Read Ngaju 1 RAJA-RAJA 1 Bible Online

1 RAJA-RAJA 1 - Ngaju bible

1 RAJA-RAJA 1

¹Toh raja Dawid jari bakas toto. Aloh ie ingahowut hapan benang bakapal, ie tetep mangkeme buah kasadingen.

²Awi te kare pagawaie hamauh, “Tuan Raja, keleh ikei manggau ije biti oloh bawi uka melai dengan Tuan Raja tuntang mahaga Tuan Raja. Ie akan batiroh dengan Tuan Raja mangat Tuan Raja mangkeme balasut.”

³Palus inggau intu hapus Israel ije biti oloh bawi bujang bahalap. Maka hong Sunem inyondau ije biti oloh bawi bahalap toto je arae Abisag. Ie iimbit manalih raja, palus ie manunggu raja tuntang mahaga ie. Tapi raja dia batiroh marantep ie.

⁴

⁵ Awi Absalom jari matei, maka Adonia anak Dawid je kaduee manjadi je tambakase. Indue bagare Hagit. Adonia te oloh je bakena. Bapae dia puji malait ie amon ie mawi kasalan. Adonia handak toto jadi raja, awi te ie manyadia kareta parang je are tuntang tantara bakuda hayak lime puluh pangawal pribadi ayue.

⁶

⁷Palus ie barunding dengan Yoab tuntang Imam Abyatar. Indu Yoab bagare Seruya. Yoab tuntang Imam Abyatar satuju tuntang mandukung usaha Adonia.

⁸Tapi Imam Sadok, Benaya anak Yoyada, Nabi Natan, Simei, Rei tuntang pangawal pribadi Raja Dawid dia omba mamihak Adonia te.

⁹Sinde andau intu eka je bagare Batu Handipe tokep tahasak danum En-Rogel, Adonia maluput parapah tabiri, sapi hatue tuntang anak sapi je basepu-seput. Ie marawei kare anak Dawid je beken, tuntang kare pagawai istana bara suku Yuda akan pesta maluput parapah te.

¹⁰Tapi Salomo andie, tuntang Nabi Natan hayak Benaya tuntang pangawal pribadi Raja Dawid dia iraweie.

¹¹ Maka nabi Natan haguet manyondau Batseba, indu Salomo, palus hamauh dengae, “En Ratu hindai mahining je Adonia anak Hagit, jari mangkat arepe jadi raja, padahal Dawid dia katawan en-en tahiu hal te?

¹²Amon Ratu nahuang mangat Salomo tuntang Ratu kabuat salamat, aku manasehat

¹³keleh bagulong manalih Raja Dawid, tuntang hamauh kalotoh dengae, ‘En dia Tuan Raja kabuat jadi sumpah dengangku je anakku Salomo akan jadi raja mangganti Tuan Raja? Toh, mbuhen Adonia je manjadi raja?’ ”

¹⁴Koan Natan limbah te, “Kareh, metoh ratu hakotak dengan raja, aku akan tame hapan mandehen taloh je jari insanan awi ratu.”

¹⁵Palus Batseba haguet manalih raja intu huang kamare. Raja metoh te jari paham bakas, tuntang Abisag, oloh bawi bara Sunem te, metoh mahaga ie.

¹⁶Batseba sontop intu taharep raja, palus raja misek, “Ikau handak narai?”

¹⁷Batseba tombah, “Tuan Raja je Tinduh-kahai, Tuan Raja jari basumpah dengangku tagal aran TUHAN, Hatallan Tuan Raja, je anakku Salomo akan manjadi raja mangganti Tuan Raja.

¹⁸Tapi toh luar pangatawan Tuan Raja, Adonia jari manjadi raja.

¹⁹Ie jari maluput are tabiri, sapi hatue tuntang anak sapi je basepu-seput. Ie kea jari marawei akan pesta te kare anak Tuan Raja, imam Abyatar dengan Yoab, pangkalima parang ain Tuan Raja. Tapi ie dia marawei Salomo.

²⁰Tuan Raja, hapus rayat Israel toh magon mentai kaputusan bara Tuan Raja tahiu eweh je akan mangganti Tuan Raja jadi raja.

²¹Amon Tuan Raja dia manenga kaputusan te, pasti sana Tuan Raja matei, aku tuntang anakku akan iawi oloh kilau penghianat.”

²²Metoh Batseba magon hakotak, Nabi Natan sampai akan istana.

²³Palus oloh mansanan akan raja je nabi Natan aton dumah. Batseba balua tuntang Natan tame, palus sontop intu taharep raja.

²⁴Natan hamauh, “Tuan Raja je ihormat, en Tuan Raja jari manampa pansanan je Adonia akan mangganti Tuan Raja manjadi raja?

²⁵Andau toh kea ie jari maluput are tabiri, sapi hatue tuntang anak sapi je basepu-seput. Uras anak Tuan Raja jari iraweie. Kalote kea kare pangkalima parang karajaan ain Tuan Raja, tuntang Imam Abyatar. Katika toh ewen kanjerae pesta tuntang basasurak, ‘Belom raja Adonia!’

²⁶Tapi, ie dia marawei aku. Imam Sadok tuntang Benaya dengan Salomo mahin dia ie maraweie.

²⁷En Tuan Raja je jari manyoho ie mawi kare taloh toh, tuntang dia mansanan akan kare pagawai Tuan Raja eweh je mangganti Tuan Raja?”

