Read Ngaju 2 RAJA-RAJA 20 Bible Online

2 RAJA-RAJA 20 - Ngaju bible

2 RAJA-RAJA 20

¹Lakau katika te Raja Hiskia buah baluyong je paham sampai bilak matei. Nabi Yesaya anak Amos maja ie tuntang hamauh, “TUHAN mameteh mangat Tuan Raja mamparasih kakare gawi, awi Tuan Raja dia baka keleh. Dia tahi tinai Tuan Raja matei.”

²Hiskia mules akan dinding palus balakudoa,

³“TUHAN, ingat je aku toh jari manempo ikau hapan kaketep tuntang katoton atei. Aku harajur bagawi manumon kahandakm.” Palus Hiskia manangis kapehe ateie.

⁴Yesaya malihi Hiskia, tapi helo bara ie balua bara perantaran istana, TUHAN manyoho ie haluli manalih Hiskia,

⁵rajan ungkup TUHAN, tuntang manyampai peteh toh, “Aku, TUHAN, Hatalla je inyembah Dawid tato hiangm, jari mahining auh lakudoam tuntang mite danum matam. Aku akan mampakeleh ikau; limbah jewu ikau haguet talih Humang-Ku.

⁶Aku akan mandahang umurm 15 nyelo tinai. Ikau tuntang lewu Yerusalem akan ilapas-Ku bara raja Asur. lewu toh akan ingalindong-Ku tagal hormat akang-Ku kabuat tuntang tagal janjing-Ku dengan rewar-Ku Dawid.”

⁷Palus Yesaya manyoho oloh mahamis bua ara tuntang mangasaie intu baluyong raja mangat ie keleh.[24]

⁸Raja Hiskia misek, “En tandae je TUHAN mampakeleh aku tuntang je limbah jewu aku tau manalih Human TUHAN tinai?”

⁹Yesaya tombah, “TUHAN akan manenga tanda akan Tuan Raja je Ie manggenep janjin Aie. Toh, je kueh je ingahandak Tuan Raja: en kangkalingen intu paninjok jam matanandau tampan Raja Ahas maju 10 garis atawa mundur 10 garis?”

¹⁰Hiskia hamauh, “Akan manampa kangkalingen te maju 10 garis, murah ih. Awi te tampa ie mundur 10 garis.”

¹¹Yesaya balakudoa intu TUHAN, palus TUHAN manampa kangkalingen te mundur 10 garis intu paninjok jam matanandau te.

¹²Lakau katika te raja Babel, iete Merodakh-Baladan anak Baladan mahining je raja Hiskia harue keleh bara kahabae. Ie manyoho oloh uka mimbit surat tuntang hadiah akan Hiskia.

¹³Hiskia manyambut kare sarohan te tuntang mamparahan akan ewen hapus panataue, iete amas tuntang perak, rarampah tuntang minyak harum, tuntang hapus sanjata tantarae. Ije mahin dia je intu istana tuntang intu hapus karajaae je dia imparahae akan ewen.

¹⁴Limbah te Nabi Yesaya manaharep Raja Hiskia tuntang misek, “Bara kueh kare oloh te? Narai koan ewen?” Hiskia tombah, “Ewen bara Babel, lewu je kejau.”

¹⁵“Ewen manampayah narai intu istana?” pisek Yesaya tinai. “Taloh samandiai!” tombah Hiskia. “Jaton ije je huang panatau istana je dia imparahangku akan ewen.”

¹⁶Palus Yesaya hamauh dengan raja, “TUHAN hamauh, iete

¹⁷ akan dumah katikae hapus panatau huang istana tuntang je jari imumpong tato hiangm sampai andau toh, iimbit akan Babel. Jaton ije je tapalihi.

¹⁸ Bara anak esom aton je akan induan tuntang iawi jadi pagawai istana uka mandohop oloh Babel.”

¹⁹Raja Hiskia tombah, “Bahalap kea peteh TUHAN je inyampaim akangku.” Ie tombah kalote awi ie manirok: “Asal karajaangku tetep sanang tuntang damai katahin aku belom.”

²⁰Sarita je beken tahiu Raja Hiskia, tahiu kare gawin kamentenge, tuntang kilen ampie ie manampa talaga mahapan pipa danum akan lewu, urase incatet huang buku Sejarah Kare Raja Yuda.

²¹Hiskia matei, palus Manase anake jadi raja mangganti ie.