Read Ngaju 1 RAJA-RAJA 9 Bible Online

1 RAJA-RAJA 9 - Ngaju bible

1 RAJA-RAJA 9

¹Limbah Salomo jari lepah mampendeng Human TUHAN tuntang istana raja dengan kare taloh je irencanae,

² TUHAN mamparahan Arep tinai akae kilau je jari manjadi intu Gibeon.

³TUHAN hamauh dengae, “Lakudoam jari ihining-Ku, tuntang toh Aku mansanan tahiu huma je jari impendengm toh manjadi eka je tantai akan eka sombayang akang-Ku palus katatahie. Aku akan harajur manantuani tuntang manjaga eka toh.

⁴Amon ikau manempo Aku hapan kahias tuntang kabujur atei kilau bapam Dawid, tuntang ikau manumon kare atoran dengan kare parentah-Ku,

⁵ maka Aku akan manggenep janjing-Ku dengan bapam Dawid iete anak esoe girir manggirir akan harajur marentah Israel.

⁶Tapi amon ikau atawa turonam manalikut Aku tuntang dia manumon kare atoran dengan kare prentah-Ku hayak ikau manyembah kare Hatalla beken,

⁷maka Aku akan maharak ungkup-Ku Israel bara lewu je jari inenga-Ku akan ewen. Aku kea akan malihi huma toh je jari inukas-Ku manjadi eka sombayang akang-Ku. Hong hete-hete oloh Israel akan inawah tuntang inatawe.

⁸ Huma sombayang toh akan baduroh bakarak sampai genep oloh je mahalau intu hete akan tarewen tuntang mangkarieng. Ewen akan hamauh, ‘Mbuhen TUHAN mawi lewu tuntang huma toh kilau te?’

⁹Palus oloh akan tombah, ‘Awi ewen jari malihi TUHAN, Hatallan ewen, je jari magah tato hiang ewen balua bara Misir. Ewen manyembah kare hatalla beken. Awi te TUHAN mampadumah calaka toh akan ewen.’ ”

¹⁰Salomo mamangun Human TUHAN tuntang istana raja katahin due puluh nyelo.

¹¹Uras kayu cemara Libanon tuntang kayu cemara toto dengan kakare amas je imerlu Salomo akan pangun te jari inenga raja Hiram akae. Limbah gawi te hapus, Raja Salomo manenga akan Hiram due puluh lewu intu daerah Galilea.

¹²Palus Hiram haguet mitee, tapi ie dia sanang dengan panenga te.

¹³Ie hamauh dengan Salomo, “Paharingku, en kilau toh ampie kare lewu je inengam akangku?” Jete bukue daerah te inyewut Kabul.[10]

¹⁴Labih bara 4.000 kilogram amas jari ingirim Hiram akan Salomo.

¹⁵Raja Salomo mahapan cara gawi paksa akan mamangun Human TUHAN, istana raja, dinding Yerusalem tuntang akan manuyok petak intu hila salatan Human TUHAN. Ie mahapan cara je sama uka mamangun haluli lewu Hasor, Megido tuntang Geser.

¹⁶(Lewu Geser iete lewu je bihin inyarang tuntang impakalah awi raja Misir, palus oloh lewue impatei tuntang lewue inusul. Lewu te palus inenga awi raja Misir akan anake je bawi kilau panenga hong andau pangawie dengan Salomo.

¹⁷Maka Salomo kea je mamangun haluli lewu te.) Dengan gawi paksa kea, Salomo mamangun haluli Bet-Horon-Ngawa,

¹⁸Baalat, Tamar intu padang pasir Yuda,

¹⁹kare lewu eka manyadia taloh kinan, dengan kare lewu akan eka mamumpong kareta parang tuntang kudae. Uras kare rencana pangun intu Yerusalem, Libanon tuntang intu hapus wilayah je irentahe jari ilaluse.

²⁰Akan gawi paksa te Salomo mirak kare turonan oloh Amori, Het, Feris, Hewi tuntang Yebus. Ewen te uras bara kare oloh turonan bangsa Kanaan je dia olih impatei lepah awi oloh Israel metoh ewen manguasa lewu te. Sampai toh turonan ewen te magon jadi rewar.

²²Salomo dia mawi oloh Israel jadi rewar, tapi ewen inengae gawi jadi tantara, perwira, pangkalima, komandan kareta parang, tuntang tantara pasukan bakuda.

²³Lime ratus lime puluh pagawai inenga tanggung jawab akan kare oloh je buah gawi paksa huang kakare macam gawi mamangun te.

²⁴Petak je intu hila salatan Human TUHAN ingawok awi Salomo limbah kabalie, iete putri raja Misir, pindah bara Lewun Dawid akan istana je imangun Salamo akae.

²⁵ Telo tingkat hong ije nyelo Salomo maluput parapah je ingehu tuntang je hapa badamai intu hunjun mesbeh je impendenge akan TUHAN. Ie mamapui kea garo akan TUHAN. Kalote Salomo mampahapus gawi mamangun Human TUHAN.

²⁶Akan kapal angkatan laut, Raja salomo mawi kare kapal intu Esion-Geber, tokep Elot intu pantai Telok Akaba, tanah Edom.

²⁷Raja Hiram mangirim kare oloh kapal ayue je are pangalamae uka balayar hayak kare oloh kapal ain Salomo.

²⁸Puji ewen balayar akan lewu Opir uka manduan 14.000 kilogram amas tuntang mimbite akan Salomo.