²⁸Dawid hamauh, “Tehau Batseba.” Palus Nabi Natan balua tuntang Batseba haluli manaharep Tuan Raja.

²⁹Balalu koan Tuan Raja dengae, “Puna aku jari hajanji dengam, tagal aran TUHAN, Hatallan Israel, je Salomo anakm kareh mangganti aku jadi raja. Toh aku hajanji dengam tagal TUHAN je belom, je akan malapas aku bara kare kasusahku, iete andau toh kea aku handak manggenep janjingku dengam.”

³⁰

³¹Batseba sontop sambil hamauh “Belom Tuan Raja sampai katatahie!”

³²Palus Raja Dawid mantehau Sadok, Natan tuntang Benaya. Limbah ewen dumah,

³³raja hamauh dengan ewen “Tehau kare perwira aingku tuntang lius hayak dengan ewen manalih Salomo anakku. Pandai ie akan hunjun kalidai ayungku kabuat, tuntang imbit ie akan tahasak danum Gihon.

³⁴Intu hete Sadok tuntang Natan musti mangkat ie manjadi raja Israel. Limbah te keton musti mampahiau tarompet tuntang basasurak ‘Belom Raja Salomo!’

³⁵Limbah te keleh mampahayak ie haluli akan hetoh uka mondok intu hunjun padadusangku, awi ie te je jadi iintihku manjadi raja mangganti aku uka marentah Israel tuntang Yuda.”

³⁶“Yoh, Tuan Raja,” tombah Benaya, “Keleh TUHAN, Hatallan Tuan Raja mandehen parentah Tuan Raja te.

³⁷Tumon TUHAN jari mampahayak Tuan Raja, keleh Ie mamapahayak Salomo kea. Keleh TUHAN mawi pamarentah ayue labih tamam bara pamarentah Tuan Raja.”

³⁸Palus Sadok, Natan, Benaya tuntang pangawal bitin raja manyoho Salomo mandai akan hunjun kalidai raja, tuntang ewen akan mampahayak ie akan tahasak danum Gihon.

³⁹Limbah te Sadok manduan sarangan undus saitun je jari imbite bara Kemah TUHAN, palus ie mangkat Salomo hapan minyak te. Tarompet palus impahiau tuntang kare oloh je dumah intu hete uras basasurak, “Belom Raja Salomo!”

⁴⁰Limbah te ewen uras mampahayak ie haluli sambil basasurak tuntang mampahiau suling, sampai petak kila-kilau handak basila awi karami te.

⁴¹Adonia tuntang uras kare oloh je iraweie harue ih mahapus gawin pestae, metoh ewen mahining karami te. Metoh Yoab mahining auh tarompet, ie misek “Narai je manjadi intu lewu sampai rami toto?”

⁴²Yoab hindai lepah hakotak, salenga dumah Yonatan anak Imam Abyatar. “Palus,” koan Adonia. “Ikau oloh bahalap, pasti je iimbitm, barita bahalap kea.”

⁴³“Maap, dia barita bahalap,” tombah Yonatan, “Raja Dawid jari mangkat Salomo manjadi raja!

⁴⁴Sadok, Natan, Benaya tuntang pangawal raja jari inyoho mampahayak Salomo. Ewen jari mampalompat ie akan hunjun kalidai raja.

⁴⁵Sadok dengan Natan jari mangkat ie intu tahasak danum Gihon. Toh ewen jari haluli akan lewu sambil rami basasurak, tuntang hapus lewu ridu. Jete karami je ihining keton nah.

⁴⁶Toh Salomo jari manjadi raja.

⁴⁷Kare perwira ain raja mahin jari haguet manyampai salamat akan Raja Dawid. Ewen hamauh, ‘Keleh Hatallan Tuan Raja mawi Salomo labih basewut bara Tuan Raja; Keleh pamarentah Salomo labih tamam bara pamarentah Tuan Raja.’ Limbah te intu ekae batiroh Raja Dawid sontop manyembah Hatalla.

⁴⁸Ie balakudoa, ‘Keleh ikau inara, O TUHAN, Hatalla je inyembah ungkup Israel. Andau toh ije bara turonangku jari iangkatku manjadi raja mangganti aku. Tuntang ikau jari manyoho aku belom uka manyaksie!’ ”

⁴⁹Kare oloh je irawei Adonia palus mikeh, sampai ewen uras mendeng balalu haguet mado jalanan ayue kabua-kabuat.

⁵⁰Palus Adonia paham mikeh dengan Salomo, sampai ie hadari akan Kemah TUHAN tuntang mimbing kare puting mesbeh[1] intu hete.

⁵¹Oloh mansanan taloh te akan Raja Salomo. Ewen mansanan je Adonia paham mikeh dengan Salomo, ie jari haguet akan mesbeh tuntang mimbing kare puting mesbeh te hayak hamauh, “Aku dia akan haguet bara hetoh helo bara Salomo sumpah dengangku je ie kareh dia akan mampatei aku.”

⁵²Salomo tombah, “Amon ie bahalap gawie, ie dia akan ihukum samasinde; tapi amon ie mawi kapapa, ie musti impatei.”

⁵³Palus raja manyoho oloh haguet manduan Adonia bara mesbeh te. Palus Adonia dumah manaharep raja, tuntang sontop intu taharepe. Raja hamauh, “Ikau tau buli!”