Read Ngaju 2 RAJA-RAJA 18 Bible Online

2 RAJA-RAJA 18 - Ngaju bible

2 RAJA-RAJA 18

¹Intu nyelo katelo raja Husea anak Ela marentah Israel, Hiskia anak Ahas jadi raja akan karajaan Yuda.

²Katika te umure 25 nyelo tuntang ie marentah intu Yerusalem 29 nyelo katahie. Indue bagare Abia anak Sakharia.

³Hiskia mawi taloh je manyanang atei TUHAN kilau Raja Dawid tato hiange.

⁴ Ie mampahancor eka kare manyembah dewa tuntang manderep kare tihang batue hayak marusak kare hampatong Dewi Asera. Ie kea mampahancor handipe tambaga tampan Moses je inyewut Nehustan. Awi, sampai metoh te oloh Israel magon manotong garo akan mahormat handipe tambaga te.

⁵Hong marak kare raja Yuda, aloh je helo atawa je limbah Hiskia, jaton ije raja je sama kilau ie. Ie percaya dengan TUHAN, Hatallan Israel,

⁶tuntang baketep dengae. Dia puji ie malawan TUHAN. Kare parentah TUHAN je inengae mahalau Moses, inumon toto-toto awi Hiskia.

⁷Awi te TUHAN tetep mandohop ie sampai ie bahasil hong kare gawie. Ie mambarontak malawan raja Asur, tuntang dia maku mamenda ie.

⁸Ie mampakalah oloh Pilistin, tuntang marampok eka ewen melai, bara desa je paling korik sampai lewu je paling hai, tamput kea Gasa tuntang daerah hakalilinge.

⁹Hong nyelo kaepat Hiskia marentah, iete nyelo kauju Raja Hosea marentah Israel, Salmaneser Raja Asur manyarang Israel tuntang mangapong Samaria.

¹⁰Limbah ingapong telo nyelo katahie Samaria manjato. Jete manjadi hong nyelo kajahawen Hiskia marentah, tuntang nyelo kajalatien Hosea marentah.

¹¹Limbah te raja Asur mimbit oloh Israel jadi tawanan akan Asur; belahe bara ewen te iingkese intu lewu Halah, belahe intu tokep Sungei Habor intu wilayah Gosan, tuntang belahe tinai intu kare lewu hong tanah Madai.

¹²Samaria manjato awi oloh Israel dia manumon auh TUHAN, Hatallan ewen. Ewen malanggar janji je inampa TUHAN dengan ewen, tuntang ewen malanggar uras kare parentah Moses, reware. Ewen dia maku mahining tuntang dia maku manumon.

¹³Hong nyelo kaepat walas Hiskia raja Yuda marentah, kare lewu Yuda je hadinding batu inyarang tuntang impakalah awi Sanherib, raja Asur.

¹⁴Maka akan Sanherib je aton intu Lakhis, Hiskia mangirim barita toh, “Aku dia mawi kasalan. Awi te, aku balaku keleh tuan terai manyarang ikei. Uras kare auh lakun tuan akan inengaku. Sanherib tombah je Hiskia musti mangirim akae 10.000 kilogram perak, tuntang 1.000 kilogram amas.

¹⁵Awi te, uras kare amas je aton hong Human TUHAN tuntang intu huang kas istana ingirim awi Hiskia akan Sanherib.

¹⁶Amas intu kare batonggang Human TUHAN tuntang je jari ingkepan Hiskia kabuat intu kare batonggang lawang induae tuntang ingirim kea akan Sanherib.

¹⁷Tapi raja Asur te mangirim bara Lakhis ije pasukan hai uka manyarang Yerusalem. Pasukan te imimpin awi telo perwira pamimpin iete ije biti pangkalima, ije biti pamimpin taloh ihop,[21] tuntang ije biti pamimpin pangawal raja. Limbah sampai intu lewu te ewen manduan eka intu tana, je inyewut Tana Pinatu tokep parit jalan danum mahasor bara talaga hila hunjun.

¹⁸Palus ewen mangkariak mantehau Raja Hiskia. Balalu telo biti pagawai Hiskia balua manyondau ewen. Telo pagawai te iete Elyakim anak Hilkia pamimpin gawi huang istana, Sebna sekretaris karajaan, tuntang Yoah anak Asap sekretaris istana.

