Read Ngaju 2 RAJA-RAJA 10 Bible Online

2 RAJA-RAJA 10 - Ngaju bible

2 RAJA-RAJA 10

¹Ain Raja Ahab aton uju puluh anak esoe intu lewu Samaria. Awi te Yehu mangirim surat akan Samaria. Akan kare wali anak eson Ahab tuntang akan kare panguasa dengan kare bakas lewu intu lewu te. Auh surat te kalotoh,

²“Anak eson Ahab jete aton huang pangawasan keton, tuntang ain keton aton kareta parang, kuda, sanjata dengan lewu je hadinding batu. Awi te, sana keton manarima surat toh,

³intih eweh je pangkahalape bara anak eson Ahab tuntang angkat ie jadi raja, palus keton pakat mandohop ie.”

⁴Kare panguasa Samaria mikeh. Ewen hamauh, “Raja Yoram tuntang Raja Ahasia mahin dia olih malawan Yehu, mahin tinai itah!”

⁵Awi te pamimpin istana tuntang wali lewu hayak kare bakas lewu mangirim barita toh akan Yehu, “Ikei mamenda Tuan hayak tatap mawi taloh en bewei je irentah Tuan akan ikei. Ikei dia akan mangkat ewe-eweh jadi raja. Lalus taloh je bahalap manumon tirok Tuan.”

⁶Palus Yehu mangirim tinai surat akan ewen koae, “Amon keton aton intu hila aku, hayak tatap manumon kare parentahku, patei anak eson Ahab te tuntang jewu hong katika kilau toh imbit kare takolok ewen akangku intu Yisreel.” Uju puluh anak eson Ahab te melai dengan kare bakas lewu intu lewu Samaria, tuntang ihaga awi ewen.

⁷Limbah manarima surat Yehu, kare bakas lewu intu lewu Samaria te mampatei uju puluh anak eson Ahab te; kare takolok ewen inamean intu huang karanjang tuntang ingirim akan Yehu intu Yisreel.

⁸Limbah taloh te insanan akan Yehu, ie marentah mangat kare takolok te inyusun jadi due katuyok intu lawang lewu, tuntang inalua intu hete sampai hanjewu.

⁹Hanjewue tinai Yehu balua akan lawang, palus hamauh dengan kare oloh je hapumpong intu hete, “Aku toh je mawi kapakat malawan Raja Yoram tuntang mampatei ie; keton dia basala hong hal te. Tuntang uras kare oloh toh dia ie aku je mampateie.

¹⁰Jetoh buktie uras taloh je insanan TUHAN tahiu anak eson Ahab akan manjadi. TUHAN jari mawi taloh je insanan Awie mahalau Elia rewar Ayue.”

¹¹ Limbah te Yehu mampatei uras kare paharin Ahab je beken je melai intu Yisreel, tuntang uras kare pagawaie, kawale je tokep, tuntang kare imam ayue; jaton ije biti je inalua belom.

¹²Yehu malihi Yisreel palus haguet akan Samaria. Intu benteng jalan, intu eka je inyewut “Eka Kare Sakatik”,

¹³ie hasondau dengan pire-pire tundah paharin Ahasia raja Yuda. Ie misek, “Eweh keton?” “Ikei toh tundah paharin Ahasia,” tombah ewen. “Ikei handak akan Yisreel uka manalih hapus keluarga raja tuntang anak eson Ratu Isebel.”

¹⁴“Singkap ewen belo-belom!” parentah Yehu dengan oloh ayue. Palus kare oloh te inyingkap, balalu impatei tokep ije kalin danum je keang, urase epat puluh due biti karee. Ije mahin jaton je inalua belom.

¹⁵Yehu marajur pangguete. Intu benteng jalan, ie inambang awi Yonadab anak Rekhab. Yehu manabe ie tuntang hamauh, “En dia itah pakat? Maku ikau omba aku?” “Yoh,” tombah Yonadab. “Amon kalote keleh itah hajulok lenge,” baleh Yehu. Ewen hajulok lenge, tuntang Yehu mandohop Yonadab lompat akan karetae, sambil hamauh,

¹⁶“Keleh omba tuntang mite kabuat kilen ampie karajingku bagawi akan TUHAN.” Palus ewen haya-hayak lompat kareta akan Samaria.

