Read Ngaju 1 RAJA-RAJA 21 Bible Online

1 RAJA-RAJA 21 - Ngaju bible

1 RAJA-RAJA 21

¹Tokep istana ain Raja Ahab intu Yisreel aton ije kabindang kabon anggor ayun oloh je bagare Nabot.

²Sinde andau Ahab hamauh dengan Nobat, “Tenga akangku kabon anggor te, awi kabon te tokep dengan istanaku. Aku handak mimbul kare sayur intu hete. Ikau akan mandino kabon anggor je labih bahalap akan gantie. Atawa amon ikau maku aku akan mamili kabon toh bara ikau hapan rega je patut.”

³Nobat tombah, “Kabon anggor te warisan tato hiangku. Tagal Hatalla, aku dia tau manenga akan Tuan Raja!”

⁴Hapan atei je manyasal tuntang balait awi mahining taloh je insanan Nabot akae, Ahab buli palus menter hong ekae batiroh hayak mules baue manalikut tuntang dia maku kuman.

⁵Isebel sawae manalih ie tuntang misek, “Mbuhen ikau sangit? Mbuhen ikau dia maku kuman?”

⁶Ahab tombah, “Aku dia sanang dengan Nabot. Aku balaku dengae mangat ie manjual kabon anggore akangku, atawa aku manakirie hapan kabon anggor beken, amon jete je ingahandake, tapi ie dia maku kea!”

⁷“En dia ikau toh raja Israel?” Tombah Isebel. “Hingkat toh tuntang kuman. Nyanang ateim, awi aku akan manenga kabon anggor Nabot te akam!”

⁸Palus Isebel manampa surat mahapan aran Ahab tuntang mawi cap raja intu surat te. Surat te ingirime akan kare pamimpin tuntang kare bakas lewu intu Yisreel.

⁹Jetoh auh surat je inampa Isebel te, “Nampa pansanan uka rayat puasa tuntang soho ewen hapumpong! Hong pumpong te, tenga akan Nabot eka mondok je ihormat.

¹⁰Soho due biti oloh papa mondok manaharep ie tuntang mandawa ie je ie jari manyapa Hatalla tuntang raja. Palus imbit ie akan luar lewu, tuntang manting ie hapan batu sampai matei!”

¹¹Parentah Isebel te ilalus awi kare pamimpin tuntang kare bakas lewu Yisreel.

¹²Ewen mansanan mangat rayat puasa. Limbah te ewen manyoho oloh hapumpong tuntang Nabot inenga eka je ihormat.

¹³Due oloh papa mondok hataharep dengan Nabot, tuntang intu taharep oloh are, ewen mandawa ie jari manyapa Hatalla tuntang raja. Awi te imbit ie akan luar lewu palus imanting hapan batu sampai matei.

¹⁴Barita tahiu mampatei Nabot inyampai akan Isebel.

¹⁵Sana Isebel manarima barita te, ie hamauh dengan Ahab, “Nabot jari matei. Toh lius duan kabon anggor te je dia ie maku manjuale akam.”

¹⁶Ahab bagulong haguet tuntang manduan kabon anggor te akae kabuat.

¹⁷Palus koan TUHAN dengan Elia, nabi bara Tisbe te,

¹⁸“Ahab, raja Samaria te, toh aton intu kabon anggor Nabot handak manduan kabon te akae kabuat. Jadi, lius haguet akan hete,

¹⁹tuntang nyampai akae je Aku, TUHAN, hamauh kalotoh, ‘Jari mampatei, marabut tinai! Awi te daham akan injelap aso intu eka kare aso manjelap dahan Nabot!’ ”

²⁰Metoh Ahab mite Elia, ie hamauh, “O musoh, kajariae ikau mandino aku!” “Toto,” tombah Elia. “Awi Tuan jari himat atei mawi taloh je papa intu tampayah TUHAN,

²¹maka jetoh ie taloh je insanan TUHAN akam. ‘Aku akan mawi calaka akam. Ikau akan inganan, tuntang genep oloh hatue intu keluargam, bakas tabela, akan impalomos-Ku.

²²Keluargam akan jadi sama kilau keluarga ain Raja Yerobeam anak Nebat tuntang kilau keluarga Raja Baesa anak Ahia, tagal ikau jari mawi sabab oloh Israel mawi dosa, sampai mawi kasangit-Ku.’

²³ Tuntang tahiu Isebel, TUHAN hamauh je bitin ayue akan kinan aso intu lewu Yisreel.

²⁴Eweh bewei bara anggota keluargam je matei intu lewu kareh kinan aso, tuntang je matei intu luar lewu akan kinan burong.”

²⁵Dia puji aton oloh je hapan himat ateie mawi taloh je papa intu tampayah TUHAN kilau je jari ilalus awi Ahab. Uras kare kapapa te ilalus awi sohon Isebel, sawan Ahab.

²⁶Ahab mawi kare dosa je papa toto; ie manyembah dewa kilau je ilalus awi oloh Amori, iete kare oloh je jari iharak TUHAN balua bara lewu Kanaan katika oloh Israel tame lewu te.

²⁷Limbah Elia lepah hakotak, Ahab marabit pakaiae tuntang mangkepan tapih karong kilau tanda kanyasal palus puasa. Hong katika batiroh kea ie mahapan tapih karong. Tuntang amon mananjong, baue harajur masem.

²⁸TUHAN hamauh dengan nabi Elia,

²⁹“En jari gitam kilen ampie Ahab mamparandah arepe intu taharep-Ku? Awi te Aku dia akan mawi calaka katahin ie magon belom. Hong wayah anake marentah harue Aku mawi calaka te akan keluargae.”