Read Ngaju 1 RAJA-RAJA 19 Bible Online

1 RAJA-RAJA 19 - Ngaju bible

1 RAJA-RAJA 19

¹Raja Ahab manyarita akan sawae Isebel, tahiu kare taloh je jari ilalus awi Elia, kea tahiu kilen ampie Elia mampatei kare nabi Baal.

²Maka Isebel mangirim barita toh akan Elia, “Keleh kare dewa mahukum, mampatei aku haream, amon jewu intu katika kilau toh aku dia mawi ikau kilau ikau mawi kare nabi Baal te.”

³Elia mikeh, palus hadari mangat ie dia impatei. Ie haguet dengan ayange akan Berseba intu Yuda. Intu hete ie malihi ayange te.

⁴ Palus ie mananjong akan padang pasir katahin ije andau tuntang tende intu penda ije batang kayu je labat dawee. Intu hete ie mondok tuntang nahuang matei ih. “Aku dia olih tinai, TUHAN,” koae dengan TUHAN. “Duan hambaruangku. Aku dia labih bahalap bara tato hiangku!”

⁵Palus ie menter intu penda batang kayu te tuntang tapatiroh. Salenga ije biti malekat manigong ie tuntang hamauh, “Elia misik, kuman!”

⁶Elia mite hakalilinge, palus ie mite tokep ie ije rote bapapui tuntang kandi basuang danum. Ie palus kuman tuntang mihop, tuntang limbah te menter tinai.

⁷Akan tingkat je kaduee malekat TUHAN manigong ie tuntang hamauh, “Misik Elia, kuman mangat ikau tau tahan malalus jalanan je kejau.”

⁸Elia misik, palus kuman tuntang mihop. Ie balalu jadi abas tuntang tau mananjong epat puluh andau katahie akan bukit Sinai,[16] eka Hatalla mamparahan Arep.

⁹Intu hete Elia baramalem huang goha. Palus TUHAN hamauh dengae, “Elia, narai gawim intu hetoh?”

¹⁰ Elia tombah, “O TUHAN, Hatalla Je Jaton Tikas Kuasae, aku harajur bagawi baya akam bewei. Tapi ungkup Israel malangkah janjin ewen Dengam. Ewen mangarak kare mesbeh Aim tuntang mampatei kare nabi Ayum. Baya aku kabuat ih je batisa, tuntang toh ewen handak mampatei aku!”

¹¹“Keleh balua bara goha te,” koan TUHAN dengae, “tuntang keleh manaharep Aku intu hunjun bukit.” Palus TUHAN mahalau intu hete, inanselo awi riwut barat sampai kare bukit basila tuntang kare bukit batu je gantong bapusit. Tapi TUHAN dia mamparahan Arep huang riwut te. Limbah riwut te ranai, lembut gerek petak, tapi intu gerek petak te TUHAN dia mamparahan Arep.

¹²Limbah te dumah apui, tapi TUHAN jaton huang apui te. Limbah te kare taloh manjadi benyem tunis, palus tarahining ije auh je korik sini-sinik.

¹³Metoh Elia mahining auh te, ie manutup baue hapan jubahe, palus balua tuntang mendeng intu tumbang goha te. Palus tarahining auh je hamauh, “Elia, narai gawim intu hetoh?”

¹⁴Elia tombah, “O TUHAN, Hatalla Je Jaton Tikas Kuasae aku harajur bagawi baya akam bewei. Tapi ungkup Israel malangkah janjin ewen dengam. Ewen mangarak kare mesbeh Aim tuntang mampatei kare nabi Ayum. Baya aku kabuat je batisa, tuntang toh ewen handak mampatei aku!”

¹⁵ TUHAN hamauh, “Lius haluli akan padang pasir tokep Damaskus! Palus haguet akan lewu tuntang tusoh undus toh akan hunjun takolok Hasael kilau tanda ie ilantik jadi raja Siria.

¹⁶ Awi kalote kea akan Yehu anak Nimsi, mangat ie jadi raja Israel. Tuntang akan Elisa anak Sapat bara Abel-Mehola, mangat ie jadi nabi mangganti ikau.

¹⁷Eweh bewei je dia impatei awi Hasael, akan impatei awi Yehu, tuntang ewen je liwus bara Yehu akan impatei awi Elisa.

¹⁸ Tapi 7.000 oloh Israel akan inyalamat-Ku, iete kare oloh je tetep baketep dengang-Ku tuntang dia puji sontop manyembah hampatong Baal atawa manyium jete.”

¹⁹Elia palus haguet tuntang sondau Elisa je kanjerae maluku. Aton due walas kapasang sapi intu hila baue tuntang Elisa kabuat maluku mahapan pasang sapi je pangkalepe. Metoh Elia mahalau tokep Elisa, Elia mengkak jubahe tuntang mambirange akan hunjun bahan Elisa.

²⁰Palus Elisa malihi kare sapie tuntang hadari manggoang Elia, hayak hamauh, “Soho aku manabe oloh bakasku helo, limbah te aku akan manuntut ikau.” Tombah Elia, “Ayo. Aku dia mangahana ikau.”[17]

²¹Elisa haluli akan tanae palus manyambalih kare sapie. Kayu lukue ihapae akan pandok apui hapa mampakasak kare isin sapi te. Limbah te ie mambagi-bilah isin sapi te akan kare oloh ayue tuntang ewen kumae. Limbah te Elisa haguet manuntut Elia tuntang jadi pambantue.