Read Ngaju 2 RAJA-RAJA 13 Bible Online

2 RAJA-RAJA 13 - Ngaju bible

2 RAJA-RAJA 13

¹Intu nyelo kadue puluh telo Yoas anak Ahasia marentah Yuda, Yoahas anak Yehu jadi raja Israel. Ie marentah intu Samaria uju walas nyelo katahie.

²Kilau Raja Yerobeam je marentah helo bara ie, Yoahas badosa intu TUHAN tuntang mawi sabab oloh Israel badosa kea. Ie dia puji malihi kare gawi je papa.

³Awi te TUHAN sangit dengan Israel, sampai ie manalua Hasael raja Siria tuntang Benhadad anake, kinjap mampakalah Israel,

⁴palus Yoahas balakudoa intu TUHAN, tuntang TUHAN mahining lakudoae te, awi TUHAN mite kakaras raja Siria mahenyek oloh Israel.

⁵TUHAN manenga akan oloh Israel ije pamimpin je malapas ewen bara kuasan Siria sampai ewen belom sanang tinai kilau solake.

⁶Aloh kalote oloh Israel dia terai mawi kare dosa je inampara awi raja Yerobeam. Ewen tetep mawi kare dosa te, tuntang manalua kare hampatong Dewi Asera tetep aton intu Samaria.

⁷Tantara pasukan parang Israel jari impalomos awi raja Siria sampai Raja Yoahas baya aton 50 biti tantara bakuda, 10 kareta parang, tuntang 10.000 biti tantara.

⁸Sarita je beken tahiu Raja Yoahas tuntang uras kare gawin kamentenge incatet huang buku Sejarah Kare Raja Israel.

⁹Ie matei tuntang ingubur intu Samaria. Yoas anake jadi raja mangganti ie.

¹⁰Intu nyelo katelo puluh uju Raja Yoas marentah intu Yuda, Yoas anak Yoahas jadi raja Israel tuntang marentah intu Samaria 16 nyelo katahie.

¹¹Ie kea badosa dengan TUHAN awie manumon kapapan Raja Yerobeam je mawi sabab oloh Israel mawi dosa.

¹²Sarita je beken tahiu Raja Yoas, tamput kea tahiu kamentenge huang parang malawan Amasia raja Yuda, incatet huang buku Sejarah Kare Raja Israel.

¹³Yoas matei tuntang ingubur intu kubur kare raja hong Samaria. Yerobeam II anake jadi raja mangganti ie.

¹⁴ Sinde katika Nabi Elisa haban paham, tuntang Raja Yoas dumah manjengok ie. Metoh ie mite Elisa bilak matei, raja te manangis tuntang hamauh, “Bapaku, bapaku, pandohop Israel je hai!”

¹⁵“Duan panah tuntang anake!” parentah Elisa akae. Yoas manduae,

¹⁶palus Elisa manyoho ie tata-tatap uka mamanah. Raja palus tatap, tuntang Elisa mandak lengee intu hunjun lengen raja.

¹⁷Limbah te tumon parentah nabi te, raja muap baunsengok je manintu Siria. “Palekas panahm!” parentah Elisa. Sana raja malekas panah te, nabi hamauh, “Ikau toh panah TUHAN. Mahapan panah te TUHAN akan mampakalah Siria. Ikau akan parang malawan oloh Siria intu Apek sampai ikau mampakalah ewen!”

¹⁸Elisa manyoho Raja Yoas manduan panah je beken tuntang mahampase intu petak. Raja mahampas hantelo, palus tende.

¹⁹Elisa sangit tuntang hamauh, “Sapunae ikau mahampas sampai lime atawa jahawen tingkat, palus ikau tau mampahancor bangsa Siria. Tapi toh ikau akan mampakalahe baya hantelo.”

²⁰Dia tahi limbah te Elisa matei tuntang ingubur. Wayah te kare garombolan oloh Moab tumon bahut manyarang lewu Israel sinde huang ije nyelo.

²¹Sinde andau metoh pire-pire biti oloh metohe mangubur oloh matei, salenga ewen mite garombolan oloh Moab dumah. Balalu ewen manjakah kakai bewei hantu te akan huang kubur Elisa palus hadari kalote hantu te tatigung tulang Elisa, hantu te belom tinai palus mendeng.

²²Katahin Yoas marentah, Hasael raja Siria manjake oloh Israel.

²³Tapi TUHAN masi ungkup Ayue tuntang mampun ewen. Ie dia maku manalua ewen impalomos, tapi mandohop ewen, tagal janjin Aie dengan Abraham, Isaak tuntang Yakob. Sampai toh dia puji ie mangalapean ungkup Ayue.

²⁴Limbah te Hasael raja Siria matei, tuntang Benhadad anake jadi raja.

²⁵Palus Yoas raja Israel mampakalah Benhadad hantelo tuntang manduan haluli kare lewu je jari irabut awi Benhadad intu wayah Raja Yoahas bapa Yoas marentah.