¹⁹Ije bara perwira Asur te hamauh dengan ewen, “Nyampai akan Hiskia auh raja Asur toh: ‘Mbuhen ikau mangkeme arepm abas?

²⁰Ikau mangira auhku tau mangganti siasat tuntang kaabas tantara? Eweh je iandal awim sampai ikau bahanyi malawan Asur?

²¹Ikau puna maharap pandohop Misir, tapi jete sama kilau mahapan batang tingen akan tongkeh; kareh tongkeh te akan bapelek tuntang lengem pajuk. Kalote raja Misir akan kakare oloh je maharap ie.’ ”

²²Limbah te perwira Asur te hamauh, “Atawa mikeh ikau hamauh je ikau harap dengan TUHAN, Hatallam. Katika Hiskia marentah mangat oloh Yuda tuntang Yerusalem baya sombayang intu hila baun mesbeh hong Yerusalem, en dia je inganae te mesbeh tuntang eka manyembah TUHAN kabuat?

²³Toh hapan aran raja Asur aku bahanyi bataroh je amon ikau inenga 2.000 kongan kuda, pasti ikau jaton bara oloh kalunen kare te uka manongkange!

²⁴Hapa malawan perwira ikei aloh je paling randah, ikau dia tandingae. Tapi ikau kea maharap Misir mangirim pandohop kareta parang tuntang pasukan bakuda!

²⁵Ikau mangira ikei manyarang tuntang mampakalah lewum dia dengan pandohop TUHAN? TUHAN kabuat je manyoho ikei manyarang tuntang mampahancore!”

²⁶Palus koan Elyakim, Sebna, tuntang Yoah dengan perwira te, “Tuan, hakotak ih hapan basa Aram dengan ikei, ikei harati ih. Ela mahapan basa Ibrani, tau kasenan rayat intu hunjun dinding lewu te.”

²⁷Koan perwira te, “En akan keton tuntang rajan keton bewei aku inyoho raja Asur uka manyampai kare auh toh? Dia! Aku kea hakotak dengan rayat je mondok intu dinding te, je hayak dengan keton akan kuman taie kabuat tuntang mihop danum kahite kabuat!”

²⁸Limbah te perwira te mendeng tuntang mangkariak hong basa Ibrani, “Hining taloh je insanan awi raja Asur:

²⁹‘Ela maku inanjaro awi Hiskia, ie dia tau manyalamat keton.

³⁰Ela mahining auh kataue uka maharap TUHAN. Ela mangira uka TUHAN manyalamat keton atawa mangahana tantara Asur marabut lewun keton.

³¹Ela mahining auh Hiskia. Aku, raja Asur manenga tirok mangat keton balua bara lewu tuntang manyarah. Kareh keton tau kuman bua anggor bara kabon keton kabuat, tuntang mangkeme bua ara bara batang bua ain keton kabuat, hayak mihop danum bara kalin danum ain keton kabuat,

³²sampai keton iindahku akan lewu je kilau lewun keton kabuat. Intu hete aton kabon anggor je mampalembut hasil anggor akan keton, tuntang kabun gandom je mahasil tepong akan panginan keton. Intu lewu te are batang saitun, undus saitun tuntang mado. Amon keton manumon taloh je iajarku akan keton, keton akan belom, dia matei. Ela mahining auh Hiskia! Ie baya manipu keton amon ie hamauh je TUHAN akan manyalamat keton.

³³En puji dewa bangsa beken manyalamat lewu bara kuasangku?

³⁴Hong kueh kare dewan lewu Hamat tuntang Arpad? Hong kueh kare dewan Separwaim, Hena tuntang Iwa? En aton je dumah manyalamat Samaria?

³⁵Dewa je kueh je puji malapas lewu bara kuasangku? Kueh tau TUHAN manyalamat Yerusalem?’ ”

³⁶Mahining auh te oloh lewu Yerusalem dia tombah, awi raja Hiskia jari marentah mangat ewen suni ih.

³⁷Maka Elyakim, Sebna, tuntang Yoah palus marabit pakaian ewen tanda kapehe atei. Ewen balalu haguet malapor akan raja tahiu taloh je jari insanan awi perwira Asur te.