Read Ngaju 2 RAJA-RAJA 19 Bible Online

2 RAJA-RAJA 19 - Ngaju bible

2 RAJA-RAJA 19

¹Metoh Raja Hiskia mahining laporan bara katatelo oloh te, ie marabit pakaiae tuntang hatapih karong tanda kapehe atei, palus haguet akan Human TUHAN.

²Limbah te ie manyoho Elyakim, kapala istana, Sebna sekretaris karajaan tuntang kare imam je jari bakas, uka manyondau Nabi Yesaya anak Amos. Ewen kea mahapan tapih karong.

³Jetoh peteh Hiskia je inyampai ewen akan Yesaya, “Andau toh andau kajake; itah ihukum tuntang inawah. Itah kilau oloh bawi je handak manak tapi lepah kaabase.

⁴Raja Asur jari manyoho ije biti perwira kapala ayue uka manawah Hatalla je belom. Eweh tawae TUHAN, Hatalla jari mahining auh tawah te, tuntang akan mahukum ewen je manyewut auh tawah te! Awi te keleh balakudoa intu Hatalla akan kare oloh itah je magon belom.”

⁵Limbah manarima peteh bara Raja Hiskia te,

⁶Yesaya manyoho kare sarohan te manyampai auh tombah toh, “TUHAN hamauh, Tuan Raja dia usah mikeh mahining kare auh rewar raja Asur te je TUHAN dia olih malapas itah.

⁷TUHAN akan mawi raja Asur manantuani ije kabar je mahalau kilau riwut sampai ie haluli akan lewue kabuat, tuntang intu hete ie akan impatei.”

⁸Perwira Asur te mandino kabar je rajae jari malihi Lakhis tuntang kanjerae parang malawan lewu Libna, dia kejau bara hete. Perwira te haguet akan hete uka manyondau rajae te.

⁹Raja Asur jari manarima kabar je pasukan Misir hong penda pimpinan Tirhaka raja Sudan metohe dumah uka manyarang ewen. Awi te, raja Asur mangirim surat akan Hiskia raja Yuda.

¹⁰Kalotoh auh surat te, “Ela buah tanjaro awi janji bara Hatallam je impatamam awim te je ikau dia akan manjato intu lengengku.

¹¹Ikau jari mahining iete genep lewu je inyarang raja Asur, impahancor samasinde. Ela manyangka ikau tau liwus!

¹²Metoh tato hiangku mampahancor lewu Gosan, Haran tuntang Resep, hayak mampatei oloh Eden je melai intu Telasar, jaton ije bara kare dewan ewen tau manyalamat ewen.

¹³Hong kueh kare raja lewu Hamat, Arpad, Serpawaim, Hena tuntang Iwa?”

¹⁴Hiskia manarima surat te bara kare sarohan, palus ie mambasae. Limbah te ie haguet akan Human TUHAN, tuntang mambirang surat te intu taharep TUHAN,

¹⁵ palus balakudoa koae, “TUHAN, Hatallan Israel, je mondok hunjun kerub,[22] ikau je tunggal Hatalla je manguasa hapus karajaan hong kalunen.

¹⁶TUHAN, keleh nantuani taloh je metohe manjadi buah ikei. Hining uras kare auh tawah Sanherib dengam, Hatalla je belom!

¹⁷Ikei uras katawan, TUHAN, je kare raja Asur jari mambinasa are bangsa tuntang mampahancor kare lewun ewen.

¹⁸Kare dewan ewen kea imapui tuntang impahancor, awi kare dewa te samasinde dia aton kuasae, ewen baya hampatong bara kayu tuntang batu tampan olon.

¹⁹O TUHAN, Hatallan ikei, lapas ikei bara kare oloh Asur te, mangat hapus bangsa hong kalunen katawan je baya ikau bewei tunggal Hatalla.”

²⁰Limbah te Yesaya mangirim peteh akan Raja Hiskia je kilau auh tombah akan lakudoan raja,

²¹TUHAN hamauh, “Lewu Yerusalem manatawe tuntang mahalalea ikau, Senherib.

²²Tawam eweh je ihababaka tuntang inawahm te? Aku, Hatallan Israel, Hatalla je barasih! Bajoho toto gawin intu taharep-Ku.

²³Ikau mangirim sarohan uka mangamburau je tagal are kareta parangm ikau jari mampakalah kare bukit je pangkagantonge intu Libanon. Ikau mampalecak arepm je ikau maneweng kare batang cemarae je paling gantong tuntang paling bahalap hayak manembus kare parak kayu je paling labat.

²⁴Ikau kea mampatamam arepm je ikau mangali kalin danum tuntang mihop danum intu kare lewun bangsa beken, tuntang kare tantaram mahunje Sungei Nil sampai teah.

²⁵En hindai puji ikau mahining je uras taloh te jari irencana-Ku bara horan? Tuntang toh Aku malaluse. Aku toh je manenga kuasa akam uka mampahancor kare lewu hadinding batu manjadi taloh je baduroh baderep.

²⁶Kareh oloh je melai intu hete nihau kaharape; ewen tarewen tuntang mikeh. Ewen kilau oru intu janah atawa oru je lembut intu sapau huma, je palus keang amon inampur riwut timor je balasut.[23]

²⁷Tapi Aku katawan uras tahiu arepm. Aku katawan taloh je iawim tuntang akan kueh ikau haguet.

²⁸Aku katawan je ikau rahas toto dengang-Ku, tuntang Aku jari mahining tahiu kalecakm te. Toh Aku mangkepan kawit intu urongm tuntang sombel intu nyamam, mangat manjijit ikau balua mahalau jalan je ihoroim metoh ikau dumah.”

²⁹Yesaya mangirim kea peteh toh akan Hiskia, “Jetoh je akan manjadi tanda akam. Nyelo toh tuntang nyelo naharep oloh akan kuman gandom je lembut kabuat. Tapi limbah te ewen akan mimbul gandom tuntang anggor hayak mangkeme hasile.

³⁰Oloh Yuda je magon belom akan belom sanang mangat kilau taloh imbul je handalem toto uhate tuntang mampalembut buae.

³¹Intu Yerusalem tuntang intu hunjun bukit Sion akan aton kare oloh je salamat, awi TUHAN jari manukas taloh je akan manjadi.

³²Jetoh je insanan TUHAN tahiu raja Asur; ‘Ie dia akan tame Yerusalem atawa malekas panahe manintu lewu te. Kare tantara je mahapan talawang jaton ije je olih manokep lewu te, tuntang intu hakalilinge dia akan imangun dinding hapa mangapong.

³³Raja Asur akan buli mahalau jalan je ihalaue metoh ie dumah, tuntang ie dia tame lewu te. Aku TUHAN jari hamauh.

³⁴Lewu Yerusalem akan iilang-Ku tuntang ingalindong-Ku tagal hormat akang-Ku kabuat tuntang tagal janjing-Ku dengan rewarku Dawid.’ ”

³⁵Alem te kea malekat TUHAN dumah akan eka kemah oloh Asur, tuntang mampatei 185.000 biti tantara. Hanjewu jewue kare hantu te hakalampah.

³⁶Palus Sanherib raja Asur undur tuntang buli akan Niniwe.

³⁷Sinde andau, metoh ie kanjerae sombayang intu huang human dewa Nisrokh, ie impatei hapan padang awi kare anake kabuat Adramelekh tuntang Sareser. Limbah te ewen hadari akan lewu Ararat. Esarhadon, anak hatuee je beken jadi raja mangganti ie.