Read Ngaju 2 SAMUEL 7 Bible Online

2 SAMUEL 7 - Ngaju bible

2 SAMUEL 7

¹TUHAN mangalindong raja Dawid bara kare kapehe awi musohe, sampai ie tau manetep intu huang istanae.

²Raja hamauh dengan nabi Natan, “Item aku toh melai intu istana je inampa bara kayu seder Libanon, padahal Patin Janjin Hatalla te baya ingkes intu huang kemah bewei!”

³Tombah Natan, “Lalus taloh je ingahandak raja, awi TUHAN mandohop raja.”

⁴Tapi hong alem te TUHAN hamauh dengan Natan,

⁵“Lius tuntang nyampai akan rewar-Ku Dawid peteh-Ku toh, ‘Lalehae ikau handak mampendeng huma akang-Ku.

⁶Bara katika bangsa Israel imbebas-Ku bara bangsa Misir sampai toh, hindai puji Aku melai intu huang huma, malengkan harajur manamuei tuntang melai huang ije kemah.

⁷Katahin Aku manamuei hayak bangsa Israel, hindai puji Aku misek kare pamimpin[15] je jari intih-Ku, en bukue ewen dia mampendeng huma bara kayu seder Libanon akang-Ku.’

⁸Tagal te, Natan, sanan akan rewar-Ku Dawid, je Aku, TUHAN Je Jaton Tikas Kuasae, hamauh dengae, ‘Ikau jari iduang-Ku bara gawim manyakatik tabiri intu padang tuntang iangkat-Ku jadi raja akan ungkup-Ku Israel.

⁹Aku jari mampahayak ikau akan kueh bewei ikau haguet; kea musohm jari impalomos-Ku metoh ikau parang kalahi. Ikau kareh iawi-Ku basewut sama kilau kare pamimpin je paling hai hong kalunen.

¹⁰Tuntang tinai, akan ungkup-Ku Israel jari inyadia-Ku eka tuntang inyoho-Ku ewen manetep intu hete, mangat ewen tau belom damai, dia inderoh tinai. Bara pandumah ewen akan tanah toh bihin, tuntang iangkat-Ku kare pamimpin akan ewen, ewen jari inyarang awi oloh je rajin kakaras, tapi taloh te dia akan manjadi tinai. Aku hajanji je ikau akan aman bara kare musoh, tuntang Aku akan manenga turonan akam.

¹²Jeha, amon lepah umurm, tuntang ikau ingubur intu kubur tato hiangm, ije bara anakm hatue iangkat-Ku jadi raja. Ie te je kareh mampendeng huma akang-Ku. Karajaan ayue kareh indeheng-Ku tuntang palus katatahie turonae kareh marentah kilau raja.

¹⁴ Aku kareh jadi bapae, tuntang ie kareh jadi anak-Ku. Amon ie mawi kasalan, ie kareh ihukum-Ku sama kilau ije biti bapa mahukum anak ayue.

¹⁵Tapi aku kareh tetep mawi gawi bahalap akae tumon janjing-Ku. Janjing-Ku dengae kareh tetep imbing-Ku, dia sama kilau je ilalus-Ku dengan Saul je jari indah-Ku bara kadudukae uka ikau tau jadi raja.

¹⁶Ikau kareh harajur aton turonan, tuntang Aku kareh mawi karajaam mendeng palus katatahie. Katatahie ije biti bara turonam kareh marentah kilau raja.’ ”

¹⁷Palus Natan mansanan akan Dawid taloh je jari ingarinah Hatalla dengae.

¹⁸Palus raja Dawid tame akan huang Kemah TUHAN. Ie mondok tuntang balakudoa, “O TUHAN Je Pangkahai, aku tuntang keluarga ayungku dia patut manarima kare kahalap je imparaham akangku katahin toh.

¹⁹Ikau mawie labih bara te haream, O TUHAN Je Pangkahai; ikau jari mawi janji tahiu turonangku akan katika je akan dumah. Tuntang Ikau mamparahan taloh te akangku, aloh aku baya olon,[16] o TUHAN Je Pangkahai!

²⁰Narai hindai je tau insanangku Akam? Ikau katawan urase tahiu rewar Ayum toh.

²¹Tagal janjin Aim tuntang awi kanahuang Ayum kabuat Ikau malalus kare gawi hai te uka majar rewar Ayum toh.

²²Ikau toto hai, o TUHAN Hatalla! Baya Ikau wei Hatalla, jaton je sama Dengam. Ikei katawan jete awi jari insanan Awim bara bihin.

²³Hong hapus kalunen jaton bangsa sama kilau Israel. Israel batunggal bangsa je jari imbebas Awim bara kahajipen uka jadi ungkup Ayum kabuat. Uras kare gawi hai tuntang heran je ilalus Awim akan ewen,[17] mawi aran Ayum basewut hapus kalunen. Kare bangsa beken hayak kare dewan ewen jari iharak Awim[18] metoh ungkup Ayum miar parang kalahi.

²⁴Bangsa Israel jari Awim ungkup Ayum kabuat palus katatahie, tuntang Ikau o TUHAN, jadi Hatallan ewen.

²⁵Tuntang toh, o TUHAN, Hatalla, keleh Ikau mandehen palus katatahie janji je insanan Awim tahiu arepku tuntang turonangku. Keleh malalus taloh je jari injanji Awim te.

²⁶Hong hete-hete oloh kareh mampahai Aram tuntang hamauh, ‘TUHAN Je Jaton Tikas Kuasae iete Hatallan Israel.’ Maka palus katatahie ije biti bara turonangku kareh marentah kilau raja akan bangsa toh.

²⁷TUHAN Je Jaton Tikas Kuasae! Aku mampahanyi arepku manyampai lakudoa toh Akam, awi Ikau kabuat je mansanan akangku je anak esongku gilir manggilir injadian Awim jadi raja akan bangsa toh.

²⁸O TUHAN Pangkahai ikau Hatalla; uras janjin Aim inggenep Awim, tuntang taloh je bahalap jari injanji Awim dengangku.

²⁹Tagal te, aku balaku, keleh mamberkat turonangku uka katatahie ewen tetep mangkeme sintam. O TUHAN Pangkahai, uras taloh te jari injanji Awim, maka turonangku kareh tetep imberkat Awim palus katatahie.”