Read Ngaju 2 RAJA-RAJA 15 Bible Online

2 RAJA-RAJA 15 - Ngaju bible

2 RAJA-RAJA 15

¹Intu nyelo kadue puluh uju Raja Yerobeam II marentah Israel, Usia[15] anak Amasia jadi raja akan karajaan Yuda.

²Metoh te umure 16 nyelo tuntang ie marentah hong Yerusalem 52 nyelo katahie. Indue bagare Yekholya, bawin oloh Yerusalem.

³Kilau bapae, Usia kea mawi taloh je manyanang atei TUHAN.

⁴Tapi sayang, ie dia mampalomos eka kare manyembah dewa, sampai rayat tetep maluput parapah tuntang manotong garo intu hete.

⁵TUHAN mampalembut intu ie panyakit kulit je bakaike-ikeh; tuntang sampai ie matei, panyakit te dia kele-keleh. Ie ingurong intu ije huma tuntang imbebas bara kare gawie. Yotam anake marentah rayat Israel kilau wakile.

⁶Sarita je beken tahiu Raja Usia incatet huang buku Sejarah Kare Raja Yuda.

⁷ Usia matei tuntang ingubur intu kubur kare raja huang Lewun Dawid. Yotam anake manjadi raja mangganti ie.

⁸Huang nyelo katelo puluh hanya Raja Usia marentah Yuda, Sakharia anak Yerobeam II jadi raja Israel tuntang marentah intu Samaria jahawen bulan katahie.

⁹Sama kilau kare raja je marentah helo bara ie, ie kea mawi dosa intu taharep TUHAN. Ie manumon kare kapapan Raja Yerobeam I, je jari mawi sabab oloh Israel mawi dosa.

¹⁰Salum anak Yabes pakat malawan Raja Sakharia, tuntang mampatei ie intu Yibleam, palus Salum manjadi raja mangganti ie.

¹¹ Tumon te taloh je jari injanji TUHAN akan Raja Yehu jari tulus, je anak esoe sampai turonan kaepat[16] akan jadi raja intu Israel. Sarita je beken tahiu Raja Sakaria, incatet huang buku Sejarah Kare Raja Israel.

¹³Intu nyelo katelo puluh jalatien raja Usia marentah Yuda, Salum anak Yabes manjadi raja Israel. Ie marentah intu Samaria baya ije bulan katahie,

¹⁴awi Menahem anak Gadi haguet bara Tirsa akan Samaria, palus mampatei Salum, tuntang Menahem jadi raja mangganti ie.

¹⁵Huang panjalanae bara Tirsa, Menahem mampahancor samasinde lewu Tipsah tuntang eka je hakalilinge hayak mambinasa lepah kare oloh lewue. Awi lewu te dia maku manyarah dengae, ie palus manyila kanain kare oloh bawi je batihi intu lewu te. Kare sarita je beken tahiu Raja Salum, dengan kare gawie je mandarhaka, incatet huang buku Sejarah Kare Raja Israel.

¹⁷Huang nyelo katelo puluh jalatien Raja Usia marentah Yuda, Manahem anak Gadi jadi raja intu Israel, tuntang marentah intu Samaria 10 nyelo katahie.

¹⁸Hapus pambelome ie mawi dosa intu taharep TUHAN awi ie manumon kapapan Raja Yerobeam I, je mawi sabab oloh Israel mawi dosa.

¹⁹Metoh Pul[17] raja Asur manyarang Israel, Manahem manenga akae 34.000 kilogram perak mangat ie mandohop mandehen kuasan Manahem intu Israel.

²⁰Cara Manahem mandino duit te iete mahapan gawi paksa akan kare oloh tatau intu Israel manenga lime puluh duit perak genep biti. Awi te Pul malihi lewu te tuntang buli akan lewue kabuat.

²¹Sarita je beken tahiu Raja Manahem incatet huang buku Sejarah Kare Raja Israel.

²²Ie matei tuntang ingubur, palus Pekahya anake jadi raja mangganti ie.

²³Intu nyelo kalime puluh Raja Usia marentah Yuda, Pekahya anak Menahem jadi raja Israel tuntang marentah intu Samaria due nyelo katahie.

²⁴Ie badosa intu taharep TUHAN awi manumon kapapan Raja Yerobeam I, je mawi sabab oloh Israel mawi dosa.

²⁵Ije bara perwirae, iete Pekah anak Remalya, pakat dengan 50 biti oloh bara Gilead. Palus huang ije kota intu istana hong Samaria, ewen mampatei Pekahya dengan due biti oloh je beken bagare Argob tuntang Arye. Limbah te Pekah jadi raja mangganti Pekahya.

²⁶Sarita je beken tahiu Raja Pekahya incatet huang buku Sejarah Kare Raja Israel.

²⁷Hong nyelo kalime puluh due Raja Usia marentah Yuda, Pekah anak Remalya jadi raja Israel. Ie marentah intu Samaria 20 nyelo katahie.

²⁸Ie mawi dosa intu taharep TUHAN awi manumon kare kapapan Raja Yerobem I je mawi sabab Israel mawi dosa.

²⁹Hong wayah Pekah marentah, Tiglat-Pileser raja Asur marabut lewu Iyon, Abel-Bet-Maakha, Yanoah, Kedes, Hasor, daerah Gilead, Galilea tuntang Naptali. Kare oloh bara kare lewu te iimbite kea kilau oloh tawanan akan Asur.

³⁰Hong nyelo kadue puluh Raja Yotam anak Usia marentah Yuda, Hosea anak Ela pakat malawan raja Pekah tuntang mampatei ie, palus Hosea jadi raja mangganti ie.

³¹Sarita je beken tahiu Raja Pekah incatet huang buku Sejarah Kare Raja Israel.

³²Hong nyelo kadue Raja Pekah anak Remalya marentah Israel, Yotam anak Usia jadi raja karajaan Yuda.

³³Metoh te umure 25 nyelo tuntang ie marentah intu Yerusalem 16 nyelo katahie. Indue iete Yerusa anak Sadok.

³⁴Yotam mawi taloh je manyanang atei TUHAN, kilau Usia bapae.

³⁵Tapi sayang, kare eka manyembah dewa dia ie mampalomose sampai rayat tetep ih maluput parapah tuntang manutong garo intu hete. Yotam te je manampa lawang Utara hong Human TUHAN.

³⁶Hong wayah Yotam marentah, TUHAN manampara mangirim Resin raja Siria tuntang Pekah raja Israel, uka manyarang Yuda. Sarita je beken tahiu Raja Yotam incatet huang buku Sejarah Kare Raja Yuda.

³⁸Ie matei tuntang ingubur intu kubur kare raja hong Lewun Dawid. Ahas anake jadi raja mangganti ie.