Read Ngaju 2 RAJA-RAJA 17 Bible Online

2 RAJA-RAJA 17 - Ngaju bible

2 RAJA-RAJA 17

¹Intu nyelo kaduewalas Raja Ahas marentah karajaan Yuda, Hosea anak Ela jadi raja Israel, tuntang ie marentah intu Samaria jalatien nyelo katahie.

²Ie badosa intu taharep TUHAN, tapi dosae dia kilau kare dosan kare raja Israel je marentah helo bara ie.

³Ie imarang tuntang impakalah awi Salmaneser raja Asur, sampai genep nyelo ie musti mambayar pajak akae,

⁴Tapi sinde katika, Hosea mangirim sarohan akan So raja Misir uka balaku pandohope. Palus Hosea terai mambayar pajak genep nyelo akan Asur. Metoh Salmaneser mangatawan tahiu gawin Hosea te, ie manawan Hosea tuntang manamean ie akan huang penjara.

⁵Limbah te Salmaneser Raja Asur[19] manyarang Israel tuntang mangapong Samaria. Hong nyelo je katelo wayah kapong te,

⁶— je sama dengan nyelo kajalatien Hosea marentah — Salmaneser marabut Samaria. Palus oloh Israel iimbite jadi tawanan akan Asur. Belahe bara ewen impateie intu lewu Halah, belahe tokep Sungei Habor intu wilayah Gosan, tuntang belahe tinai intu kare lewu hong Madai.

⁷Samaria manjato awi oloh Israel mawi dosa intu taharep TUHAN, Hatallan ewen, je jari manyalamat ewen bara raja Misir, tuntang mimbit ewen balua bara lewu te. Ewen manyembah kare hatalla beken,

⁸tuntang manumon hadat kare bangsa je jari iharak TUHAN metoh bangsa Israel miar mamarang kare bangsa te. Bangsa Israel manumon hadat je inukas awi kare raja Israel,

⁹tuntang malalus kare taloh je dia ingilak awi TUHAN, Hatallan ewen, aloh intu lewu korik aloh intu lewu hai.

¹⁰ Intu hunjun gagenep bukit, tuntang intu penda gagenep batang kayu je labat, ewen mampendeng kare tugu tuntang hampatong Dewi Asera.

¹¹Ewen kea manotong garo intu kakare mesbeh akan dewa sama kilau hadat kare bangsa je jari iharak TUHAN bara lewu Kanaan. Ewen manyembah dewa, aloh TUHAN jari mangahanae. Uras gawi je papa mampalembut kasangit TUHAN.

¹³TUHAN mangirim kare sarohan tuntang kare nabi Ayue akan ungkup Israel tuntang Yuda uka manyampai auh tingak toh: “Keleh ombet mawi taloh papa tuntang numon kare parentah tuntang atoran je inengaku akan tato hiang keton tuntang akan keton mahalau kare nabi, kare rewar-Ku te.”

¹⁴Tapi Israel tuntang Yuda dia maku mahining. Ewen badungil kilau tato haing ewen je dia percaya dengan TUHAN, Hatallan ewen.

¹⁵Israel tuntang Yuda dia maku manumon parentah TUHAN tuntang dia baketep dengan janji je jari inampae dengan tato hiang ewen. Ewen dia paduli kare tingake, malengkan manempo kare dewa je dia baguna. Ewen manumon hadat kare bangsa intu hakaliling ewen, aloh TUHAN jari mangahanae.

¹⁶ Ewen malanggar uras parentah TUHAN, Hatallan ewen, tuntang manampa due sapi bara logam uka inyembah. Ewen manampa hampatong Dewi Asera, manyembah kare bintang tuntang sombayang intu Dewa Baal.

¹⁷ Ewen maluput kare anak ewen indu parapah akan dewa. Ewen mahapan kare kaji lampah tuntang balaku auh bara kare dukun je tau mantehau kare roh. Ewen paham rajin mawi kare taloh je dia manyanang atei TUHAN,

¹⁸sampai ie sangit toto dengan ewen tuntang ie dia tinai manantuani ewen. Ie manganan ewen bara tanah je inengae akan ewen; je batisa baya karajaan Yuda.

¹⁹Kare oloh Yuda mahin dia manumon kare parentah TUHAN, Hatallan ewen. Ewen manumon kare hadat ain oloh Isarel,

²⁰awi te TUHAN dia handak tinai mangaku hapus ungkup Israel. Ie mahukum tuntang manyarah ewen akan kare musoh ewen je tulas. Ie dia tinai manantuani ewen, malengkan manganan ewen bara tanah je inenga Awie akan ewen.

