Read Ngaju 1 RAJA-RAJA 12 Bible Online

1 RAJA-RAJA 12 - Ngaju bible

1 RAJA-RAJA 12

¹Rehabeam haguet akan Sikhem, awi hapus rayat Israel utara jari hapumpong intu hete uka mangkat ie jadi raja.

²Katika te Yerobeam anak Nabat magon aton intu Misir awi hadari bara raja Salomo. Katika ie mahining tahiu Rehabeam, ie haluli akan Israel.

³Rayat je hila utara marawei Yerobeam, palus ewen mampahayak ie haguet manaharep Rehabeam. Koan ewen,

⁴“Salomo bapa Tuan Raja mampahian tanggongan tuntang mangurang kapehen ikei. Toh amon Tuan Raja mampahian tanggongan tuntang mangurang kapehen ikei, ikei akan manempo Tuan Raja.”

⁵Rehabeam tombah, “Aku musti bapikir helo. Keleh dumah haluli telo andau tinai.” Palus kare oloh te buli.

⁶Balalu Rehabeam balaku dengan kare oloh bakas je puji jadi panasehat Salomo, bapa Rehabeam. “Kilen auhku musti tombah kare auh oloh te?” pisek Rehabeam. “Narai nasehat keton?”

⁷Ewen tombah, “Amon Tuan Raja toto-toto handak manempo rayat, tenga palakun ewen, awi ewen akan manempo Tuan Raja palus katatahie.”

⁸Tapi Rehabeam dia olih manarima nasehat kare oloh bakas te. Tapi ie haguet manalih kare oloh tabela je hapantar dengae tuntang je toh mandohop ie.

⁹Ie misek dengan ewen, koae, “Narai nasehat keton akangku hapa manombah auh rayat je balaku mangat aku mampahian tanggongan ewen?”

¹⁰Ewen tombah, “Keleh Tuan Raja mansanan kalotoh akan ewen, ‘Salemo-lemoe aku, aku magon labih abas bara bapaku!’[14]

¹¹Bapaku manenga tanggongan je babehat akan keton, tapi aku akan manenga je labih babehat tinai. Ie mahewes keton hapan sampiti, tapi aku akan mamukul keton dengan sampiti je haduhi bara sanaman.”

¹²Telo andau limbah te Yerobeam tuntang kare oloh te haluli manaharep Raja Rehabeam, kilau je jari irentahe.

¹³Hakalawan dengan nasehat kare oloh te, rayat je dumah manalih ie te ie hamauh hapan auh je karas.

¹⁴Tumon nasehat kare oloh je tabela nah, ie hamauh, “Bapaku manenga akan keton tanggongan je babehat, tapi aku akan manenga tanggongan je labih babehat tinai. Ie mahewes keton hapan sampiti, tapi aku akan mahambat keton hapan sampiti je haduhi bara sanaman!”

¹⁵Auh palakun rayat te dia ie manarimae. Tapi jete puna kahandak TUHAN. Taloh je insanan TUHAN mahalau Nabi Ahia bara Silo tahiu Yerobeam anak Nebat musti manjadi.

¹⁶ Katika rayat mite je raja dia maku mahining auh ewen, ewen mangkariak, “Kanduen itah Dawid dengan turonae! Ewen dia puji mawi taloh en-en akan itah. Rayat Israel, ayo itah buli! Nauhe Rehabeam te nantuani arepe kabuat!” Palus rayat Israel buli,

¹⁷tuntang Rehabeam jadi raja baya akan wilayah Yuda.

¹⁸Aloh kalote Raja Rehabeam magon kea manyoho Adoniram, ije biti kapala gawi paksa, manyanang atei rayat. Tapi ewen mamanting ie hapan batu sampai matei. Mite taloh te Rehabeam kaje-kajeng lompat akan karetae, palus hadari akan Yerusalem.

¹⁹Nampara bara katika te rayat intu hila utara karajaan Israel harajur malawan amon manaharep kare raja turonan Dawid.

²⁰Hong katika hapus rayat Israel mahining je Yerobeam jari haluli bara Misir, ewen marawei ie akan ije pumpong palus mangkat ie manjadi raja Israel. Baya rayat bara suku Yuda bewei je tetep baketep dengan turonan Dawid.

²¹Katika raja Rehabeam dumah intu Yerusalem, ie mamumpong 180.000 tantarae je paling bahalap bara kare suku Yuda tuntang Benyamin uka mamarang oloh Israel tuntang halalian kuasae akan kare suku intu hila utara Israel.

²²Tapi Hatalla manyoho Nabi Semaya

²³manyampai barita toh akan Rehabeam, tuntang akan hapus suku Yuda tuntang Benyamin.

²⁴“Ela mamarang kare paharin keton oloh Israel. Buli! Taloh je jari manjadi jete kahandak ayung-Ku.” Palus kare ewen uras manumon parentah TUHAN, balalu buli akan genep human ayu-ayue.

²⁵Limbah jadi raja Israel, Yerobeam mandehen lewu Sikhem intu daerah pagunungan Epraim, palus melai intu hete pandehan mite ampin kare katika. Limbah te ie haguet tinai bara hete tuntang mandehen lewu Pnuel.

²⁶Ie manirok kalotoh huang ateie, “Amon rayat tetep haguet akan Yerusalem uka maluput parapah intu Human TUHAN kilau je ilalus ewen katika toh, ewen akan haluli mandohop Rehabeam, raja Yuda, palus mampatei aku.”

²⁸ Limbah manirok taloh te, ie manampa due hampatong sapi amas palus hamauh dengan rayat, “Bangsa Israel! Jari sukup katahie keton haguet akan Yerusalem uka sombayang. Toh, jetoh kare hatallan keton je jari mimbit keton balua bara Misir!”

²⁹Palus Yerobeam mingkes ije bara sapi amas te intu Betel tuntang je beken tinai intu Dan.

³⁰Palus rayat kea mawi dosa, awi ewen haguet akan Betel tuntang akan Dan uka sombayang.

³¹Yerobeam kea mampendeng kare eka sombayang beken hong kare puncak bukit. Ie mangkat kare imam bara marak kare keluarga je beken bara suku Lewi.

³² Limbah te Yerobeam mingkes kare imam te intu Betel uka malalus gawi intu hete tuntang ie kabuat maluput parapah akan kare sapi amas je inampae te. Palus ie manukas tanggal lime walas bulan hanya kilau andau hai akan Israel, sama kilau andau hai intu Yuda. Andau te Yerobeam haguet akan Betel tuntang maluput parapah uka mahaga andau hai je jari inukas awie te.