Read Ngaju 1 RAJA-RAJA 3 Bible Online

1 RAJA-RAJA 3 - Ngaju bible

1 RAJA-RAJA 3

¹Raja Salomo mawi Misir manjadi pakat dengae, awie kawin dengan putri raja Misir. Putri te iimbit Salomo akan Lewun Dawid uka melai intu hete sampai istana raja tuntang Human TUHAN dengan kota hakaliling Yerusalem jari imangun.

²Awi Human TUHAN hindai imangun metoh te, rayat magon maluput parapah intu are eka.

³Salomo sinta TUHAN tuntang manumon kare atoh bapae, tapi ie magon manyambalih tuntang maluput meto parapah intu are eka.

⁴Eka sombayang je paling basewut aton hong Gibeon. Salomo kinjap maluput parapah intu hete. Sinde andau kilau bahut ie haguet akan hete tinai.

⁵Alem te TUHAN mamparahan arepe akae huang nupi tuntang hamauh, “Salomo, laku taloh je ingahandakm, jete kareh je inengaku akam!”

⁶Salomo tombah, “TUHAN, Ikau jari mamparahan je Ikau paham sinta bapaku Dawid rewar Ayum te. Ie bahalap, bujur hayak baketep Dengam. Tuntang akan katoton gawi je katatahie Ikau sinta ie, Ikau manenga ije anak je toh marentah mangganti ie.

⁷O TUHAN Hatallangku, Ikau mangkat aku jadi raja mangganti bapaku, aloh aku magon tabela toto tuntang dia katawan kilen carae marentah.

⁸Aku aton hong bentok bangsa je jari iintih Awim akan bangsa Ayum kabuat. Ewen toh aton ije bangsa je hai je dia tarise karee,

⁹awi te, TUHAN, tenga akangku kapintar kaharati je inggauku akan marentah ungkup Ayum toh hapan kabujur tuntang katetek. Iete kapintar je tau mangasene taloh je bahalap tuntang taloh je papa. Amon dia kalote, kueh tau aku marentah ungkup Ayum je hai toh?”

¹⁰TUHAN sanang dengan palakun Salomo te.

¹¹Ie hamauh dengae, “Awi ikau balaku kapintar kaharati hapan marentah dengan bujur tuntang adil, tuntang ikau dia balaku umur panjang atawa panatau akan arepm kabuat atawa kea pampatei akan kare musohm,

¹²maka palakum te akan inenga-Ku. Aku akan mawi ikau labih pintar harati tuntang labih are pangatawam bara eweh bewei, aloh intu wayah je halau aloh wayah je akan dumah rahian.

¹³Taloh je dia ikau balakue mahin akan inengaku akam, hapus pambelom ayum ikau akan mandino panatau tuntang hormat labih bara kare raja beken je kueh bewei.

¹⁴Tuntang amon ikau, kilau bapam Dawid, manumon auh-Ku hayak malalus kare parentah-Ku, Aku akan manenga akam umur panjang.”

¹⁵Limbah misik, Salomo katawan je Hatalla jari hamauh dengae huang nupi. Maka ie haluli akan Yerusalem palus mendeng intu baun Patin Janjin TUHAN tuntang maluput parapah je ingehu tuntang parapah hapa badamai. Limbah te ie mawi pesta akan kakare pagawaie.

¹⁶Sinde andau due biti oloh bawi lontei dumah manaharep Salomo.

¹⁷Ije bara ewen te hamauh, “Tuan Raja, aku dengan oloh bawi toh melai ije kahuma. Ije mahin jaton oloh beken je melai dengan ikei. Pire-pire katika je halau, aku manak ije biti anak hatue. Due andau limbah te oloh bawi toh manak ije biti anak hatue kea.

¹⁹Sinde alem, metoh ikei batiroh, oloh bawi toh dia tantai ihate menyet awau te sampai matei.

²⁰Bentok alem metoh aku batiroh, ie misik palus manduan anak awau ayungku bara balikatku. Awauku te iandake intu ekae batiroh. Awau ayue je jari matei iandake intu ekaku batiroh.

²¹Andau jewue, metoh aku misik tuntang handak mampatuso nanakku te, gitangku ie jari matei. Limbah aku manantuanie toto-toto, ampie awau te beken anak ayungku.”

²²“Tanjaroe!” koan oloh bawi je beken te, “Je belom toh awau ayungku, je matei te awau ayum!” “Dia!” tombah oloh bawi je solake te. “Je matei te awau ayum, je belom te awau ayungku!” Kalote ewen habantah intu taharep raja.

²³Palus koan Raja Salomo, “Genep bitin keton mangaku je awau je belom toh anak keton tuntang awau je matei te beken anak keton!”

²⁴Limbah hamauh kalote raja manyoho oloh manduan padang.

²⁵Limbah te raja marentah, “Netek awau je belom te jadi due katetek tuntang tenga ije katetek akan genep bitin oloh bawi te.”

²⁶Mahining auh parentah te, indu je toto ain anak awau te hamauh, “Ampun, Tuan Raja ela mampatei anak te. Tenga ih akae. Ibu te hamauh kalote awi ie paham sinta anake. Tapi bawi je beken te hamauh, “Yoh, tetek ih, nauhe ih mangat ije mahin jaton bara ikei je dinoe!”

²⁷Palus Salomo hamauh, ela mampatei awau te! Sarah akan oloh bawi je solake te — ie te indue je bujur.”

²⁸Metoh bangsa Israel mahining auh gawin Salomo huang pakara te, ewen jungon tuntang hormat dengae. Awi, ampie Hatalla jari manenga akae kapintar kaharati mangat mamutus hapan kaadilan.