²¹Limbah TUHAN mamisah Israel bara Yuda, oloh Israel mangkat Yerobeam anak Nebat jadi rajan ewen. Palus Yerobeam mawi ewen malihi TUHAN tuntang malalus kare dosa je hai.

²²Ewen manumon sonto Yerobeam tuntang tetep malalus uras kare dosa je iawie,

²³sampai kajariae TUHAN dia tinai manantuani ewen, malengkan manganan ewen bara tanah je inenga akan ewen. Jete manjadi tumon pampingat je inenga TUHAN akan ewen mahalau kare rewar Ayue, kare nabi. Tumon te Israel imbit akan eka tawanan intu Asur, tuntang intu hete ewen melai sampai andau toh.

²⁴Kilau pangganti oloh Israel je jari iimbit akan eka tawanan te, raja Asur mandak kare oloh je bara Babel, Kuta Awa, Hamat, tuntang Saparwaim, intu lewu Samaria.[20] Kare oloh te melai lewu te tuntang manetep intu hete.

²⁵Metoh ewen harue melai intu hete, ewen dia mahormat TUHAN; awi te TUHAN mampadumah kare singa uka manangkarap belahe bara ewen.

²⁶Palus oloh mansanan akan raja Asur iete kare oloh je iinae intu kare lewu Samaria dia kasene kare parentah dewa lewu te. Jete bukue dewa te mampadumah singa uka manangkarap ewen.

²⁷Awi te raja Asur marentah mangat ije imam bara marak kare tawanan je jari imbuang akan Asur, ingirim haluli akan Samaria. “Soho ie buli tuntang melai intu hete, mangat ie tau majar kare oloh te tahiu kare parentah dewa lewu te,” koan raja.

²⁸Palus ije biti imam Isarel, je jari iimbit bara Samaria akan Asur, buli tuntang melai intu Betel. Intu hete ie majar rayat kilen ampin kapatut ewen manyembah TUHAN.

²⁹Tapi kare oloh je melai intu Samaria te tetep manyembah hampatong dewa ain ewen kabuat tuntang mingkese intu kare human dewa je impendeng awi oloh Israel je solake melai intu lewu te. Genep bitin oloh mawi hampatong dewae kabuat intu lewu je ielai ewen.

³⁰Oloh Babel mawi hampatong Dewa Sukot-Benot, oloh Kut mawi hampatong Nergal, oloh Hamat hampatong Asima,

³¹oloh Awa hampatong Nibhas tuntang Tartak, tuntang oloh Separwaim maluput kare anak ewen indu parapah je ingehu akan Dewa Adramelekh tuntang Anamelekh.

³²Beken bara manyembah kare dewa te, ewen manyembah TUHAN. Ewen mintih bara marak arep ewen are macam oloh je bagawi kilau imam tuntang akan maluput parapah intu kare human dewa.

³³Jadi ewen manyembah TUHAN, tapi kea ewen manyembah kare dewa ain ewen kabuat, tuntang kare hadat lewu eka asal ewen.

³⁴ Sampai andau toh ewen magon malalus hadat ewen. Ewen dia sombayang intu TUHAN, tuntang dia kea manumon kare atoran tuntang parentah je inenga akan turonan Yakob, je inggare kea Israel.

³⁵ TUHAN jari mawi janji kalotoh dengan ungkup Israel, “Ela sombayang akan kare hatalla beken; ela sontop manyembah ewen atawa paduli ewen, atawa maluput parapah akan ewen.

³⁶ Keleh mahormat Aku, TUHAN, je jari mimbit keton balua bara Misir hapan kuasa je hai. Sembah Aku tuntang luput parapah akang-Ku.

³⁷Numon harajur kare atoran tuntang kare parentah je jari inyurat-Ku akan keton. Ela sombayang akan kare hatalla beken,

³⁸tuntang ela kalapean janji helang aku dengan keton.

³⁹Numon auhku, TUHAN Hatallan keton, te aku akan malapas keton bara kare musoh keton.”

⁴⁰Tapi oloh lewu Samaria te dia maku mahining; ewen tetep mimbit hadat ewen kabuat.

⁴¹Jadi, ewen manyembah TUHAN, tapi kea manyembah kare dewan ewen. Sampai andau toh turonan ewen magon malalus taloh te.