Read Ngaju 2 RAJA-RAJA 1 Bible Online

2 RAJA-RAJA 1 - Ngaju bible

2 RAJA-RAJA 1

¹Limbah Ahab raja Israel matei, lewu Moab mandarhaka malawan Israel.

²Sinde andau Raja Ahasia bara Israel manjato bara loteng hunjun istanae intu Samaria, sampai ie bahimang hai. Palus ie manyoho oloh misek dengan Baal-Sebub, dewa lewu Ekron intu Pilistin, en ie akan keleh atawa dia.

³Tapi malekat TUHAN manyoho Elia, nabi bara Tisbe, haguet manyondau kare sarohan Raja Ahasia te uka hamauh, “En intu Israel jaton Hatalla sampai keton handak haguet manggau auh bara Baal-Sebub, dewa lewu Ekron te?

⁴Sanan akan raja je TUHAN hamauh kalotoh, ‘Ikau dia akan keleh, ikau akan matei!’ ” Limbah Elia malalus parentah TUHAN te,

⁵kare sarohan te haluli manalih raja, palus raja misek, “Mbuhen keton haluli?”

⁶Ewen tombah, “Ije biti oloh hatue dumah manalih ikei, tuntang manyoho ikei haluli uka mansanan akan Tuan Raja je TUHAN hamauh kalotoh dengan Tuan Raja, ‘En intu Israel jaton Hatalla, sampai ikau manyoho balaku auh bara Baal-Sebub, dewa lewu Ekron? Ikau dia akan keleh, ikau akan matei!’ ”

⁷“Kilen ampin oloh te?” raja misek.

⁸ “Jubah tuntang peteng kahange bara upak meto,” tombah ewen. “O, jete Elia!” koan raja.

⁹Palus ie manyoho ije biti perwira hayak lime puluh biti oloh ayue haguet manyingkap Elia. Perwira te haguet palus sondau Elia metohe mondok intu ije bukit. “O rewar Hatalla,” koan perwira te, “Raja marentah ikau mohon!”

¹⁰ “Amon aku toh puna rewar Hatalla,” tombah Elia, “keleh apui mohon bara langit tuntang mangehu lepah ikau hayak uras oloh ayum!” Metoh te kea mohon apui palus mangehu perwira te dengan lime puluh biti oloh ayue.

¹¹Palus raja manyoho ije biti perwira beken hayak lime puluh biti oloh ayue kea. Ewen haguet tuntang hamauh dengan Elia, “O rewar Hatalla, raja marentah ikau mohon toh kea!”

¹²“Amon aku puna rewar Hatalla, keleh apui mohon bara langit tuntang mangehu ikau lepah hayak uras oloh ayum!” Hemben te kea palus apui mohon bara Hatalla tuntang mangehu lepah perwira te dengan lime puluh biti oloh ayue.

¹³Sinde tinai raja manyoho ije biti perwira hayak lime puluh biti oloh ayue. Perwira te mandai akan bukit tuntang sana sampai intu taharep Elia ie mandeku utut tuntang hamauh, “Ampun ikei o rewar Hatalla! Pasi aku tuntang kakare oloh ayungku toh. Ela ah mampatei ikei!

¹⁴Due perwira je beken hayak oloh ayue matei kinan apui bara langit, tapi aku balaku keleh pasi aku!”

¹⁵Metoh te kea malekat TUHAN palus hamauh dengan Elia, “Ela mikeh! Tuntut ie mohon bara bukit toh.” Awi te Elia haguet hayak perwira te manalih raja.

¹⁶Palus koan Elia dengan raja, “TUHAN hamauh, ‘Ikau manyoho oloh balaku auh bara Baal-Sebub dewa lewu Ekron, kila-kilau intu Israel jaton Hatalla je tau ekam misek. Awi te ikau dia akan keleh, ikau akan matei!’ ”

¹⁷Palus Ahasia matei kilau je insanan TUHAN mahalau Elia. Awi Ahasia jaton anak hatue, maka Yoram paharie[1] jadi raja mangganti ie. Jete manjadi intu nyelo kadue kahum Yoram anak Yosapat, raja Yuda marentah.

¹⁸Sarita je beken tahiu taloh je ilalus awi Ahasia incatet huang buku Sejarah Kare Raja Israel.