Read Ngaju 2 RAJA-RAJA 23 Bible Online

2 RAJA-RAJA 23 - Ngaju bible

2 RAJA-RAJA 23

¹Raja Yosia mantehau uras kare pamimpin Yuda tuntang Yerusalem.

²Palus ie haguet dengan ewen akan Human TUHAN, inuntut awi kare imam, kare nabi tuntang hapus rayat, aloh je belom susah atawa je tatau. Intu taharep ewen samandiai, tokep jihi je tantai akan raja, raja mendeng tuntang mambasa hapan hai auhe kakare taloh je huang buku janji je tarasondau intu huang Human TUHAN. Limbah te raja mawi janji dengan TUHAN uka manumon auh Ayue, tuntang malalus hapan salepah atei tuntang salepah hambaruae kakare parentah tuntang kare atoran Aie. Raja kea hajanji uka manggenep kapatut tumon janjin TUHAN dengan ungkup Ayue je tarasurat huang buku te. Hapus rayat omba hajanji uka manumon auh janji te.

⁴ Limbah te raja marentah Imam Hai Hilkia, kare imam pambantu tuntang kare pangawal je bagawi intu batonggang Human TUHAN, mangat mampalua bara huma te uras kare pakakas je ihapan akan manyembah Baal, Dewi Asera, tuntang kare bintang. Uras kare ramo te imapui awi Raja Yosia hong luar lewu tokep janah Kidron, palus kawoe iimbit akan Betel.

⁵Ie mampaterai kare imam je jari iangkat awi kare raja Yuda uka bagawi hong eka manyembah dewa intu kare lewu Yuda tuntang tokep Yerusalem. Kalote kea kare imam je maluput parapah akan Baal, matanandau, bulan, planit, tuntang kare bintang.

⁶Hampatong Dewi Asera impaluae bara Human TUHAN, tuntang iimbit akan luar lewu, akan janah Kidron. Intu hete hampatong te ingehu, palus buringe inepe rote-rotek, tuntang kawoe imbowor akan hunjun kubur oloh.

⁷Kare kamar huang Human TUHAN je ihapan awi kare lontei human dewa ekae habandong kilau gawi manyembah dewa, impahancor. (Hong kare kamar te kare oloh bawi manali benang aka ihapan huang gawi manyembah Dewi Asera).

⁸Uras kare imam je melai intu lewu Yuda inyoho awi Yosia dumah akan Yerusalem, palus hong hete-hete hapus lewu Yuda ie mamapa kare mesbeh dewa eka kare imam te jari maluput parapah, kare imam te dia ie manyohoe malalus sombayang intu Human TUHAN. Tapi, ewen tau kuman rote dia baragi je inatap akan kare sobat ewen. Kare mesbeh je tantai akan manyembah dewa tokep Lawang Yosua, wakil lewu hong lewu te, inderep. Lawang te aton hila sambil Lawang je Mambatang hong jalan tame lewu.

¹⁰ Topet, iete eka manyembah dewa hong Janah Hinom, imapa. Awi te jaton tinai oloh je tau maluput anake indu parapah je ingehu akan Dewa Molokh.

¹¹Uras kuda je imisah awi raja Yuda akan hapa manyembah matanandau inganan, tuntang kare kareta je ihapan huang gawi manyembah te inusul. (Kare kareta te aton intu hila balikat Human TUHAN — tokep lawang — dia kejau bara kare kamar eka melai Natan Melekh, ije biti pagawai je gantong pangkate).

¹² Kare mesbeh je imangun awi kare raja Yuda intu sapau hong hunjun kare kamar Raja Ahas, impahancor. Kea kare mesbeh je impendeng awi Raja Manase intu hila kadadue balikat Human TUHAN, impahancor awi Yosia, palus inganan akan Janah Kidron.

¹³ Kea kare mesbeh intu hila timor Yerusalem, hila Salatan Bukit Kapapa[25] imparusak. Kare mesbeh te impedeng awi raja Salomo akan menyembah kare dewa je bakajile-jilek — iete Astoret dewi bangsa Sidon, Kamos dewa bangsa Moab, tuntang Milkon dewa bangsa Amon.

¹⁴Kare tugu dewa tuntang hampatong Dewi Asera inderep; palus hong petak eka kare tugu tuntang kare hampatong te impendeng, inimbun Yosia hapan kare tulang kalunen.

