Read Ngaju 2 RAJA-RAJA 2 Bible Online

2 RAJA-RAJA 2 - Ngaju bible

2 RAJA-RAJA 2

¹Maka katikae sampai akan TUHAN handak manggatang Elia akan sorga mahalau riwut pusok kanyawong. Metoh te Elia tuntang Elisa jari haguet bara Gilgal.

²Intu benteng jalan Elia hamauh dengan Elisa, “Keleh melai intu hetoh. Aku inyoho TUHAN haguet akan Betel.” Tapi Elisa tombah, “Tagal TUHAN je belom tuntang tagal hambaruan ayum, aku dia akan malihi ikau.” Awi te ewen haya-hayak marajur jalanane sampai akan Betel.

³Ije kalompok nabi je melai intu hete haguet manyondau Elisa tuntang misek, “En katawam je andau toh Tuan ayum akan malihi ikau awi ie ianggatang awi TUHAN?” “Yoh, aku katawan” Tombah Elisa. “Tapi jadi ih dia usah itah manahiu taloh te.”

⁴Limbah te Elia hamauh dengan Elisa, “Melai intu hetoh, aku inyoho TUHAN haguet akan Yerikho.” Tapi Elisa tombah, “Tagal TUHAN ije belom tuntang tagal hambaruam, aku dia akan malihi ikau.” Ewen due palus marajur jalanae sampai Yerikho.

⁵Ije kalompok nabi je melai intu hete haguet manyondau Elia tuntang misek, “En katawam je andau toh Tuan ayum akan ianggatang Hatalla tuntang malihi ikau?” “Yoh, aku katawan,” tombah Elisa. “Tapi jadi ih, dia usah itah manahiu taloh te.”

⁶Limbah te Elia hamauh dengan Elisa, “Melai intu hetoh. Aku inyoho TUHAN haguet akan Sungei Yordan.” Tapi Elisa tombah, “Tagal TUHAN ije belom tuntang tagal hambaruam, aku dia akan malihi ikau.” Ewen palus marajur jalanae sampai Sungei Yordan,

⁷tuntang 50 biti nabi manuntut ewen. Palus Elia tuntang Elisa tende intu saran sungei, tuntang lime puluh nabi te mendeng dia pire kakejaue bara hete.

⁸Elia mengkak jubahe, palus mambaloe tuntang mahambate akan hunjun sungei te. Balalu danum sungei te tabagi due, sampai ie tuntang Elisa tau mananjong intu petak je keang.

⁹ Limbah sampai intu dipah silae, Elia hamauh dengan Elisa, “Laku taloh je ingahandakm bara aku helo bara aku ianggatang TUHAN tuntang malihi ikau!” Elisa tombah, “Waris kuasam akangku, mangat aku tau jadi oloh je tau mangganti[2] ikau.”

¹⁰“Bah, jete bahali toto,” tombah Elia. “Tapi amon ikau mite aku metoh TUHAN manggatang aku, palakum te akan inenga. Amon ikau dia nampayah, palakum te akan inolak.”

¹¹Sambil mananjong, ewen due tetep pande-pander. Salenga ije kareta apui je injijit awi kuda baputi dumah mamisah ewen due palus Elia ianggatang akan sorga awi riwut pusok kanyawong.

¹² Elisa mitee palus mangkariak, “Elia, Bapaku! Bapaku! Pangalindong Israel je abas! Bapa jari jaton!” Palus Elia lilap bara tampayah Elisa. Dengan kapehen atei Elisa marabit jubahe sampai sila due,

¹³palus manyumpot jubah Elia je manjato. Limbah te ie haluli tuntang mendeng intu saran Sungei Yordan,

¹⁴palus mamukul jubah Elia te akan hunjun danum hayak hamauh, “Intu kueh TUHAN, Hatallan Elia te?” Limbah ie mamukul jubah akan danum te, danum te tabagi due tuntang ie mananjong akan dipah silae.

¹⁵Kalime puluh nabi intu Yerikho te mitee, palus hamauh, “Kuasan Elia jari bindah akan Elisa!” Ewen manalih ie palus sontop intu taharepe

¹⁶tuntang hamauh, “Ikei aton 50 biti, urase aba-abas. Awi te, keleh itah haguet manggau Elia tuan ayum te. Mungkin Roh TUHAN jari mimbit ie akan bukit atawa janah, palus malihi ie intu hete.” “Dia usah!” tombah Elisa.

¹⁷Tapi ewen tetep hajajuan ie sampai ie nahuang. Palus lime puluh biti nabi te haguet manggau Elia katahin telo andau, tapi ewen dia sondau ie.

¹⁸Palus ewen haluli manalih Elisa je magon mentai intu Yerikho. “En dia aku jari hamauh, je keton dia usah haguet?” koan Elisa dengan ewen.

¹⁹Pire-pire biti oloh bara Yerikho dumah manalih Elisa tuntang hamauh, “Pa, kilau bapa jari mitee kabuat lewu toh bahalap, tapi danume dia bahalap tuntang mawi oloh bawi je batihi, mangelus.”

²⁰“Duan mangkok je magon taheta,” koan Elisa, “ina uyah intu huange.” Palus ewen mimbit taloh je ilakue te akae.

²¹Elisa balalu haguet akan tahasak danum tuntang manjakah uyah te akan danum hayak hamauh, “Jetoh je insanan TUHAN: ‘Aku mahalalian karasih danum toh mangat dia tinai mawi sabab oloh matei atawa mangelus!’ ”

²²Bara katika te danum te barasih tumon kare auh Elisa.

²³Limbah te Elisa haguet bara Yerikho akan Betel. Intu benteng jalan ije kalompok anak oloh balua bara lewu tuntang mahalalea ie. “O borang, borang, dari bara hetoh!” kariak ewen.

²⁴Elisa tampaliau tuntang manampayah ewen palus manyapa ewen tagal aran TUHAN. Metoh te kea due kongan singa bawi balua bara parak kayu tuntang mamisak epat puluh due biti anak bara kare anak oloh te.

²⁵Elisa marajur jalanae akan bukit Karmel, limbah te haluli akan Samaria.