Read Ngaju 1 RAJA-RAJA 6 Bible Online

1 RAJA-RAJA 6 - Ngaju bible

1 RAJA-RAJA 6

¹Salomo manampara mamangun Human TUHAN hong bulan Siw, iete bulan kadue hong nyelo kaepat pamarentah ayue, 480 nyelo limbah bangsa Israel malihi Misir.

²Ukuran Human TUHAN, hila huange iete kalotoh: kapanjange 27 meter, kalombahe 9 meter, tuntang kagantonge 13,5 meter.

³Intu hila baun Human TUHAN te aton balai je kapanjange 4,5 meter tuntang kalombahe 9 meter, sama kilau kalombah huma te kea.

⁴Intu dinding huma te aton kare rumbak basengok je sasar lombah akan hila huang.

⁵Hakaliling hila likut huma te, intu dinding hila luare imangun kamar hasusun. Aton telo kasusun, gagenep susue kagantonge 2,2 meter.

⁶Hong susun je solake, kalombah genep kamare 2,2 meter. Hong susun je kaduee 2,7 meter. Tuntang hong susun je kateloe 3,1 meter. Dinding susun je hila penda labih bakapal bara dinding susun je hila hunjue, sampai kare balok kamar je hila likut te tau inontong dengan dinding Human TUHAN te aloh dia usah marumbak dinding te.

⁷Kare balok te inampa bara kayu cemara Libanon. Bauntonggang jalan tame akan kare kamar je hila likut intu susun je hila penda aton intu hila salatan. Akan susun je kaduee tuntang susun je kateloe aton tangga je bili-bilit. Limbah te Salomo mangkepan loteng huma te, je mahapan kare gahagan tuntang kare papan bara kayu cemara Libanon. Katahin huma te imangun samasinde dia tarahining auh tukul, kapak atawa pakakas sanaman. Awi, kare batu je ihapan akan pangun te jari inatap labih helo metoh magon intu eka kare tambange. Kalote Salomo mamangun Human TUHAN te sampai jadi.

¹¹Palus TUHAN hamauh dengan Salomo,

¹²“Amon ikau manumon auh kakare atoran tuntang parentah-Ku, Aku akan mawi akam taloh je jari injanji-Ku dengan bapam Dawid.

¹³Aku akan melai intu huang huma je imangun intu bentok ungkup-Ku Israel. Aku dia akan malihi ewen.”

¹⁴Kalotoh ampin Salomo mahapus pangun Human TUHAN te:

¹⁵Hapus dinding hila huange ilapise hapan kayu cemara Libanon, nampara bara lasehe sampai akan lotenge. Lasehe inampa bara kayu cemara je toto.

¹⁶ Intu huang huma te, intu hila likut, inampa kamar je mahapan dinding pamisah bara kayu cemara, nampara bara laseh sampai lotenge. Kamar te inggare Kamar Ije Barasih Haliai; kapanjange jalatien meter.

¹⁷Kamar intu baun Kamar Ije Barasih Haliai te inyewut Kamar Hai je kapanjange 18 meter.

¹⁸Dinding hila huang akan hapus huma te ilapis hapan kayu cemara Libanon, sampai kare batu je akan dindinge dia gitan samasinde. Lapisan dinding te ihias hapan ukiran bua baloh tuntang kare kambang je burai.

¹⁹Kamar Ije Barasih Haliai je inampa intu huang Human TUHAN te inatap akan Patin Janjin TUHAN.

²⁰ Kamar te, kapanjange, kalombahe tuntang kagantonge sama iete jalatien meter. Mesbeh intu hila baun Kamar Ije Barasih Haliai te inampa bara kayu cemara Libanon. Intu batonggang tame akan kamar te iniring rantai amas. Hapus eka huang Human TUHAN te tatame kea Kamar Ije Barasih Haliai tuntang mesbeh, ingalukop hapan amas tulen.

²³ Intu huang Kamar Ije Barasih Haliai te ina kea due hampatong kerub[6] je inampa bara kayu saitun. Kadadue hampatong te, gagenepe 4,4 meter kagantonge;

²⁴ukurae tuntang pangue sama ampie, genep hampatong te aton due palapase, genep palapas te 2,2 meter kapanjange. Kakejau helat due tapakan palapas bara genep hampatong aton 4,4 meter.

²⁷Due hampatong te ina habambai intu huang Kamar Ije Barasih Haliai sampai ije bara palapas bara gagenep hampatong te santok dinding. Palapas je beken hatigong intu bentok kamar te.

²⁸Due hampatong kerub te ingalukop hapan amas.

²⁹Hapus dinding hila huang Human TUHAN ihias hapan ukiran kare kerub, kare batang korma, tuntang kare kambang je burai.

³⁰Laseh intu huang Human TUHAN te urase ingalukop hapan amas.

³¹Huang batonggang tame akan Kamar Ije Barasih Haliai te ingkepan due atep batonggang bara kayu saitun. Papan batonggang hila hunjue inampa pangue satengah bunter tapi batajim isut hila bentoke.

³²Due atep batonggang te ihias hapan ukiran kerub, batang korma tuntang kambang je burai. Atep batonggang, hampatong kerub, tuntang ukiran kare batang korma, urase ingalukop hapan amas.

³³Intu batonggang tame akan huang kamar hila baun, iete kamar hai, ingkepan bingkai batonggang bara kayu saitun, pangue lapak epat panjang.

³⁴Inampa kea due atep lawang bara kayu cemara je gagenepe tau ilipet.

³⁵Kare atep batonggang te ihias hapan ukiran kerub, batang korma, tuntang kambang je burai. Kakare ukiran te hakalukop amas.

³⁶Intu hila baun Human TUHAN te inampa parantaran huang. Parantaran te ingaliling dinding je hatila-tilap: intu hunjun genep telo tilap batu, aton ije tilap kayu cemara Libanon.

³⁷Galang Human TUHAN te ingkepan hong bulan Siw, iete bulan kaduee, hong nyelo kaepat pamarentah Salomo.

³⁸Tuntang hong bulan Bul, iete bulan kahanyae, hong nyelo kasawalas pamarentah ayue, Human TUHAN te jari hapus imangun awi Salomo, kilau je jari irencanae. Pangun huma te katahie uju nyelo.