Read Ngaju 1 RAJA-RAJA 16 Bible Online

1 RAJA-RAJA 16 - Ngaju bible

1 RAJA-RAJA 16

¹Maka TUHAN hakotak dengan nabi Yehu anak Hanani, koae, “Keleh manyampai akan Baesa peteh-Ku toh,

²‘Bihin ikau jaton en-en, tapi toh ikau jari iangkat-Ku jadi pamimpin akan ungkup Israel. Toh ikau badosa kilau Yerobeam tuntang mawi sabab ungkup-Ku Israel badosa, sampai mawi Aku lembut kasangit-Ku.

³Awi te Aku akan manganan ikau tuntang keluargam sama kilau je jari ilalus-Ku taharep Yerobeam.

⁴Anggota keluargam je matei intu lewu akan indu kinan aso. Ewen je matei intu luar lewu akan indu kinan burong.’ ”

⁵Taloh je beken je jari iawi Baesa tuntang kare kamentenge jari incatet intu Sejarah Kare Raja Israel.

⁶Baesa matei tuntang ingubur intu Tirsa, tuntang anake Ela mangganti ie kilau raja.

⁷Peteh TUHAN malawan Baesa tuntang keluargae inenga awi Nabi Yehu tagal kare dosa je ilalus Baesa malawan TUHAN. Ie mawi kasangit TUHAN dia baya awi kapapa je ilaluse, sama kilau je ilalus raja Yerobeam helo bara ie, tapi kea awi ie mampatei hapus keluarga Yerobeam.

⁸Intu nyelo kadue puluh jahawen Raja Asa marentah Yuda, Ela anak Baesa jadi raja akan karajaan Israel. Ie marentah intu Tirsa due nyelo katahie.

⁹Simri, ije biti perwira je mamimpin saparo bara pasukan je mahapan kareta, mandarhaka malawan Ela. Sinde andau hong Tirsa, Ela mihop rami-rami sampai babusau intu human Arsa, pamimpin akan huma serok istana raja.

¹⁰Palus Simri tame tuntang mampatei Ela, limbah te ie jadi raja mangganti Ela jete manjadi hong nyelo kadue puluh uju Raja Asa marentah intu karajaan Yuda.

¹¹Sana Simri jadi raja, ie mampatei lepah keluarga Raja Baesa. Tinai lepah tondah paharin Baesa je hatue hayak kare sobat keluargae mahin jaton je liwus.

¹²Tumon taloh je insanan TUHAN akan Baesa mahalau Nabi Yehu, hapus keluarga Baesa impatei.

¹³Baesa tuntang Ela, anake manyembah kare dewa tuntang mambuku oloh Israel mawi dosa. Awi te, ewen mampalembut kasangit TUHAN, Hatalla je musti inyembah awi oloh Israel.

¹⁴Sarita je beken tahiu Ela jadi incatet huang buku Sejarah Kare Raja Israel.

¹⁵Hong nyelo kadue puluh uju raja Asa marentah intu karajaan Yuda, Simri jadi raja Israel tuntang marentah intu Tirsa katahin uju andau. Metoh te tentara Israel kanjerae mangapong Gibeton, lewun oloh Pilistin.

¹⁶Metoh ewen mahining Simri jari mandarhaka malawan raja tuntang jari mampateie, hong andau te kea intu eka kare kemah ewen te, ewen uras mangkat Omri, pangkalima ewen, jadi raja Israel.

¹⁷Limbah te Omri tuntang tantarae malihi Gibeton palus haguet mangapong Tirsa.

¹⁸Metoh Simri mite lewu te jari irabut, ie tame akan huang istana tuntang mangehu istana te haya-hayak dengan arepe kabuat, palus ie matei.

¹⁹Jete manjadi awi ie malalus kare taloh je papa hong tampayah TUHAN. Sama kilau raja Yerobeam, Simri kea badosa intu TUHAN tuntang mambuku oloh Israel badosa kea.

²⁰Sarita je beken tahiu Simri, tatame kea rancana gawie malawan raja, jari incatet intu huang buku Sejarah Kare Raja Israel.

²¹Maka lembut kapusit intu huang karajaan bangsa Israel awi aton je nahuang mangat Tibni anak Ginat jadi raja. Tapi aton kea je nahuang mangat Omri jadi raja.

²²Kajariae ewen je omba intu hila Omri, manang. Tibni matei tuntang Omri jadi raja.

²³Jete manjadi intu nyelo katelo puluh ije kahum Raja Asa marentah Yuda. Omri marentah kilau raja akan karajaan Israel due walas nyelo katahie. Katahin jahawen nyelo je solake ie marentah intu Tirsa.

²⁴Tapi limbah te ie mamili ije bukit, regae 6.000 perak bara ije biti oloh, arae Semer. Palus ie mamangun ije lewu intu hunjun bukit te tuntang manggare arae Samaria, manumon aran Semer, je tempon bukit te.

²⁵Omri mawi kare dosa je labih hai bara je ilalus awi kare raja je marentah helo bara ie.

²⁶Kilau Yerobeam, Omri badosa tuntang mambuku oloh Israel kea badosa tuntang manyembah dewa. Awi te ewen mampalembut kasangit TUHAN, Hatalla je musti inyembah awi oloh Israel.

²⁷Sarita je beken tahiu Raja Omri, tuntang uras taloh je jari ilaluse, jari incatet huang buku Sejarah Kare Raja Israel.

²⁸Limbah Omri matei tuntang ingubur intu Samaria, Ahab anake jadi raja mangganti ie.

²⁹Intu nyelo katelo puluh hanya kahum Raja Asa marentah Yuda, Ahab, anak Omri jadi raja akan karajaan Israel tuntang marentah intu Samaria due puluh due nyelo katahie.

³⁰Ie mawi kare dosa je labih hai intu tampayah TUHAN bara kare raja je helo bara ie.

³¹Hindai sukup kea akae belom badosa kilau Raja Yerobeam, ie kawin haream dengan Isebel anak Raja Etbaal bara Sidon, tuntang ie sombayang akan Baal.

³²Ie mampendeng huma sombayang intu Samaria akan Baal. Intu huang huma sombayang te ie manampa ije mesbeh akan dewa te.

³³Ie manampa kea hampatong Dewi Asera. Ie malalus labih are dosa bara je ilalus awi uras kare raja Israel je marentah helo bara ie. Tagal te ie mampalembut kasangit TUHAN, Hatalla je musti inyembah awi oloh Israel.

³⁴ Hong wayah Ahab marentah, lewu Yerikho impendeng haluli awi Hiel oloh Betel. Tapi kilau je jari insanan helo bara te awi TUHAN mahalau Yosua anak Nun, Hiel nihau due anake; Abiram je bakas matei metoh Hiel mampondok galang lewu; tuntang Segub je busu matei metoh Hiel mangkepan kare lawang lewu te.