Read Ngaju 2 RAJA-RAJA 21 Bible Online

2 RAJA-RAJA 21 - Ngaju bible

2 RAJA-RAJA 21

¹Manase 12 nyelo umure metoh ie jadi raja Yuda tuntang ie marentah intu Yerusalem 55 nyelo katahie.

² Manase mawi dosa intu taharep TUHAN, awi ie manumon kare hadat papa kare bangsa je iharak TUHAN bara Kanaan metoh oloh Israel tame lewu te.

³Kare eka manyembah dewa je jari impalomos Hiskia bapae imangue tinai. Ie mampendeng kare mesbeh akan eka sombayang akan Baal; ie mawi hampatong Dewi Asera, kilau je ilalus awi Ahab raja Israel. Manase kea manyembah kare meto.

⁴ TUHAN jari hamauh je Yerusalem te eka Ie aton dumah tuntang eka sombayang Akae. Tapi intu hete, hong Human TUHAN te, Manase jari mampendeng kare mesbeh akan kare dewa.

⁵Intu kadue parantaran Human TUHAN te ie mampendeng kare mesbeh akan eka manyembah kare bintang.

⁶Anake iluput akan indu parapah je ingehu. Manase kea malalus gawin dukun tuntang kaji lampah, tuntang balaku tanda bara kare roh. Ie paham badosa intu TUHAN sampai mampalembut kasangit Aie.

⁷ Lambang Dewi Asera iinae intu huang Human TUHAN, padahal tahiu eka te TUHAN jari hamauh dengan Dawid tuntang Salomo anake “Humang-Ku tuntang lewu Yerusalem toh, je jari intih-Ku bara marak wilayah kadue walas bangsa Israel, jete eka je inukas-Ku kilau eka sombayang manyembah Aku.

⁸Tuntang amon ungkup Israel manumon uras kare parentah-Ku hayak manumon kare atoran je inenga Moses rewar-Ku akan ewen, te Aku dia akan manalua ewen iharak bara lewu je inenga-Ku akan tato hiang ewen.”

⁹Tapi oloh Yuda dia manumon auh TUHAN, tuntang Manase mawi sabab ewen mawi kare dosa je labih papa haream bara kare dosa je iawi kare bangsa je iharak TUHAN bara Kanaan metoh ungkup Israel tame kare lewue.

¹⁰Awi te mahalau kare nabi, kare rewar TUHAN, TUHAN hamauh,

¹¹“Raja Manase papa toto. Gawie labih papa haream bara kare gawin oloh Kanaan. Mahapan kare hampatong dewa je inampae, ie mawi sabab oloh Yuda mawi dosa.

¹²Awi te Aku, TUHAN je inyembah awi ungkup Israel, akan mampadumah calaka je hai toto akan Yerusalem tuntang Yuda sampai genep oloh je mahining tahiu taloh te akan tarewen.

¹³Yerusalem akan ihukum-Ku kilau Aku mahukum Samaria tuntang Ahab raja Israel dengan turunae. Yerusalem akan inganang-Ku kilau piring je jari enyau tuntang inambalik.

¹⁴Oloh lewue je magon melai akan inalua-Ku jadi panginan kare musohe, je akan marampok ewen tuntang lewun ewen.

¹⁵Uras taloh te akan ilalus intu ungkup-Ku awi ewen mawi dosa intu taharep-Ku tuntang mampalembut kasangit-Ku bara katika tato hiang ewen balua bara Misir sampai andau toh.”

¹⁶Beken bara mawi oloh Yuda badosa dengan TUHAN awi manyembah dewa, Manase kea mampatei are oloh je dia sala sampai daha mahasor akan hete-hete intu Yerusalem.

¹⁷Sarita je beken tahiu Raja Manase tuntang tahiu kare dosa je iawie, incatet huang buku Sejarah Kare Raja Yuda.

¹⁸Manase matei tuntang ingubur intu taman istana, iete taman Usa. Anake je bagare Amon manjadi raja mangganti ie.

¹⁹Amon umure 22 nyelo katika ie jadi raja Yuda tuntang ie marentah intu Yerusalem due nyelo katahie. Indue bagare Mesulemet anak Harus, oloh Yotba.

²⁰Kilau bapae, ie kea badosa intu taharep TUHAN.

²¹Ie manyonto kare gawin bapae, tuntang manyembah kare dewa je inyembah bapae.

²²Ie dia belom manumon kahandak TUHAN, tapi malihi TUHAN haream, Hatalla je inyembah awi tato hiange.

²³Kare pagawai Raja Amon pakat malawan ie tuntang mampatei ie intu istana.

²⁴Tapi rayat Yuda mampatei kare oloh je mamuno Raja Amon te, palus mangkat Yosia anake jadi raja.

²⁵Sarita je beken tahiu Amon incatet huang buku Sejarah Kare Raja Yuda.

²⁶Amon ingubur huang kubur intu taman Usa. Yosia anake jadi raja mangganti ie.