Read Ngaju 2 RAJA-RAJA 16 Bible Online

2 RAJA-RAJA 16 - Ngaju bible

2 RAJA-RAJA 16

¹Intu nyelo kauju walas Raja Pekah anak Remalya marentah Israel, Ahas anak Yotam jadi raja Yuda.

²Metoh te umure 20 nyelo tuntang ie marentah intu Yerusalem 16 nyelo katahie. Ie dia manumon sonto je bahalap bara Raja Dawid, tato hiange, malengkan mawi taloh je dia manyanang atei TUHAN, Hatallae.

³ Ie belom kilau kare raja Israel, maluput anake haream indu parapah akan dewa, manumon hadat papa kare oloh je iharak awi TUHAN bara kare lewu hong Kanaan metoh oloh Israel tame lewu te.

⁴Ahas maluput parapah tuntang manotong garo intu kare eka manyembah dewa intu kare bukit tuntang intu penda kare batang kayu je labat.

⁵ Intu wayah te raja Edom[18] manguasa haluli lewu Elat tuntang maharak kare oloh Yuda je melai intu hete. Oloh Edom limbah te dumah tuntang manetep intu lewu te sampai andau toh. Hong wayah te kea Resin raja Siria tuntang Pekah raja Israel manyarang tuntang mangapung Yerusalem, tapi dia olih mampakalah Ahas.

⁷Ahas mangirim sarohan akan Tiglat-Pileser raja Asur hayak peteh kalotoh, “Aku rewarm je baketep; awi te aku balaku, keleh dumah manyalamat aku bara raja Siria tuntang raja Israel je metoh toh manyarang aku.”

⁸Ahas kea manduan amas tuntang perak bara Human TUHAN, tuntang panatau istana, palus mampaite kilau panenga akan raja Asur te.

⁹Raja Tiglat-Pileser manarima palakun Ahas, palus manyarang tuntang marabut Damaskus. Oloh lewu te iimbite jadi tawanan akan Kir, tuntang rajae, iete Raja Resin, impateie.

¹⁰Metoh Raja Ahas haguet akan Damaskus handak manyondau Raja Tiglat-Pileser, ie mite mesbeh intu lewu te. Palus ie mangirim akan Imam Uria intu Yerusalem sonto mesbeh te dengan ukurae je buah tuntang titip.

¹¹Balalu Uria mampendeng ije mesbeh tumon sonto tuntang ukuran je inarimae te. Ie mampajadi jete helo bara Ahas haluli.

¹²Sana sampai Damaskus, Ahas mite je mesbeh te jari inampa.

¹³Palus intu hunjun mesbeh te ie maluput parapah meto dengan parapah gandom. Ie kea manusoh parapah anggor tuntang daha bara parapah hapa badamai akan hunjun mesbeh te.

¹⁴ Ahas mite je mesbeh tambaga je tantai akan TUHAN aton intu helat Human TUHAN tuntang mesbeh je taheta. Awi te mesbeh tambaga te iindahe bara hila baun Human TUHAN akan silan hila utara mesbeh je taheta te.

¹⁵Limbah te ie hamauh dengan Uria, “Keleh mahapan mesbehku je hai toh akan hapa mamapui parapah hanjewu tuntang parapah hamalem je iluput raja tuntang rayat, tuntang tusoh intu hete parapah anggor bara rayat. Tusoh kea akan hunjun mesbeh te uras dahan kare meto je iluput. Tuntang mesbeh tambaga je helo te nauhe aku je mahapae akan hapa balaku auh pansanan bara kare roh.”

¹⁶Uria malalus kare parentah raja.

¹⁷ Limbah te Ahas mungkar kare kareta tambaga je ihapan intu Human TUHAN, tuntang manduan kare balanai bara kare kareta te. Balanai tambaga hai je hunjun likut due walas sapi tambaga te induae kea tuntang iingkese intu hunjun lapik je bara batu.

¹⁸Palus uka manduan atei raja Asur, Ahas mangarak kamar raja intu Human TUHAN, tuntang matep batonggang tame je baya akan raja.

¹⁹Sarita je beken tahiu Raja Ahas incatet huang buku Sejarah Kare Raja Yuda.

²⁰ Ahas matei tuntang ingubur hong kubur kare raja intu Lewun Dawid. Hiskia anake jadi raja mangganti ie.