Read Ngaju 2 RAJA-RAJA 12 Bible Online

2 RAJA-RAJA 12 - Ngaju bible

2 RAJA-RAJA 12

¹Intu nyelo kaujue Yehu marentah Israel, Yoas jadi raja Yuda. Ie marentah Yerusalem 40 nyelo katahie. Indue bagare Sibya bara lewu Berseba.

²Tagal ajar imam Yoyada, Yoas katahin pambelome mawi taloh je manyanang atei TUHAN.

³Baya sayang, eka manyembah dewa dia inganan, sampai rayat magon maluput parapah tuntang manotong manyan intu hete.

⁴ Sinde andau Yoas mantehau kare imam tuntang manyoho ewen mingkes duit je dinon bara kare parapah intu Human TUHAN, en jete duit hapa mambayar gawin parapah, atawa duit panenga tagal kahias atei.

⁵Genep imam musti mananggong kajarian gunan kare duit je inenga oloh je indohop awie. Duit te ihapan akan mangambuah kare karusak intu Human TUHAN.

⁶Sampai hong nyelo kadue puluh telo Yoas marentah, kare imam hindai kea mangambuah taloh je rusak intu Human TUHAN.

⁷Awi te Yoas mantehau Imam Yoyada hayak dengan kare imam je beken, tuntang hamauh, “Mbuhen keton hindai kea mangambuah Human TUHAN? Nampara bara andau toh keton dia inyoho mingkes duit je inarima keton. Uras jete musti inyarah keton akan hapa mangambuah Human TUHAN.”

⁸Kare imam pakat uka dia mamumpong duit bara rayat, tuntang dia kea mananggong kajarian gawi mangambuah Human TUHAN.

⁹Palus Yoyada manduan ije pati tuntang manampa rumbak intu tutupe palus mandak jete tokep mesbeh intu hila gantaun batonggang tame Human TUHAN. Uras kare duit je inenga intu Human TUHAN inamean akan huang pati te awi kare imam je batugas intu batonggang tame.

¹⁰Genep katika amon duit intu huang pati te jadi are, sekretaris raja hayak Imam Hai dumah tuntang mise duit te, palus mambongkuse.

¹¹Limbah kare duit te incatet, duit te inyarah akan kare oloh je mator gawi mangambuah Human TUHAN. Limbah te kare oloh te mambayar akan kare tukang kayu, tukang pangun,

¹²tukang batu tuntang oloh je mamahat batu. Kare oloh je mator gawi te kea je mamili kayu tuntang batu, hayak mator uras kare balanja akan gawi mangambuah te.

¹³Tapi duit te isut mahin dia tau ihapan akan manampa kare cangkir perak, mangkok, tarompet, kare pakakas sumbo, atawa pakakas je beken bara amas atawa perak.

¹⁴Uras jete imbayar akan kare tukang tuntang akan hapa mamili kare ramon pangun huma je imerlu.

¹⁵ Kare oloh je mator gawi te bujur toto ateie, jadi dia usah ilaku laporan duit bara ewen.

¹⁶ Duit bara parapah ganti rugi tuntang parapah ampun dosa dia inamean akan huang pati te. Duit te inenga akan kare imam.

¹⁷Hong wayah te Hasael raja Siria manyarang tuntang manguasa lewu Gat. Palus ie nahuang manyarang Yerusalem kea.

¹⁸Palus Yoas mangirim akae duit hapa manewus. Duit te dinoe bara kakare parapah je bihin jari inyarah akan TUHAN awi Yoas kabuat, tuntang awi Yosapat, Yoram tuntang Ahasia, iete kare raja je marentah helo bara ie. Kea uras kare amas bara kas Human TUHAN tuntang istana raja. Awi te Hasael balang manyarang Yerusalem.

¹⁹Limbah te kare pagawai karajaan Yuda pakat malawan raja Yoas. Due bara marak ewen; iete Yosabar anak Simeat, tuntang Yosabad anak Somer, mampatei Yoas intu ije huma je imangun intu hunjun petak je imapagantong hila timor Yerusalem, intu jalan mohon akan Sila. Yoas ingubur intu kubur kare raja hong Lewun Dawid. Amasia anake jadi raja mangganti ie. Sarita je beken tahiu Raja Yoas incatet huang buku Sejarah Kare Raja Yuda.