarang ewen bara hetoh, tapi tanjong mamutar tuntang sarang ewen bara likut, tokep kare upon baka.

²⁴Amon ikau mahining auh sama kilau badap oloh babaris intu kare tarok kayu te, keleh miar. Awi aku kareh mananjong intu hila baun uka mampakalah tantara Pilistin.”

²⁵Dawid malalus taloh je irentah TUHAN, ie bahasil mamukul mundur oloh Pilistin bara Geba sampai Geser.