Read Ngaju 1 RAJA-RAJA 20 Bible Online

1 RAJA-RAJA 20 - Ngaju bible

1 RAJA-RAJA 20

¹Sinde andau Benhadad raja Siria, mamumpong hapus tantarae. Hayak dengan 22 raja beken dengan kareta parang, tuntang kuda ain ewen, ie mangapong tuntang manyarang lewu Samaria.

²Palus ie manyoho oloh akan Ahab, raja Israel intu lewu dengan peteh kalotoh,

³“Raja Benhadad balaku mangat ikau manyarah akae amas, perak, kare sawam tuntang kare anakm je aba-abas.”

⁴Ahab tombah, “Sanan akan Benhadad je aku nahuang. Ie tau manduan aku tuntang hapus kare taloh ayungku.”

⁵Limbah te kare sarohan te haluli manalih Ahab uka manyampai taloh laku je beken bara Benhadad. Kalotoh auh taloh laku te, “Bihin rajan ikei balaku mangat ikau manjulok akae amas, perak, tuntang kare sawam dengan kare anakm,

⁶Tapi toh ie handak manyoho kare perwira uka mariksa istanam tuntang human kare pagawai ayum, hayak manduan en bewei je tumon tirok ewen barega. Ewen dumah akan hetoh andau jewu katika lakau kilau toh.”

⁷Palus Raja Ahab mantehau uras pamimpin Israel tuntang hamauh, “Keton mite kabuat je oloh toh handak mancalaka itah. Ie balaku mangat aku manyarah kare sawangku tuntang kare anakku dengan kare amas perakku, tuntang aku dia manolak palakue te.”

⁸Kare pamimpin rayat hamauh, “Ela paduli auhe, Tuan Raja! Ela manumon kahandake.”

⁹Awi te Ahab manombah kare sarohan te kalotoh, “Sanan akan Tuan Raja, rajan keton te, je aku manarima taloh lakue je solake, tapi taloh lakue je kaduee toh dia tau aku manarimae.” Palus kare sarohan te haguet, limbah te ewen haluli tinai manalih Ahab tuntang hamauh,

¹⁰“Rajan ikei akan mangirim are toto tantara uka mampahancor lewum, sampai kawo bara kare kehun lewum te tau iimbit ewen lepah hapan lengen ewen. Ie sumpah uka kare dewa mahukum, mampatei ie haream, amon ie dia malalus taloh te!”

¹¹Raja Ahab tombah, “Sanan akan Raja Benhadad: Tantara je bujur akan mangkeme tamam amon limbah parang, dia helo bara te.”

¹²Auh tombah Ahab te inyampai akan Benhadad metoh ie hayak kare raja beken je jari imakate metoh rami mihop huang eka kare kemah ewen. Mahining auh te Benhadad marentah kare perwirae uka tatap manyarang lewu Samaria. Palus ewen batatap.

¹³Pandehan te ije nabi haguet manalih Raja Ahab tuntang hamauh, “TUHAN hamauh: ‘En gitam tantara je are te? Aku akan manenga akam kamanang hunjun ewen andau toh. Ikau akan katawan je aku TUHAN!’ ”

¹⁴“Eweh je musti manyarang labih helo?” pisek Ahab. Nabi te tombah, “Kare tantara je tabela, je manuntut kare pamimpin daerah. Kalote koan TUHAN!” “TUHAN, eweh je musti mamimpin gawi manyarang te?” raja misek tinai. “Tuan Raja kabuat,” tombah nabi te.

¹⁵Palus raja mirak kare tantara tabela je manunutut kare pamimpin daerah. Samandiaie aton 232 prajurit. Limbah te ie mawie kalote kea dengan tantara Israel. Samandiaie aton 7.000 biti.

¹⁶Gawi manyarang te ilalus katika handau metoh Benhadad dengan telo puluh due raja je jari imakate te kanjerae rami mihop sampai babusau intu kemah ewen.

¹⁷Je miar labih helo iete kare tantara je tabela te. Kare oloh je inyoho Benhadad uka mimpa musoh, mansanan akan Benhadad ije kalompok tantara metoh manalih ewen bara hila Samaria.

¹⁸Benhadad marentah mangat kare tantara musoh te inawan belo-belom, dia paduli en ewen dumah handak parang atawa handak damai.

¹⁹Kare tantara tabela je irak awi Raja Ahab te nampara miar bara lewu Samaria, inuntut awi tantara Israel.

²⁰Genep bitin ewen mampatei musoh je inaharepe. Kare oloh Siria hadari, inggoang awi oloh Israel. Tapi Benhadad liwus. Ie hadari mahapan kuda impahayak pire-pire bara kare tantara bakuda.

²¹Raja Ahab kea sewu akan eka parang palus mampahancor kare kareta parang tuntang mampatei kare kuda. Hong andau te oloh Siria mandino kakalah je hai.

²²Limbah te nabi te dumah manalih Ahab hayak hamauh, “Toh keleh ikau buli tuntang mampaabas arepm hayak manampa rencana je buah. Siria akan dumah manyarang tinai huang wayah kambang je rahian.”

²³Kare perwira Raja Benhadad hamauh dengan Benhadad, “Kare Hatalla je inyembah bangsa Israel kuasa intu kare bukit, jete bukue itah tau impakalah awi bangsa te. Tapi itah musti tau mampakalah ewen hong petak rampar.

