Read Ngaju 1 RAJA-RAJA 11 Bible Online

1 RAJA-RAJA 11 - Ngaju bible

1 RAJA-RAJA 11

¹ Raja Salomo sinta are oloh bawi bara bangsa beken. Beken bara putri raja Misir, Salomo kawin kea dengan kare bawin oloh Het, Moab, Amon, Edom tuntang Sidon.

² TUHAN jari marentah je oloh Israel dia tau kawin hewoi dengan kare bangsa te, awi ewen akan mawi sabab oloh Israel manyembah Hatalla beken. Aloh kalote Salomo kawin kea dengan kare oloh bawi bangsa beken.

³Aton 700 bawin oloh bangsawan je kawin dengan Salomo, tuntang aton kea 300 gundike. Ganan kare sawae te maka Salomo mangalapean Hatalla.

⁴Awi te, katika ie jari bakas ewen te olih mangatau ie manyembah kare hatalla beken. Dawid, bapa Salomo, baketep dengan TUHAN, Hatalla, tapi Salomo dia kilau bapae.

⁵Salomo manyembah Astoret, dewi bangsa Sidon, tuntang kea Molokh dewa je bakajile-jilek je inyembah bangsa Amon.

⁶Kalote Salomo badosa intu taharep TUHAN. Dawid, bapa Salomo manumon auh TUHAN dengan salepah atei, tapi Salomo dia kilau te.

⁷Intu hunjun bukit hila timor Yerusalem, ie mampendeng eka manyembah Kamos, dewa ain oloh Moab, tuntang akan Molokh, dewa ain oloh Amon — kadadue dewa te uras bakajile-jilek.

⁸Salomo mampendeng kea kare eka akan sawae tuntang kare bangsa beken tau mamapui garo, tuntang maluput parapah akan kare dewan ewen kabuat.

⁹Jari due tingkat TUHAN, Hatallan Israel, mamparahan arep Aie akan Salomo tuntang mampingat ie je ie dia tau manyembah kare hatalla beken, tapi Salomo dia manumon auh TUHAN. Ie mangalapean TUHAN haream sampai TUHAN sangit dengae.

¹¹TUHAN hamauh, “Awi hapan karendengm ikau malangkah janjim dengang-Ku tuntang dia manumon kare parentah-Ku, maka Aku kareh marunat karajaan te bara ikau, tuntang manenga jete akan ije pagawai aim.

¹²Aloh kalote, tagal bapam Dawid, Aku dia akan mawi taloh te akan pambelom ayum. Hong wayah anakm marentah, harue Aku mawie.

¹³Tapi dia hapus karajaan te akan irunat-Ku bara ie. Tagal rewarku Dawid, tuntang tagal Yerusalem je jari iawi-Ku jadi lewung-Ku te, Aku akan manisa ije suku akan anakm.”

¹⁴TUHAN mawi Hadad, ije biti turonan raja Edom, musoh Raja Salomo.

¹⁵Tahi helo bara te, limbah Raja Dawid mampakalah Edom, Yoab, pangkalima parang Raja Dawid, haguet akan Edom uka mangubur kare oloh ayue je matei. Jahawen bulan katahie ie tuntang oloh ayue melai intu Edom. Tuntang hong katika te ewen mampatei uras oloh hatue intu hete.

¹⁷Tapi Hadad, je metoh te magon tabela, jari hadari akan Misir hayak dengan pire-pire oloh Edom, kare oloh ayang ain bapae.

¹⁸Ewen haguet bara Midian, palus tolak akan Paran. Intu hete pire-pire oloh beken omba dengan ewen, palus haya-hayak haguet akan Misir manyondau raja Misir. Raja te manenga akan Hadad huma tuntang petak akan ekae melai tuntang jaminan akan pambelome.

¹⁹Palus Hadad kea manjadi sobat bahalap ain raja, sampai raja manenga sindahe kabuat, iete andi sawan raja Tahpenes, akan Hadad manjadi sawae.

²⁰Limbah te sawan Hadad te manak ije biti anak hatue je inggaree Genubat. Anak toh impahai awi sawan raja kabuat tuntang melai intu istana hayak dengan kare anak raja.

²¹Katika Hadad manarima barita je Raja Dawid jari matei, tuntang Yoab, pangkalima pasukan parang Israel kea jari matei, Hadad hamauh dengan raja Misir, “Soho aku buli akan lewungku.”

²²“Mbuhen?” koan raja misek, “En ikau barakatapas intu hetoh, sampai ikau handak buli akan lewum?” “Aku dia tapas en-en,” tombah Hadad, “tapi keleh aku inyoho haguet.” Palus ie haluli akan lewue.[13]

²³Hatalla mawi kea Reson, anak Elyada, jadi musoh Salomo. Reson te jipen je hadari bara Tuan ayue iete Raja Hadadeser bara Soba.

