Read Ngaju 1 RAJA-RAJA 5 Bible Online

1 RAJA-RAJA 5 - Ngaju bible

1 RAJA-RAJA 5

¹Hiram, raja Tirus, harajur hasobat dengan raja Dawid. Katika Hiram mahining Salomo jari manjadi raja mangganti Dawid, bapae, ie mangirim sarohan akan Salomo.

²Palus Salomo kea mangirim peteh akan Hiram,

³“Raja Hiram je paham ihormat! Batantu tuan mangatawan je bapaku Dawid harajur imaksa parang awi inyarang musoh bara kare lewu tokep ikei. Tuntang awi TUHAN hindai manenga kamanang akae bara kare musohe, ie hindai sampet mampendeng huma eka sombayang intu TUHAN, Hatallae.

⁴Tapi toh TUHAN, Hatallangku jari manenga kasanang akan hapus wilayah je inguasaku. Aku dia aton musoh, tuntang jaton kea calaka je buah lewungku.

⁵ TUHAN jari hajanji kalotoh dengan bapaku Dawid, ‘Anakm je akan iangkat-Ku jadi raja mangganti ikau akan mamangun huma eka sombayang akang-Ku.’ Awi te, aku Salomo jari mamutus uka mamangun huma te.

⁶Tuan jari katawan je marak rayatku jaton ije oloh je tau maneweng batang kayu kilau rayat Tuan. Awi te, aku balaku Tuan manyoho kare oloh ain Tuan maneweng kare batang cemara Libanon akangku. Rayatku akan inyohoku mandohop ewen; pire bewei upah je inukas Tuan akan kare oloh ain Tuan te, aku akan mambayare.”

⁷Hiram sanang toto ateie katika manarima barita te, “Tara akan TUHAN andau toh, awi ie manenga akan Dawid ije biti anak je paham pintar harati uka jadi raja akan bangsa je hai te.”

⁸Palus Hiram mangirim auh tombah toh akan Salomo, “Aku jari manarima barita tahiu taloh je ilaku Tuan, tuntang aku tatap manenga taloh je ilaku Tuan. Aku akan manyadia kayu cemara Libanon tuntang kayu cemara toto tumon palakun Tuan.

⁹Kare oloh ayungku akan mimbit kayu te mohon bara Libanon akan tasik. Intu hete kare batang kayu te akan imeteng jadi lanting. Kareh ewen mampahantonge manasaran pantai akan eka je inukas awi Tuan. Intu hete kare lanting te akan ingarak tuntang inyarah akan kare oloh ain Tuan uka manuntong gawi te. Bara pihak Tuan aku akan balaku uka Tuan manyadia panginan, akan kare oloh hong istana ayungku.”

¹⁰Palus Hiram manenga akan Salomo kakare kayu cemara Libanon tuntang kayu cemara je toto tumon kanahuange.

¹¹Tuntang akan mampakanan, kakare oloh istana Hiram te, genep nyelo Salomo manyarah akan Hiram 322.000 kilogram gandom tuntang 4.400 liter[5] undus saitun tulen.

¹²TUHAN manggenep janjin Aie tuntang manenga kapintar kaharati akan Salomo. Bara marak raja Hiram dengan Salomo aton hubungan je bahalap, tuntang ewen due jari mawi peteng janji.

¹³Raja Salomo mimbit 30.000 oloh hatue bara hapus Israel akan malalus gawi paksa.

¹⁴ Ie mangkat Adoniram manjadi pangawas ewen. Salomo mambagi ewen hong telo kalompok, gagenepe aton sapuluh koyan biti. Telo kalompok te hagilir melai ije bulan intu Libanon tuntang due bulan intu huma.

¹⁵Salomo mimbit kea 80.000 biti oloh akan mamahat batu bara bukit tuntang 70.000 biti oloh je akan meton kare batu te.

¹⁶Ie mangkat 3.300 mandor uka manantuani gawi te.

¹⁷Hapan parentah ayue kea ewen mamahat kare batu hai je bahala-halap akan galang Human TUHAN.

¹⁸Kalote kare oloh je bagawi ain Salomo tuntang kare oloh ain Hiram dengan kare oloh bara lewu Gebal manatap batu tuntang kayu akan pangun Human TUHAN te.