Read Ngaju 1 RAJA-RAJA 10 Bible Online

1 RAJA-RAJA 10 - Ngaju bible

1 RAJA-RAJA 10

¹ Awi raja bawi bara lewu Seba mahining auh tarong saritan raja Salomo, maka ie dumah akan Yerusalem handak mariksa Salomo hapan are auh isek je bahali-hali.

²Ie dumah impahayak are oloh ayue tuntang onta je kontep awi puat rarampah, batu permata, tuntang are toto amas. Katika hasondau dengan Salomo, ratu te misek kare macam auh isek je tau ie maniroke.

³Uras auh isek te olih inombah Salomo, jaton ije je lalau bahali akae.

⁴Ratu te mite kabuat kapaham kapintar kaharatin Salomo. Ie mite kea ampin istana je imangun Salomo,

⁵atoran gawi kare pagawai istana, tuntang pakaian saragam je ihapan ewen tuntang huma je eka ewen melai. Ie mite ampin panginan tuntang taloh ihop je inyarongan, cara kare pelayan manguan pesta, tuntang kare parapah je iluput Salomo intu Human TUHAN. Urase taloh te mawi ratu bara lewu Seba te hengan tuntang jungon.

⁶Palus ie hamauh dengan raja Salomo, “Kare taloh je ihiningku intu lewungku tahiu Tuan tuntang kapintar kaharatin Tuan, puna toto!

⁷Bihin aku dia olih percaya, tapi limbah aku dumah tuntang manyaksi urase taloh te hapan matangku kabuat, harue aku yakin. Toto haliai kare taloh je ihiningku te hindai sampai saparo bara taloh je gitangku toh. Ampie kapintar kaharati tuntang panatau Tuan labih hai bara je imbarita akangku.

⁸Lalehan katuahe kare kabalin Tuan! Lalehan kaontonge kare pagawai je harajur bagawi akan Tuan sampai tau mahining bara Tuan kabuat kare auh ajar ain oloh je pintar harati!

⁹Tara akan TUHAN, Hatallan Tuan! Dengan mangkat Tuan jadi raja Israel, TUHAN mamparahan kakai kasanange Ie dengan Tuan. Dia tera-terai Ie sinta bangsa Israel; awi te Ie mangkat Tuan jadi rajan ewen, mangat Tuan tau mandehen hukum parentah tuntang kabujur kaadilan.”

¹⁰Limbah te ratu lewu Seba te manyarah akan Salomo kare panenga je iimbite, iete labih bara 4.000 kilogram amas tuntang are toto permata hayak rarampah. Dia puji tinai Salomo manarima kare rarampah je kalote karee kilau je inenga ratu lewu Seba te akae. (

¹¹Kare kapal Hiram je mimbit amas bara Opir akan Salomo, kea mimbit karean batu permata tuntang kayu cendana.

¹²Kayu te ihapan Salomo akan manampa kare tali Human TUHAN tuntang intu istana raja. Kea akan manampa kacapi tuntang gambus akan kare panyanyi. Kare kayu te iete kayu cendana je pangkahalape je puji impadumah akan Israel. Dia puji tinai limbah te oloh mite kayu je kahalap te.)

¹³Beken bara panenga je bahut inenga awi Salomo, ie kea manenga akan ratu bara lewu Seba te kare taloh je ilakue. Limbah te ratu Seba buli akan lewue hayak dengan kakare oloh ayue.

¹⁴Genep nyelo raja Salomo mandino bilak 23.000 kilogram amas,

¹⁵tinai jaton taraise kare kaontonge badagang, tuntang kare pajak bara kare sadagar, kare raja Arab dengan kare gubernur Israel.

¹⁶Salomo manampa 200 talawang hai bara amas masak. Amas je ihapan akan genep talawang[11] te aton labih kurang uju kilogram.

¹⁷Ie kea manampa 300 talawang amas je labih korik. Amas je ihapan akan genep talawang korik te aton labih kurang due kilogram, uras jete bara amas masak. Uras talawang te iinae intu balai je bagare Balai Himba Libanon.[12]

¹⁸Ie kea manampa ije karosi karajaan je hai je inantilap hapan gading tuntang imbungas hapan amas tulen.

¹⁹Karosi te aton lengee, tuntang intu balikate hasansila aton hampatong singa. Intu likut karosi te aton hampatong takolok sapi. Karosi te kea aton tanggae je jahawen lampate.

²⁰Intu tapakan hila sambil tuntang tapakan hila gantau genep tangga te aton hampatong singa — due walas karee. Dia puji aton karosi karajaan kilau te hong karajaan je kueh bewei.

²¹Uras pakakas hapa mihop ain Salomo inampa bara amas, tuntang uras pakakas intu Balai Himba Libanon mahin inampa bara amas tulen. Jaton ije je inampa bara perak, awi hong jaman Salomo oloh mitong perak te dia barega.

²²Ain Salomo are kapal je balayar hayak dengan kare kapal Raja Hiram. Sinde hong telo nyelo kare kapal te haluli mimbit amas, perak, gading, bakei tuntang burong haruei.

²³Raja Salomo labih tatau tuntang labih pintar harati bara kare raja je kueh bewei hong kalunen.

²⁴Uras kare oloh hong hapus kalunen rajin handak manyondau Salomo uka mahining auh ajar kapintar kaharati je inenga Hatalla akae.

²⁵Genep bitin ewen je dumah te mimbit panenga akan Salomo. Ewen mimbit kare ramo bara perak, amas, pakaian, pakakas parang, rarampah, kuda tuntang kalidai genep nyelo.

²⁶ Salomo manampa pasukan parang bara 1.400 kareta parang tuntang 12.000 tantara bakuda. Belahe inae intu Yerusalem tuntang tisae intu kare lewu beken.

²⁷ Hong jaman Salomo marentah, intu Yerusalem perak iitong kilau ramo biasa sama kilau batu ih. Kayu cemara Libanon hatawon kilau kayu ara biasa ih.

²⁸ Mahalau kare oloh pangusaha ain raja, kuda impadumah bara Misir tuntang Kilikia.

²⁹Kare kareta parang impadumah bara Misir. Regan ije kuda 150 duit perak. Regan ije kareta parang 600 duit perak. Limbah te mahalau kare oloh pangusaha te kea kare kuda tuntang kare kareta parang te injual tinai akan kare raja Het tuntang kare raja Siria.