Read Ngaju 1 RAJA-RAJA 7 Bible Online

1 RAJA-RAJA 7 - Ngaju bible

1 RAJA-RAJA 7

¹Salomo mamangun kea istana akae kabuat. Gawin pangun istana te katahie telo walas nyelo.

²Intu huang istana te Salomo manampa kamar je inyewut “Balai Himba Libanon”.[7] Ukurae: kapanjange 44 meter, kalombahe 22 meter, tuntang kagantonge 13,5 meter. Balai te aton telo kabaris jihie bara kayu cemara Libanon; genep baris aton lime walas jihi tuntang intu hunjue ingkepan kare gahagan bara kayu cemara. Lotenge inampa bara kayu je sama tuntang manutup kare gahagan te.

⁴Intu dinding hila sambil tuntang hila gantau balai te aton kare basengok telo kabaris intu dinding je ije hataharep dengan telo kabaris intu dindinge je beken. Bingkai kare batonggang tuntang kare basengoke pangue lapak epat panjang.

⁶Salomo kea mamangun “Balai Jihi”. Kapanjang balai te 22 meter, tuntang kalombahe 13,5 meter. Intu baun balai te aton tambiran je hajihi tuntang hatangga.

⁷Balai je beken iete “Balai Padadusan” je inyewut kea Balai Basara. Balai te bara laseh sampai kare gahagan inantilap hapan kayu cemara. Intu balai toh Salomo mamutus kare pakara.

⁸ Eka Salomo melai inampa kilau kare pangun je beken, tuntang jete aton intu tambiran beken huang likut Balai Basara. Akan sawae, iete putri raja Misir, Salomo mamangun kea pangun je sama kilau te.

⁹Uras kare pangun te, tamput kea tambiran hai, bara galang sampai akan sapau, inampa bara batu je bahala-halap. Kare batu te inatap intu eka oloh mangali batu, tuntang inampa tumon ukuran je jari inukas; hila huange tuntang hila luare imparata hapan garagaji.

¹⁰Galang kare pangun huma te inampa bara kare batu hai je barega. Kare batu te aton je 3,5 meter kapanjange, aton kea je 4 meter.

¹¹Intu hunjue ingkepan kare batu beken je barega tuntang inampa manumon ukuran je patut, palus inutup hapan kayu cemara Libanon.

¹²Dinding parantaran istana tuntang dinding parantaran hila huang intu Human TUHAN dengan dinding balai intu hila baun Human TUHAN, gagenepe inampa bara ije kabindang kayu lapis je bara kayu cemara Libanon intu hunjun genep telo kabindang batu.

¹³Hong lewu Tirus aton ije biti oloh hatue arae Huram. Ie toto-toto oloh je apik tuntang are pangatawae manampa kare macam ramo tambaga. Taliau bapae iete oloh Tirus tuntang apik kea manguan kare ramo tambaga. Indue bara suku Naptali. Raja Salomo jari manyoho oloh haguet manduan Huram uka dumah tuntang mangapala kakare gawi manampa ramo bara tambaga te. Palus Huram dumah tuntang malalus taloh je ilaku Salomo.

¹⁵Huram manampa jihi tambaga, gagenepe 8 meter kagantonge, lingkare 5,3 meter, tuntang kakapal tambagae 7,4 sentimeter. Kare jihi te buang intu hila huange.

¹⁶Intu kare jihi te ie manampa due takolok jihi bara tambaga, gagenepe 2,2 meter kagantunge

¹⁷je tampae kilau kambang bakung kagantonge 1,8 meter. Genep takolok jihi te imbungas hapan due kabaris bua dalima bara tambaga. Samandiaie aton due ratus kabawak bua dalima intu genep takolok jihi te. Palus Huram manampa jawet rantai bara tambaga tuntang mingkes jete intu hunjun kare jihi te. Aton uju jawet rantai intu hunjun genep jihi, tuntang intu hunjun jawet rantai te kea aton ije lapik je bunter ampin tampae. Intu hunjun lapik je bunter toh

²¹kare takolok jihi nah je tampae kilau kambang bakung te ingkepan intu kare jihi te. Kare jihi te iingkes intu hila baun batonggang tame akan Human TUHAN — ije intu hila salatan, je beken intu hila utara. Je intu hila salatan inggare Yakhin,[8] je intu hila utara inggare Boas.[9] Kalote Huram mampajadi gawin kare tihang te.

²³Limbah te Huram manampa ije tangki tambaga je bunter, je ukurae kalotoh: kandaleme 2,2 meter, garis bentenge 4,4 meter tuntang lingkare 13,2 meter.

²⁴Hakaliling saran hila luare imbungas hapan due walas kabaris bua baloh, je inoang haya-hayak dengan tangki te.