²⁴Raja Dawid puji mampakalah Hadadeser toh tuntang mampatei kare kawal Hadadeser bara Siria. Katika te Reson hadari bara Hadadeser tuntang mamakat mamumpong kare oloh palus jadi kapala kawan garombolan. Ie tuntang oloh ayue haguet akan Damaskus palus melai intu lewu te. Intu hete oloh ayue mangkat ie jadi raja Siria.

²⁵Kilau Hadad, Raja Reson kea jadi musoh Israel katahin pambelom Salomo, tuntang mangacau hong lewu te.

²⁶Oloh beken je hamusoh malawan Salomo iete ije bara pagawai ayuie arae Yerobeam. Ie anak Nebat bara Sereda intu Epraim. Indue te jari balo, arae Serua.

²⁷Toh sarita tahiu pambarontakan Yerobeam. Katika petak intu hila salatan Human TUHAN te ingawok, tuntang dinding lewu ingambuah,

²⁸Yerobeam kea bagawi intu hete. Katika Salomo mite je Yerobeam te oloh je apik tuntang rajin, ie manenga akae tanggung jawab uka mangawas gawi paksa intu wilayah suku Manase tuntang Epraim.

²⁹Sinde andau Yerobeam balua bara Yerusalem, hong benteng jalan intu janah ie inalih awi Nabi Ahia bara Silo je metoh te mahapan jubah je taheta.

³⁰Palus Ahia mengkak jubahe, tuntang marabite sampai jadi due walas katetek.

³¹Limbah te ie hamauh dengan Yerobeam, “Duan sapuluh katetek akam, awi TUHAN, Hatallan Israel hamauh kalotoh dengam, ‘Aku akan marunap karajaan toh bara Salomo, tuntang manenga sapuluh suku akam.

³²Ije suku akan tetep intu Salomo, tagal rewar-Ku Dawid tuntang tagal Yerusalem, je jari iintih-Ku bara hapus lewun oloh Israel jadi lewung-Ku.

³³Aku akan mawi taloh toh awi Salomo jari mangalapean Aku tuntang manyembah kare dewa, iete: Astoret, dewi bangsa Sidon, Kamos, dewa bangsa Moab; tuntang Milkom, dewa bangsa Amon. Salomo dia manumon kahandak-Ku. Ie dia kilau bapae Dawid je manumon auh-Ku tuntang malalus kare parentah-Ku.

³⁴Aloh kalote Aku dia akan manduan hapus karajaan te bara ie. Ie akan inalua-Ku mimbing kuasa hapus pambelome. Taloh te ilalus-Ku tagal rewar-Ku Dawid, je jari iintih-Ku tuntang manumon kare parentah tuntang kare atoran ayung-Ku.

³⁵Karajaan toh akan induang-Ku bara anak Salomo tuntang sapuluh suku akan inenga-Ku akam.

³⁶Tapi ije suku akan inalua-Ku akae, mangat harajur aton ije bara turonan rewar-Ku Dawid je marentah akang-Ku intu Yerusalem, lewu je intih-Ku kilau eka sombayang akang-Ku.

³⁷Tuntang ikau, Yerobeam, akan iawi-Ku jadi raja Israel tuntang inyoho-Ku marentah hapus daerah je ingahandakm.

³⁸Amon ikau, kilau rewar-Ku Dawid, toto-toto manumon auh-Ku tuntang belom manumon kare parentah-Ku, hayak manyanang atei-Ku awim malalus uras kare taloh je irentah-Ku akam, maka Aku akan mampahayak ikau harajur. Aku akan mawi ikau raja intu Israel. Aku akan manjamin je turonam akan jadi raja Israel mangganti ikau, sama kilau je jari iawi-Ku akan Dawid.

³⁹Awi Salomo badosa, aku akan mahukum turonan Dawid, tapi dia sampai palus katatahie.’ ”

⁴⁰Metoh barita te sampai akan Salomo, ie manggau jalan uka mampatei Yerobeam. Tapi Yerobeam hadari akan raja Sisak intu Misir, tuntang melai intu hete sampai Salomo matei.

⁴¹Sarita je beken tahiu Salomo, tahiu kakare taloh je jari iawie tuntang tahiu pengatawae, jari incatet huang buku Saritan pambelom Salomo.

⁴²Epat puluh nyelo katahie Salomo marentah intu Yerusalem akan hapus Israel.

⁴³Limbah te ie matei tuntang ingubur hong Lewun Dawid. Palus Rehabeam anake manjadi raja mangganti ie.