Read Ngaju 1 RAJA-RAJA 13 Bible Online

1 RAJA-RAJA 13 - Ngaju bible

1 RAJA-RAJA 13

¹Hong katika te aton ije biti nabi intu Yuda. Ie inyoho awi TUHAN uka haguet akan Betel. Nabi te sampai intu Betel metoh Yerobeam mendeng intu baun mesbeh handak maluput parapah.

² Tagal parentah TUHAN nabi te palus mangkariak dengan mesbeh te, “O mesbeh! Kalotoh auh TUHAN ‘Ije biti anak hatue je akan inggare Yosia akan inakan hong keluarga Dawid. Intu hunjun ikau toh, o mesbeh, ie akan mampatei kare imam je bagawi intu kare eka sombayang akan dewa, tuntang je jari kea maluput parapah intu hunjun ikau. Tuntang hong hunjun ikau kea ie akan mamapui tulang olon.’ ”

³Koan nabi te tinai, “Mesbeh toh akan baduroh, tuntang kawo je intu hunjue akan batusoh. Jete tandae je aku toh inyoho TUHAN.”

⁴Katika Yerobeam mahining kare auh te, ie maninjok nabi te palus mangkariak, “Singkap oloh te!” Tapi balalu lengen Yerobeam kejer sampai ie dia tau manendore haluli.

⁵Mesbeh te salenga baduroh tuntang kawo intu hunjue batusoh akan petak, kilau je jari insanan awi nabi te hapan parentah TUHAN.

⁶Palus raja Yerobeam hamauh dengan nabi te, “Dohop balakudoa intu TUHAN, Hatallam, akangku. Laku asin Aie akangku uka mampakeleh lengengku!” Nabi te palus balakudoa intu TUHAN, balaku lengen raja impakeleh.

⁷Limbah te raja te hamauh dengan nabi te, “Keleh kuman intu humangku. Aku handak manenga taloh panenga akam.”

⁸Nabi te tombah, “Aloh Tuan Raja manenga akangku saparo bara panatau Tuan Raja, aku dia handak omba uka kuman atawa mihop dengan Tuan Raja.

⁹Aku mandino parentah bara TUHAN uka dia kuman atawa mihop tuntang dia buli mahoroi jalan je ihalauku metoh dumah.”

¹⁰Palus nabi te haguet mahalau jalan beken.

¹¹Katika te aton ije biti nabi bakas je melai intu Betel. Kare anake mansanan akae tahiu nabi bara Yuda te. Ewen manyarita taloh je ilaluse intu Betel andau te, tuntang taloh je insanae akan raja Yerobeam!

¹²Palus nabi bakas te misek, “Nabi bara Yuda te mahoroi jalan je kueh katika ie buli?” Balalu ewen te maninjok jalan te akae.

¹³Palus ie manyoho ewen mangkepan lapik pondok intu kalidaie. Limbah te ie lompat kalidaie tuntang haguet

¹⁴manggoang nabi bara Yuda te. Ie sondau nabi te metoh mondok intu penda ije batang kayu hai. “En ikau nabi bara Yuda te?” pisek nabi bakas te. “Toto,” tombah oloh te.

¹⁵“Keleh kuman intu humangku,” koan nabi bakas te.

¹⁶Tapi nabi bara Yuda te tombah, “Maap! aku dia tau manarima parawei bapak uka omba akan human bapak. Aku kea kareh dia kuman atawa mihop intu hetoh dengan bapak.

¹⁷TUHAN jari maretah aku uka dia kuman atawa mihop tuntang dia buli mahoroi jalan je ihoroiku katika aku dumah.”

¹⁸Palus nabi bakas bara Betel te mananjaro ie, palus hamauh, “Aku kea nabi kilau ikau. Hapan parentah TUHAN kea ije biti malekat jari manyoho aku manduan tuntang manyarongan ikau intu humangku.”

¹⁹Palus nabi bara Yuda te omba akan human nabi bakas te,

²⁰tuntang kuman dengae. Metoh ewen mondok kuman, TUHAN hamauh dengan nabi bakas te,

²¹sampai ie maningak nabi bara Yuda te, koae “TUHAN hamauh je ikau dia manumon auh Ayue. Ikau dia malalus taloh je irentah Awie akam.

²²Ikau jari haluli tuntang kuman mihop, padahal ikau jari ingahana Awie mawi taloh te. Awi te ikau akan impatei, tuntang hantum dia akan ingubur hong kubur keluargam.”

²³Limbah ewen kuman, nabi bakas te mangkepan lapik pondok akan hunjun kalidai ain nabi bara Yuda te,

²⁴palus nabi te haguet. Intu benteng jalan ie inangkarap awi ije kongan singa, palus matei. Hantue limbah te lanto-lantong intu jalan, tuntang kalidaie mendeng tokep hete. Singa te kea mendeng intu hete.

²⁵Kare oloh je mahalau, mite hantu tuntang singa te intu hete. Palus ewen haguet akan Betel mansanan taloh je gitan ewen.

²⁶Metoh nabi bakas te mahining tahiu taloh te, “Pasti jete nabi je dia manumon parentah TUHAN! Tagal te TUHAN manyoho singa te manangkarap tuntang mampatei ie kilau je insanan TUHAN helo bara te.”

²⁷Palus nabi bakas te hamauh dengan kare anake. “Kepan lapik pondok intu kalidaiku.” Limbah lompat akan hunjun kalidaie, ie palus haguet.

²⁸Ie sondau hantun nabi Yuda te magon aton intu jalan dengan kalidai tuntang singa tokepe. Singa te dia manangkarap kalidai te, tuntang dia kea kuman hantu te.

²⁹Ie manggatang hantu te tuntang minae intu hunjun kalidaie, palus mimbite haluli akan Betel uka inatum tuntang ingubur.

³⁰Nabi bakas te kabuat mangubur hantu te hong kubur keluargae, palus ie tuntang kare anake manatum hantu te. Ewen hamauh, “Lalehan kapasim, paharingku, lalehan kapasim!”

³¹Limbah te koan nabi bakas te dengan kare anake, “Amon aku matei, ngubur aku hong kubur toh intu hila silan nabi te.

³²Taloh je jari insanan hapan parentah TUHAN akan mesbeh hong Betel te tuntang akan hapus eka sombayang intu kare lewu Samaria pasti akan manjadi.”

³³Raja Yerobeam tetep dia maku malihi gawie je papa. Uka manantuani kare eka sombayang je impendenge te, ie harajur kea mintih imam bara kare keluarga biasa. Eweh bewei je nahuang, jete je iangkate jadi imam.

³⁴Gawie je papa te mawi turonae calaka tuntang hancor samasinde.