Read Ngaju 1 RAJA-RAJA 17 Bible Online

1 RAJA-RAJA 17 - Ngaju bible

1 RAJA-RAJA 17

¹ Aton ije biti nabi arae Elia. Ie bara Tisbe, ije lewu intu wilayah Gilead. Sinde andau ie dumah manalih Raja Ahab tuntang hamauh, “Tagal TUHAN je belom, Hatalla je inyembah oloh Israel tuntang je ihaga awiku, aku mansanan akan Tuan iete katahin due atawa telo nyelo limbah toh, akan jaton ambon atawa ujan, aloh isut, amon aku jaton mansanae.”

²Limbah te TUHAN hamuh dengan Elia,

³“Keleh lihi eka toh, lius akan hila timor akan dipah Sungei Yordan tuntang keleh manyahokan arepm intu hete tokep anak Sungei Kerit.

⁴Ikau tau mihop bara anak sungei te. Aku akan manyoho burong kak mimbit panginan akam.”

⁵Elia manumon parentah TUHAN te tuntang haguet akan anak Sungei Kerit palus melai intu hete.

⁶Ie mihop danum bara anak sungei te, tuntang kuman rote dengan isin meto je imbit awi burong kak genep hanjewu tuntang genep halemei.

⁷Pire-pire katahie limbah te, anak sungei te keang awi jaton tinai ujan.

⁸Limbah te TUHAN hamauh dengan Elia,

⁹ “Toh ikau musti haguet akan lewu Sarpat, tokep Sidon tuntang melai intu hete. Aku jari manyoho ije biti balo intu hete mangat ie mampakanan ikau.”

¹⁰Palus Elia haguet akan Sarpat. Metoh sampai intu batonggang lewu te, ie mite ije biti balo kanjerae mamumpong kayu. Palus koan Elia dengan balo te, “Dohop duan akangku danum ihop isut.”

¹¹Metoh balo te magon mananjong uka manduan danum te, Elia mantehau, “Dohop imbit akangku rote kea.”

¹²Balo te tombah, “Tagal TUHAN je belom, Hatalla je inyembahm, aku sumpah je aku jaton mingkes rote. Aku baya aton ije karakop tepong gandom intu huang mangkok, tuntang isut undus saitun intu huang kasa. Aku magon mamumpong kayu hapa mampakasak taloh je isut te, mangat aku tuntang anakku tau kuman. Jete panginan ikei je pangkalepahe; limbah te ikei akan manunggu matei ih.”

¹³“Ela mikeh!” koan Elia dengae, “Keleh mawi panginan akam tuntang akan anakm. Tapi helo bara te tampa helo ije rote korik bara tepong tuntang undus te, tuntang imbit jete akan hetoh.

¹⁴Awi TUHAN, Hatalla je inyembah oloh Israel, mansanan je mangkok te harajur basuang tepong, tuntang kasa te akan harajur basuang undus sampai TUHAN mangirim ujan akan kalunen toh.”

¹⁵Palus balo te haguet mawi taloh je jari insanan Elia akae. Maka ewen telo aton taloh kinan je sukup, akan pire-pire andau katahie.

¹⁶Tuntang kilau je jari insanan TUHAN mahalau Elia, mangkok te harajur ih basuang tepong, tuntang kasa te mahin harajur basuang undus.

¹⁷Pire-pire katahie limbah te anak balo te buah kahaban. Sasar tahi sasar paham kahabae sampai ie matei.

¹⁸Palus koan balo te dengan Elia, “Rewar Hatalla, mbuhen ikau mawi taloh toh dengan anakku? En ikau dumah akan mambuku Hatalla mingat kare dosangku, sampai anakku musti matei?”

¹⁹Elia tombah, “Imbit anak te akan hetoh.” Palus Elia manduan anak hatue te bara indue, tuntang mimbite akan kamar hunjun, akan kamar je ielai Elia. Elia mampeter anak te intu hunjun eka batiroh.

²⁰Palus ie balakudoa hapan hai auhe, “O TUHAN, Hatallangku, mbuhen ikau mawi calaka toh akan balo toh? Ie jari sukup kajentae mahaga aku, tuntang toh ikau mampatei anake!”

²¹ Limbah te hantelo Elia mahingkep hunjun anak te, sambil balakudoa, “O TUHAN, Hatallangku, keleh mambelom anak toh!”

²²TUHAN mahining lakudoan Elia; anak te manampara manahaseng tuntang belom haluli.

²³Palus Elia mohon bara kamare sambil mimbit anak te akan indue tuntang hamauh, “Toh anakm, ie jari belom haluli!”

²⁴Balo te tombah, “Toh katawangku je ikau toh rewar Hatalla tuntang auhm puna toto bara TUHAN!”