¹⁷Sana sampai intu hete Yehu mampatei uras tundah paharin Ahab, jaton ije biti je ilihi. Jete manjadi tumon taloh je insanan TUHAN akan Elia.

¹⁸Yehu manyoho oloh lewu Samaria hapumpong tuntang ie hamauh, “Raja Ahab tapas karajie manempo Baal: aku akan labih rajin bara ie.

¹⁹Awi te mumpong uras kare nabi Baal tuntang oloh je manyembahe, hayak kare imame, ije mahin ela je tapalihi. Aku akan maluput parapah je hai akan Baal. Eweh je dia dumah akan ihukum matei.” Tapi jete baya ije akal Yehu uka mampatei uras kare oloh je manyembah Baal.

²⁰Yehu manenga parentah toh; “Nukas ije andau uka ingabeken akan hapa manyembah Baal!” Palus kare oloh manukas andau te.

²¹Yehu mansanan hal te hong hapus Israel. Hong andau te kakare oloh je manyembah Baal dumah, ije mahin jaton je tapalihi. Ewen tame akan human Baal tuntang mangontep huma te bara baun sampai akan likut.

²²Yehu marentah mangat oloh je maurus kare pakaian sombayang intu huma te manenga kare pakaian te akan kare oloh je dumah sombayang akan Baal. Limbah parentah te ilalus,

²³Yehu tame human Baal te hayak Yonadab anak Rekhab, tuntang hamauh dengan kare oloh intu hete, “Riksa toto-toto en uras oloh je dumah toh baya manyembah Baal. Ela sampai aton intu hetoh oloh je manyembah TUHAN.”

²⁴Palus Yehu tuntang Yonadab maluput parapah akan Baal. Intu luar huma te, Yehu jari mandak 80 pangawal tuntang perwira. Ie kea jari manenga parentah toh akan ewen, “Keton musti mampatei uras oloh te. Eweh je manalua ije bara ewen te hadari, akan imaptei!”

²⁵Sana Yehu lepah maluput parapah, ie balua tuntang hamauh dengan kare pangawal tuntang perwirae te, “Tame, tuntang patei uras kare ewen te. Ela manalua aloh ije liwus!” Palus ewen tame dengan padang je inyilak, tuntang mampatei uras kare oloh intu hete, balalu mihir kare hantu te balua. Limbah te ewen tame akan hila huang huma,

²⁶tuntang mampalua hampatong Baal palus manusule.

²⁷Hampatong te impalomos hayak dengan humae, palus eka te inampa jadi eka oloh mamani sampai andau toh.

²⁸Tumon te Yehu manganan kare gawi manyembah Baal intu Israel.

²⁹ wi te TUHAN hamauh kalotoh dengan Yehu, “Uras taloh je irentah-Ku akam uka ilalus dengan turonan Ahab jari iawim. Awi te Aku hajanji je anak esom sampai turonan je kaepat akan jadi raja intu Israel.” Tapi Yehu dia hapan salepah ateie manumon kare parentah TUHAN, Hatallan Israel. Ie manumon gawin Yerobeam je mawi sabab oloh Israel badosa awie manyembah sapi amas je impendenge intu Betel tuntang intu Dan.

³²Metoh te TUHAN manampara mampakorik daerah Israel. Hasael raja Siria marabut hapus daerah Israel

³³intu silan hila timor Sungei Yordan palus akan Salatan sampai lewu Aroër tokep Sungei Arnon, tamput kea daerah Gilead tuntang Basan, eka suku Gad, Ruben tuntang Manase hila timor.

³⁴Sarita je beken tahiu Yehu, tamput kea kare gawin kamentenge, incatet huang buku, Sejarah Kare Raja Israel.

³⁵Yehu marentah kilau raja Israel 28 nyelo katahie. Ie matei tuntang ingubur intu Samaria. Palus Yoahas anake jadi raja mangganti ie.