²⁵Tangki te iingkes intu hunjun likut due walas sapi tambaga, telo manaharep akan hila utara telo akan hila salatan, telo akan hila barat, tuntang telo tinai akan hila timor.

²⁶Kakapal tangki te 75 milimeter. Sarae sama kilau saran cangkir je manyalambir akan hila luar manamunan kambang bakung je burai. Tangki te olih mamuat kira-kira 40.000 liter.

²⁷Huram kea mawi sapuluh kareta tambaga, gagenepe 1,8 meter kapanjange, kagantonge 1,3 meter.

²⁸Kare kareta te inampa bara kare papan halapak je ingkepan huang bingkai.

²⁹Kare papan te imbungas hapan ukiran singa, sapi tuntang kerub. Intu kare bingakaie — intu hunjun tuntang intu penda kare gambar singa tuntang sapi te — ingkoak kare ukir kambang je irangkai.

³⁰Akan gagenep kareta te aton epat roda tambaga mahapan has roda bara tambaga kea. Intu kaepat puting kareta te aton tihang panahan hamangkok je bara tambaga je imbungas hapan rangkai kambang intu hila luare.

³¹Hila hunjun epat tihang panahan te indehen awi ije bingkai bunter hapa manahan mangkok te. Kare tihang panahan te mansuloh 44 setimeter akan hila hunjun papan halapak te, tuntang 22 sentimeter akan hila pendae. Intu nyaman bingkai te aton ukiran.

³²Kagantong rodae 66 sentimeter; ekae te aton intu penda kare papan. Has rodae dengan karetae te manjadi ije bagian.

³³Kare roda te ampie kilau roda kareta parang; lingkar roda, jari-jari, has tuntang puser jari-jari roda urase inampa bara tambaga.

³⁴Aton epat tihang panahan intu genep puting hila penda kareta te. Kare tihang te ije bagian dengan karetae.

³⁵Intu hakaliling hila hunjun kareta te aton saran kareta je kalombahe 22 sentimeter. Tihang je hapa manahan tuntang kare papan te urase manjadi ije bagian dengan kareta te.

³⁶Kare tihang je hapa manahan tuntang kare papan te imbungas hapan gambar kerub, singa tuntang batang korma hong kueh bewei aton eka je buang akan te, huang hete aton rangkai kambang hakalilinge.

³⁷Kalote carae kare kareta te inampa. Samandiaie te sama ampie — tampae tuntang ukurae.

³⁸ Huram manampa kea sapuluh mangkok hai, ije mangkok akan genep kareta. Genep mangkok te hagaris bentok 1,8 meter tuntang tau mamuat 800 liter danum.

³⁹Huram mingkes lime kareta intu hila salatan Human TUHAN, tuntang lime hong hila utara. Tangki tambaga iingkese intu puting hila tanggara.

⁴⁰Huram manampa kea kare ketel, kare sodok tuntang kea kare mangkok. Limbah te maka gawin Raja Salomo akan Human TUHAN jari lepah. Jetoh aran kare ramon pakakas je jari inampae: Due jihi hai Due takolok jihi tampae kilau mangkok je iingkes intu hunjun due jihi te. Jawet rantai hong genep takolok jihi. Epat ratus dalima tambaga je iretei huang due kabaris hakaliling jawet rantai hong genep takolok jihi Sapuluh kareta Sapuluh mangkok hai Tangki bara tambaga Due walas sapi tambaga je meton tangki te Kare ketel, kare sendok petak, kare mangkok. Uras pakakas akan Human TUHAN te, je inampa Huram akan Raja Salomo, inampa bara tambaga, tuntang inggosok sampai mangilat.

⁴⁶Raja manyoho manampa kare ramo te intu eka manoang logam helat Sukot dengan Sartan intu Janah Yordan.

⁴⁷Salomo dia manyoho manimbang kare ramo tambaga te, awi handiaie are toto. Jadi ehat kare ramo te dia ingatawan.

⁴⁸ Raja Salomo kea manyoho manampa kare pakakas beken bara amas akan Human TUHAN. Jetoh ie aran kare pakakas je inampa te: Mesbeh Meja akan rote je inyarah akan Hatalla Sapuluh tantahan sumbo je iingkes intu hila baun Kamar Ije Barasih Haliai, iete lime hila salatan tuntang lime hila utara. Kare kambang Kare lantera Kare katip Kare cangkir Pakakas hapa mambelep lantera Kare mangkok Kare piring akan parapen Kare piring akan barah apui Kare engsel akan batonggang Kamar Ije Barasih Haliai tuntang kare batonggang luar Human TUHAN.

⁵¹ Limbah Raja Salomo jari lepah mamangun Human TUHAN, ie mingkes intu huang kare gudang huma te uras kare perak, amas, tuntang kare ramo beken je jari inenga awi Dawid bapae akan TUHAN.