Read Ngaju 1 RAJA-RAJA 2 Bible Online

1 RAJA-RAJA 2 - Ngaju bible

1 RAJA-RAJA 2

¹Metoh pampateie jari tokep, Dawid mantehau Salomo, anake, tuntang manenga kare petehe je pangkalepahe. Dawid hamauh,

²“Jari sampai katikae aku akan malihi kalunen toh. Keleh ikau percaya tuntang bahanyi.

³Keleh malalus taloh je irentah TUHAN, Hatallam dengam. Keleh manumon kakare atoran tuntang parentah Ayue je tarasurat huang Buku Moses, mangat akan kueh bewei ikau haguet, ikau akan bahasil huang kare gawim.

⁴Amon ikau manumon auh TUHAN, Ie akan manggenep janjin Aie, iete turonangku akan marentah Israel. Asal ewen hapan salepah atei tuntang salepah hambaruae harajur baketep manumon kare parentah Ayue.

⁵ Aton tinai ije perkara! Ikau musti mingat taloh je ilalus Yoab dengangku awie mampatei due perwira Israel, iete Abner anak Ner tuntang Amasa anak Yeter. Ie mampatei hong wayah kadamai akan mambaleh pampatei je ilalus ewen hong wayah parang. Ie mampatei oloh je dia basala, tapi toh aku je musti mananggong kajarian gawie tuntang aku je kapehe.[2]

⁶Toh, anakku, ikau musti mawi ie manumon taloh je inirokm bahalap; baya ela manalua ie matei manumon cara je patut.

⁷ Tapi taharep kare anak hatue ain Barsilai bara Gilead keleh ikau malalus gawi bahalap. Ikau musti manjamin taloh je imerlu ewen sining andau, awi ewen jari malalus taloh bahalap dengangku katika aku hadari bara kakam Absalom.

⁸ Tahiu Simei anak Gera bara lewu Bahurim intu tanah Benyamin, aton kea petehku dengam. Huang panjalanangku akan Mahanaim, Simei te bihin manyapa aku hapan auh je tulas. Tapi limbah te, ie dumah manduan aku intu Sungei Yordan. Aku basumpah dengae tagal TUHAN je aku dia akan mampatei ie.

⁹Tapi jetoh petehku akam: ela manalua ie lapas bara hukum. Aku katawan ikau pintar harati; jadi, aloh ie bakas, keleh manggau jalan ih mangat ie ihukum matei.”

¹⁰Limbah te Dawid matei tuntang ingubur intu Lewun Dawid.

¹¹ Ie jadi raja Israel katahin epat puluh nyelo katahie: uju nyelo ie melai intu Hebron, tuntang telo puluh telo nyelo intu Yerusalem.

¹² Limbah te Salomo manjadi raja mangganti Dawid, bapae. Kuasan Salomo kilau raja puna dehen toto.

¹³Sinde andau Adonia haguet manalih Batseba. Maka Batseba misek Adonia, “En kajam toh dengan kahandak bahalap?” “Yoh”, tombah Adonia.

¹⁴Palus ie mandahang auhe, “Aton taloh je handak ilakuku dengan ibu.” “Narai?” isek Batseba.

¹⁵Adonia tombah, “Ibu katawan je aku toh je sapunae jadi raja; jete jari iharap awi hapus oloh Israel. Tapi taloh je manjadi beken samasinde; andiku je jadi raja, awi TUHAN mangahandak kalote.

¹⁶Toh aton palakungku, keleh ibu ela manolake.”

¹⁷ “Narai taloh je ilakum?” pisek Batseba. Adonia tombah, “Aku balaku mangat ibu tau balaku dengan Raja Salomo uka manyoho aku kawin dengan Abisag, oloh bawi bara Sunem te. Aku percaya Salomo dia akan manolak palakun ibu.”

¹⁸“Yoh,” tombah Batseba. “Aku akan manahiu hal te dengan raja akam.”

¹⁹Palus Batseba haguet manalih raja handak manahiu taloh te akan Adonia. Raja mendeng manambang indue tuntang sontop intu taherepe, palus mondok hunjun padadusae tinai. Limbah te ie manyoho oloh manyadia karosi intu hila gantaue akan indue.

²⁰Limbah mondok, Batseba hamauh, “Aku handak balaku ije perkara korik ih dengam. Aku maharap ikau dia manolake.” “Narai te, mai?” pisek Salomo. “Aku dia akan manolak.”

²¹Batseba tombah, “Soho Adonia kakam te kawin dengan Abisag.”

²²“Mbuhen umai balaku taloh te dengangku?” pisek Salomo. “Jete sama ih dengan balaku mangat aku manenga tahta karajaan toh akae. En ie dia kakaku? Mahin tinai Imam Abyatar tuntang Yoab omba hong pihak ayue!”

