Read Ngaju 2 SAMUEL 6 Bible Online

2 SAMUEL 6 - Ngaju bible

2 SAMUEL 6

¹Limbah te Dawid mantehau tinai kare tantara je pangkahalape bara Israel uka hapumpong, samandiaie 30.000 biti.

² Ewen imimpin manintu Baale-Yuda,[8] mangat manduan bara hete Patin Janji je inyewut dengan aran TUHAN Je Jaton Tikas Kuasae je mondok intu hunjun kare kerub.[9]

³ Patin Janji te induan bara human Abinadab intu hunjun bukit tuntang imuat akan huang garobak je taheta. Palus Usa tuntang Ahio, kare anak Abinadab mangagalan garobak te; Usa mananjong intu balikat,

⁴tuntang Ahio mananjong intu hila baue.

⁵Dawid tuntang bangsa Israel mananjong intu hila baun Pati te sambil manari sakalepah kagancange[10] tuntang manyanyi-nyanyi hapa mahormat TUHAN. Ewen main kacapi, gambus, tarabang, kangkanong tuntang gandang.

⁶Metoh ewen sampai eka mihik gandom ayun Nakhon, kare sapi je mihir garobak te tanggarurus, palus Usa manjuju lengee tuntang manyingkap Patin Janji te mangat ela manjato.

⁷Metoh te kea TUHAN, Hatalla rahas dengan Usa, awi gawi te kilau gawi mahina [11] TUHAN. Usa impatei Awie intu eka te, tokep Patin Janji.

⁸Palus bara katika te eka te inyewut Peres-Usa.[12] Dawid sangit awi TUHAN mampatei Usa.

⁹Tapi Dawid mikeh kea dengan TUHAN tuntang hamauh, “Toh kilen ampie aku mimbit Patin Janji te?”

¹⁰Awi te ie dia handak tinai mimbit Patin Janji te akan Yerusalem, malengkan mingkese intu human Obed-Edom oloh Gat.

¹¹ Patin Janji te melai intu hete telo bulan katahie, tuntang TUHAN mamberkat Obed-Edom dengan keluargae.

¹²Raja Dawid mahining je TUHAN mamberkat kaluarga Obed-Edom tuntang kare taloh koae awi Patin Janji te. Palus ie haguet akan human Obed-Edom, manduan Pati uka mindahe akan Yerusalem dengan pesta hai.

¹³Metoh kare oloh je manggatang Patin Janji te jari mananjong jahawen kaingkang, Dawid manyoho ewen tende. Palus ie maluput Parapah akan TUHAN, iete sapi hatue tuntang sapi je impaseput.

¹⁴Limbah te Dawid manari hapan sakalepah angat huange uka mahormat TUHAN. Metoh te ie baya mahapan tapih Lena pandak je imeteng intu kahange.

¹⁵Kalote wei Dawid tuntang hapus rayat Israel mindah Patin Janji te akan Yerusalem, impahayak lahap tuntang tarompet.

¹⁶Metoh Pati te magon imbit tame lewu te, Mikhal anak Saul manangkilik bara baun sengok palus mite raja Dawid kajo-kajok tuntang manari-nari uka mahormat TUHAN, tuntang Mikhal mangelut matae mite Dawid.

¹⁷Patin Janji te ina intu ekae huang kemah je jari ingkepan awi Dawid akan Pati te. Limbah te Dawid maluput parapah je imapui tuntang parapah hapa badamai akan TUHAN.

¹⁸Palus ie mamberkat rayat Israel hapan aran TUHAN Je Jaton Tikas Kuasae.

¹⁹ Limbah te imbagi-bagie panginan akan ewen handiai. Genep biti je aton intu hete aloh hatue aloh bawi inengae ije kahiris daging basehei,[13] rote tuntang wadai kismis. Limbah te uras ewen buli akan genep human ayu-ayue.

²⁰Metoh Dawid buli akan Istana handak manabe kare keluargae, Mikhal balua manyondau Dawid tuntang hamauh, “Andau toh raja Israel toto-toto mawi arepe ihormat! Ie jari halowai kilau oloh bureng je dia aton kahawee intu baun kare jipen bawi ayun kare pagawai Istana!”

²¹Dawid tombah, “Aku manari uka mahormat TUHAN, je jari manolak bapam tuntang keluargae, palus mintih aku jadi pamimpin Israel ungkup Ayue. Awi te aku kareh tetep manari uka mahormat TUHAN.

²²Aku basadia haream inawah labih bara endau. Tau ih ikau manawah aku,[14] tapi kare jipen je inyewutm endau, kareh mahormat aku!”

²³Mikhal, anak Saul te dia manak hapus umure.