²⁴Keleh toh Tuan Raja mangganti telo puluh due raja te dengan kare perwira Tuan Raja kabuat.

²⁵Limbah te keleh Tuan Raja mirak pasukan Tuan Raja sama kahaie kilau pasukan Tuan Raja je jari impakalah te, impahayak kuda tuntang kareta parang sama karee tumon je helo te kea. Itah akan mamarang bangsa Israel te intu petak rampar, tuntang sinde toh itah pasti manang.” Raja Benhadad satuju, palus manumon auh nasehat kare perwirae te.

²⁶Intu wayah kambang je rahian ie mirak tantarae tuntang miar akan lewu Apek uka manyarang oloh Israel.

²⁷Oloh Israel kea manyadia tantarae tuntang mirak ewen. Palus tantara Israel te miar hong due pasukan tuntang bakemah hataharep dengan oloh Siria te. Inanding dengan tantara Siria je tayap kalombahe sampai mangontep daerah te, pasukan Israel gitan kilau due kakawan kambing bewei.

²⁸Palus ije biti nabi dumah manalih Raja Ahab tuntang hamauh, “Jetoh je insanan TUHAN: ‘Awi kare oloh Siria te manirok je Aku baya aton kuasa intu kare bukit tuntang dia intu petak rampar, maka Aku akan manenga kamanang akam hunjun kare tantara ewen je dia laluen karee te. Ikau tuntang rayatm akan katawan je Aku toh TUHAN.’ ”

²⁹Katahin uju andau oloh Siria tuntang Israel tetep melai huang eka kare kemah ewen, tuntang hataharep. Hong andau je kaujue ewen nampara mawi sarangan. Huang parang te oloh Israel mampatei 100.000 oloh Siria.

³⁰Kare oloh je liwus hadari akan lewu Apek, tapi dinding lewu te baderep mantakan 27.000 biti marak ewen. Benhadad kea hadari akan lewu te tuntang manyahokan arepe intu ije huma, hong kamar hila huang.

³¹Kare perwira dumah manalih ie tuntang hamauh, “Koan oloh, kare raja Israel te uras oloh je pamasi. Awi te, soho ikei manaharep raja Israel mangkepan tapih karong kilau tanda kanyasal tuntang tali intu uyat kilau tanda kalah. Keleh jaka ie dia mampatei Tuan Raja.”

³²Palus ewen mangkepan tapih karong tuntang tali intu uyat ewen, palus haguet manaharep Ahab tuntang hamauh, “Benhadad te rewar Tuan Raja. Ie balaku mangat Tuan Raja ela mampatei ie.” Ahab tombah, “En magon belom paharingku te?”

³³Puna kare perwira Benhadad te metoh mentai tanda je bahalap bara Ahab. Jadi metoh Ahab hamauh “pahari”, ewen balalu tombah “Toto, Benhadad te paharin Tuan Raja.” Palus koan Ahab, “Imbit ie akan hetoh!” Metoh Benhadad dumah, Ahab mimbit ie mandai kareta.

³⁴Palus koan Benhadad dengae, “Aku akan malian akan Tuan kare lewu je jari irabut bapaku bara bapa Tuan. Tuan tau kea mampendeng eka badagang intu lewu Damaskus kilau je ilalus bapaku intu Samaria.” Tombah Ahab, “Hagalang janjin Tuan te, aku akan malapas Tuan.” Limbah te Ahab manampa janji dengan Benhadad palus malapas ie.

³⁵Hapan parentah TUHAN ije biti nabi bara marak ije kalompok nabi manyoho kawale mamukul ie. Tapi kawale te dia maku.

³⁶ Palus nabi te hamauh, “Awi ikau dia manumon parentah TUHAN, ikau akan inangkarap singa sana ikau buli bara hetoh.” Sana ie haguet bara hete, ie inangkarap awi ije kongan singa.

³⁷Limbah te nabi te haguet manalih oloh beken tuntang hamauh, “Pukul aku.” Palus oloh te mamukul ie paham toto sampai ie bahimang.

³⁸Limbah te nabi te mameteng himange dengan benang, mangat dia kasenan oloh, palus ie haguet mendeng intu saran jalan mentai raja Israel mahalau.

³⁹Metoh raja mahalau, nabi te mantehau ie, “Tuan Raja, metoh aku kalahi intu eka parang, ije biti tantara mimbit akangku ije biti musoh je buah singkap. Tantara te hamauh, ‘Jaga oloh toh bua-buah. Amon ie hadari, ikau musti impatei mangganti ie atawa mambayar 3.000 duit perak!’

⁴⁰Tapi limbah te metoh aku deroh, oloh te hadari.” Raja tombah, “Ikau jari mamutus hukuman akam kabuat. Ikau musti mananggonge.”

⁴¹Nabi te malapas benang pameteng bara baue palus raja kasene ie kilau ije biti nabi.

⁴²Palus nabi te hamauh dengan raja, “Jetoh je insanan TUHAN: ‘Oloh je irentah-Ku mangat impatei, jari inaluam liwus. Awi te ikau musti matei gantie. Tantara ayum akan hancor awi jari manalua tantara musoh hadari.’ ”

⁴³Raja buli akan Samaria marak ateie manyasal tuntang balait.