²³Limbah hamauh kalote Salomo sumpah tagal TUHAN, “Keleh aku buah sapa bara TUHAN, amon aku dia mahukum matei Adonia awi palaku te!

²⁴TUHAN jari mandehen pondokku intu padadusan bapaku, Dawid. TUHAN jari manggenep janjin Aie tuntang jari manenga karajaan toh akangku tuntang turonangku. Aku sumpah tagal TUHAN je belom je Adonia akan matei andau toh kea!”

²⁵Palus Raja Salomo manenga parentah akan Benaya, tuntang Benaya haguet mampatei Adonia.

²⁶ Limbah te Raja Salomo hamauh dengan Imam Abyatar, “Lius haguet manalih lewu human ayum intu Anatot. Ikau patut ihukum matei, tapi andau toh aku dia handak mampatei ikau. Awi metoh ikau magon dengan bapaku, ikau omba mangkeme kare kapehe je buah ie. Tuntang ikau kea je manantuani Patin Janjin TUHAN te.”

²⁷ Palus Salomo mampaterai Abyatar kilau imam. Tagal gawin Salomo te taloh je jari insanan TUHAN intu Silo tahiu turonan Eli manjadi bakarinah.

²⁸Yoab mahining tahiu kare taloh je manjadi te. Ie mikeh awi ie omba pihak Adonia. Tapi bihin ie dia omba pihak Absalom, palus ie hadari akan Kemah TUHAN tuntang mimbing kare puting mesbeh.[3]

²⁹Barita toh inyampai akan Raja Salomo. Palus raja manyoho Benaya mampatei Yoab.

³⁰Benaya haguet akan Kemah TUHAN tuntang hamauh dengan Yoab, “Raja manyoho ikau balua bara hete!” “Dia,” tombah Yoab, “Aku handak matei intu hetoh.” Benaya haluli tuntang mansanan taloh te akan raja.

³¹Mahining auh te raja hamauh, “Lius tuntang lalus taloh je inyewute te. Patei ie tuntang ngubur ie, mangat aku tuntang hapus turonan bapaku dia mananggong tinai akan pampatei je iawi Yoab dengan oloh je jaton sala.

³²TUHAN akan mahukum ie tagal pampatei je jari iawie luar pangatawan bapaku. Abner perwira Isarael, tuntang Amasa perwira Yuda, kadaduee te uras jaton sala. Ewen labih bahalap bara Yoab kabuat, tapi Yoab mampatei ewen.

³³Hukum matei tagal pampatei due perwira te akan inanggong awi Yoab tuntang turonae palus katatahie. Tapi hapus turonan bapaku je jadi raja, harajur akan imberkat TUHAN. Ewen akan belom bontong batuah.”

³⁴Palus Benaya haguet akan Kemah TUHAN tuntang mampatei Yoab intu hete. Yoab ingubur intu humae hong luar lewu.

³⁵Limbah te raja mangkat Benaya jadi pangkalima parang karajaan mangganti Yoab, tuntang Sadok iangkat jadi imam mangganti Abyatar.

³⁶Limbah te raja mantehau Simei palus hamauh dengae, “Tampa huma akan arepm hong Yerusalem toh. Keleh melai intu hetoh tuntang ela balua bara lewu.

³⁷Amon ikau bahanyi tuntang haguet mahalau Sungei Kidron, ikau musti impatei; tuntang ikau kabuat je mananggong kasalan te.”

³⁸“Yoh, Tuan Raja,” tombah Simei, “Aku akan manumon parentah Tuan Raja.” Palus Simei melai intu Yerusalem.

³⁹Limbah telo nyelo palus manjadi taloh toh: Due biti rewar Simei hadari akan Gat, manalih Raja Akhis anak Maakha. Katika oloh mansanan akan Simei tahiu hal te,

⁴⁰ie mangekepan lapik pondoke hunjun kalidaie palus haguet manalih Raja Akhis intu Gat uka manggau due reware te. Ie sondau ewen palus mimbit ewen buli.

⁴¹Metoh Salomo mahining taloh je iawi Simei,

⁴²ie manyoho oloh mantehau Simei palus hamauh, “Aku jari balaku ikau hajanji tagal TUHAN je ikau dia akan malihi Yerusalem. Tuntang aku kea jari mampingat ikau amon ikau balua bara Yerusalem, ikau musti matei. Ikau jari hajanji tuntang handak manumon parentah te, en dia kalote?

⁴³Tapi toh mbuhen ikau malangkah janjim tuntang parentahku te?

⁴⁴Ikau katawan toto kare kapapam taharep bapaku. Awi te kareh TUHAN mahukum ikau.

⁴⁵Tapi aku akan imberkat Awie tuntang karajaan bapaku kareh indehen Awie sampai katatahie.”

⁴⁶Limbah hakotak kalote, raja manenga parentah akan Benaya palus Benaya tolak mampatei Simei. Palus Salomo mimbing salepah kuasa hong karajaan te.