Read Ngaju 1 RAJA-RAJA 15 Bible Online

1 RAJA-RAJA 15 - Ngaju bible

1 RAJA-RAJA 15

¹Intu nyelo kahanya walas kahum raja Yerobeam marentah Israel, Abiam jadi raja Yuda;

²ie marentah katahin telo nyelo intu Yerusalem. Indue iete Maakha, anak Abisalom.

³Abiam mawi kare dosa kilau bapae. Ie dia hapan salepah ateie manempo TUHAN, Hatalla, beken bara Dawid, tatoe.

⁴ Tapi tagal Raja Dawid, maka TUHAN, Hatalla je inyembah Dawid, jari manenga akan Abiam ije biti anak uka mangganti ie marentah intu Yerusalem tuntang mahaga lewu te.

⁵ TUHAN malalus taloh te tagal Dawid jari manyanang ateie. Dawid dia puji malihi kare parentah TUHAN, baya huang perkara Uria oloh Het te ih.

⁶ Parang marak Rehabeam dengan Yerobeam je inampara intu wayah Rehabeam, magon manjadi katahin Abiam marentah.

⁷Sarita je beken tahiu Abiam jari incatet intu buku Sejarah Kare Raja Yuda.

⁸Abiam matei tuntang ingubur intu Lewun Dawid. Asa anake jadi raja mangganti ie.

⁹Intu nyelo kadue puluh kahum Raja Yerobeam marentah Israel, Asa jadi raja Yuda.

¹⁰Ie marentah epat puluh ije nyelo katahie intu Yerusalem. Tambie iete Maakha, anak Abisalom.

¹¹Kilau Dawid, tatoe, Asa manyanang atei TUHAN.

¹² Uras kare bawin lontei je bagawi intu kare eka manyembah dewa iharake; kare hampatong dewa je impendeng awi kare raja je marentah helo bara ie impalomose bara hapus lewun petak danum.

¹³Tambie Maakha, impateraie jadi ratu, awi ie jari manampa hampatong dewa pahabandong akan Asera, dewi kasiwoh. Asa mampalongkang hampatong dewa te tuntang mamapuie intu Janah Kidron.

¹⁴Aloh dia urase kare eka manyembah dewa impahancor awi Asa, tapi ie baketep dengan TUHAN hapus andau pambelome.

¹⁵Uras kare amas tuntang perak je jari iluput bapae akan TUHAN, iimbite akan Human TUHAN. Kalote kea amas tuntang perak je ilupute kabuat.

¹⁶Katahin Raja Asa marentah karajaan Yuda tuntang Raja Baesa marentah karajaan Israel harajur aton parang marak kadadue raja te.

¹⁷Baesa manyarang Yuda tuntang mandehen lewu Rama hapa manutup jalan tame balua karajaan Yuda.

¹⁸Awi te Raja Asa manduan lepah kare amas tuntang perak je magon aton intu Human TUHAN tuntang istana raja palus mangirime akan Damaskus akan Ben Hadad raja Siria, anak Tabrimon, iete eson Hesion. Kare ramo te ingirim mahalau pire-pire pajabat istana, impahayak peteh kalotoh,

¹⁹“Keleh itah hapakat tuntang hasobat kilau je jari iawi oloh bakas itah. Hayak toh aku mangirim amas tuntang perak kilau panenga. Aku balaku Tuan manggeto kapakat dengan Baesa raja Israel, mangat ie manduan haluli pasukae bara wilayah ayungku.”

²⁰Ben Hadad manumon auh palaku te palus manyoho kare perwirae hayak pasukan ewen manyarang kare lewun oloh Israel. Ewen mampakalah Iyon, Dan, Abel-Bet-Maakha tuntang Kinerot tokep danau Galilea hayak hapus wilayah Naptali.

²¹Metoh Baesa mahining taloh te, ie terai mandehen lewu Rama. Ie haguet akan Tirsa tuntang pandehan aton katika ie dia parang.

²²Limbah te, kakare oloh intu hapus tanah Yuda jaton ije je dia irentah awi Raja Asa uka munda batu tuntang kayu je ihapan Baesa intu Rama hapa mandehen lewu te. Kare ramo te ihapan Asa uka mandehen lewu Mispa tuntang Geba, ije lewu intu tanah Benyamin.

²³Sarita je beken tahiu Raja Asa, iete kamentenge tuntang kare lewu je indehee, jari incatet huang buku Sejarah Kare Raja Yuda. Intu wayah kabakase Asa buah panyakit hong kadadue paie.

²⁴Ie matei tuntang ingubur intu kubur kare raja hong Lewun Dawid. Yosapat, anake hatue jadi raja mangganti ie.

²⁵Intu nyelo kaduee raja Asa marentah Yuda, Nadab anak Yerobeam jadi raja intu Israel tuntang marentah due nyelo katahie.

²⁶Sama kilau bapae je marentah helo bara ie, ie mahin mawi taloh je papa intu tampayah TUHAN sampai mambuku oloh Israel mawi dosa.

²⁷Baesa, anak Ahia, bara suku Isaskar, mandarhaka malawan Nadab, palus mampateie. Metoh te Nadab dengan pasukae kanjeran mangapong lewu Gibeon intu tanah Pilistin.

²⁸Taloh te manjadi hong nyelo kateloe Raja Asa marentah Yuda. Kalote Baesa jadi raja Israel mangganti Nadab.

²⁹ Sana Baesa jadi raja, ie mampatei lepah oloh keluarga Yerobeam. Tumon taloh je jari insanan TUHAN mahalau reware, Nabi Ahia bara Silo, maka hapus keluarga Yerobeam impatei, jaton ije je liwus.

³⁰Yerobeam badosa tuntang mambuku oloh Israel kea badosa. Tumon te Yerobeam mawi kasangit TUHAN, Hatalla je inyembah oloh Israel.

³¹Sarita je beken tahiu Nadab jadi incatet huang buku Sejarah Kare Raja Israel.

³²Katahin Raja Baesa marentah Israel, parang harajur manjadi marak Baesa dengan Raja Asa bara Yuda.

³³Intu nyelo katelo Raja Asa marentah Yuda, Baesa anak Ahia jadi raja akan hapus Israel. Ie mamarentah intu Tirsa due puluh epat nyelo katahie.

³⁴Sama kilau raja Yerobeam je marentah helo bara ie, Raja Baesa kea badosa intu TUHAN tuntang mambuku oloh Israel kea mawi dosa.