Read Ngaju 2 RAJA-RAJA 11 Bible Online

2 RAJA-RAJA 11 - Ngaju bible

2 RAJA-RAJA 11

¹Metoh Atalya mangatawan je Raja Ahasia, anake jari matei, ie marentah mangat hapus keluarga Ahasia impatei.

²Yoas, anak Ahasia karenga impatei kea hayak kare anak raja ije beken, tapi ie liwus ganan inyalamat awi Yoseba, minae. Yoas tuntang pelayae iimbit palus inyahokan intu ije kamar batiroh hong Human TUHAN.

³Jahawen nyelo katahie Yoseba mahaga anak te huang Human TUHAN metoh Atalya marentah kilau ratu.

⁴Intu nyelo kaujue, kare perwira pangawal pribadi ratu tuntang kare pangawal istana intehau awi imam Yoyada uka hasondau dengae intu Human TUHAN. Intu hete ie manyoho ewen sumpah uka malalus rencanae. Ie mamparahan Yoas, anak Raja Ahasia, akan ewen.

⁵Ie manenga parentah toh, “Amon keton bagawi hong andau Sabat, sapertelo bara keton musti jaga hong istana,

⁶sapertelo tinai intu lawang Sur, tuntang kalabiee intu lawang hong likut kare pangawal je beken.[13]

⁷Kadadue regu je lepah tugas hong andau Sabat, keleh jaga intu Human TUHAN dengan padang je inyilak uka mangalindong Raja Yoas. Keton musti manjaga ie kakueh bewei ie haguet, tuntang genep biti je handak manokep keton, musti impatei awi keton.”

⁹Kare perwira te manumon auh parentah Yoyada tuntang mimbit akae kare oloh ain ewen je musti bagawi tuntang je lepah gawie hong andau Sabat te.

¹⁰Yoyada manenga akan kare perwira te kare lunju tuntang talawang Raja Dawid je iingkes intu Human TUHAN.

¹¹Palus kare pangawal genep bitie dengan padang je inyilak, mendeng hakaliling hila baun Human TUHAN uka mangalindong raja.

¹²Limbah Yoyada mimbit Yoas balua, palus mandak makota intu takoloke, tuntang manyarah akae buku Parentah Hatalla. Yoas ilantik kilau raja tuntang taloh te insanan akan kare rayat. Uras oloh manapuk lokap tuntang basasorak, koae, “Belom raja!”

¹³Ratu Atalya mahining auh surak kare pangawal tuntang rayat. Bajeleng ie haguet akan Human TUHAN, eka oloh are te hakarimpong.

¹⁴ Ie mite raja je taheta te mendeng intu batonggang tame Human TUHAN eka ie ilantik, ingaliling awi kare perwira je mahimon tarompet. Hapus rayat basasurak hanjak sambil tarompet impahiau. Hapan angat bagalabah Atalya marabit pakaiae, tuntang mangkariak, “Darhaka! Darhaka!”

¹⁵Yoyada dia manyoho Atalya impatei tokep Human TUHAN. Ie hamauh dengan kare perwirae, “Imbit ie balua mahalau barisan pangawal tuntang patei eweh bewei je handak manyalamat ie.”

¹⁶Ewen manyingkap ie, palus mimbit ie akan istana. Intu hete ie impatei intu baun Lawang Kuda.

¹⁷Imam Yoyada manyoho Raja Yoas tuntang rayat mawi janji dengan TUHAN. Ie kea manyoho raja mawi janji dengan rayat.

¹⁸Limbah te rayat mamok tuntang manderep human Baal. Mesbeh tuntang kare hampatonge imparamok, tuntang Matan, imam Baal impatei intu hila baun kare mesbeh te. Yoyada manyoho pengawal uka manjaga Human TUHAN;

¹⁹palus ie hayak kare perwira, kare pangawal pribadi raja tuntang kare pangawal istana, hayak hapus rayat maarak raja Yoas bara Human TUHAN akan istana. Yoas tame mahalau Lawang Pangawal, palus mondok intu hunjun padadosae.

²⁰Hapus rayat hanjak, lewu palus sanang landang tuntang Atalya jari impatei.

²¹Yoas umure uju nyelo metoh ie jadi raja hong Yuda.