¹⁵ Ie kea mamparusak eka kare gawi manyembah hong Betel je impendeng awi Raja Yerobeam anak Nebat — raja je jari mawi sabab oloh Israel mawi dosa. Palus Yosia mamusit mesbeh intu eka gawi manyembah te.

¹⁶ Limbah te Yosia tampaliau, tuntang mite pire-pire kubur intu hunjun bukit. Palus ie manyoho oloh mongkar kubur te, tuntang mampalua kare tulange palus manusole intu mesbeh je magon belom apuie te. Kalote carae ie mamapa mesbeh te. Taloh je inujum bihin awi nabi TUHAN palus manjadi, iete tujum metoh raja Yerobeam mendeng tokep mesbeh te hong ije pesta.[26] Limbah te Raja Yosia mite ije kubur beken tinai.

¹⁷ Palus ie misek, “Kubur eweh toh?” Kare oloh Betel te tombah, “Jete kubur ije biti nabi ain TUHAN je puji dumah akan hetoh bara Yuda, tuntang manujum kare taloh je harue ih ilalus awi Tuan Raja dengan mesbeh toh”.

¹⁸“Ela mangguleie kubur te,” parentah raja. “Nauhe kare tulange intu hete, ela mindahe!” Palus kare tulang nabi bara Yuda te dia inggulei; kalote kea kare tulang nabi bara Samaria je ingubur intu hete.

¹⁹Intu genep lewu hong Israel, Raja Yosia manderep uras kare eka manyembah dewa je imangun awi kare raja Israel, tuntang je mawi sabab TUHAN sangit. Taloh je jari ilalus awi Raja Yosia hong Betel, jete ilaluse kea intu kare mesbeh hong hapus Israel.

²⁰Uras kare imam je bagawi intu kare eka manyembah dewa impatei intu hunjun kare mesbeh eka ewen bagawi. Tuntang hong genep mesbeh te Yosia mamapui kare tulang olon. Limbah te ie buli akan Yerusalem.

²¹Limbah te Raja Yosia marentah rayat uka mahaga Pesta Paska sama kilau je tarasurat huang buku Janji Dengan TUHAN. Tumon te ewen mahormat TUHAN, Hatallan ewen.

²²Bara wayah bangsa Israel irentah awi kare pahlawan hindai puji aton raja Israel atawa raja Yuda je mahaga Pesta Paska kilau te.

²³Baya hong nyelo kahanyawalas Yosia marentah te harue Pesta Paska ihaga tinai intu Yerusalem hapa mahormat TUHAN.

²⁴Uka malalus kare parentah je tarasurat huang buku je inyondau awi Imam Hai Hilkia intu Human TUHAN, uras tukang tawor tuntang tukang tujum iharak awi Raja Yosia bara Yerusalem tuntang bara hapus tanah Yudea. Palus ie manganan uras kare dewa keluarga, hampatong dewa, tuntang kare ramo je hapa manyembah dewa.

²⁵Hindai puji aton raja je kilau Raja Yosia je manempo TUHAN hapan salepah atei, tuntang mamparahan jete huang carae belom tuntang huang gawie, tumon kakare parentah je aton hong Buku Moses. Limbah Raja Yosia kea, jaton tinai raja je kilau ie.

²⁶Tapi gawin Raja Manase jari mampalembut kasangit TUHAN dengan Yuda; tuntang kasangit te hindai belep.

²⁷TUHAN hamauh, “Taloh je jari ilalusku dengan Israel, akan ilalus-Ku kea dengan Yuda. Oloh Yuda akan inganan bara lewu je jari inenga-Ku akan ewen. Aku akan manolak Yerusalem lewu je iintih-Ku, eka humang-Ku toh, je tumon koang-Ku akan jadi eka sombayang akang-Ku.”

²⁸Raja Yosia matei hong parang intu Megido metoh ie haguet mamarang Nekho, raja Misir je metohe miar dengan tantarae uka mandohop raja Asur intu saran Sungei Euprat. Hantun Raja Yosia induan awi kare pagawaie palus iimbit buli hapan kareta akan Yerusalem. Intu hete ie ingubur intu kubur kare raja. Palus rayat Yuda mintih tuntang mangkat Yoahas anake jadi raja mangganti ie. Sarita je beken tahiu Yosia incatet huang buku Sejarah Kare Raja Yuda.

³¹Yoahas umure 23 nyelo metoh ie jadi raja Yuda, tuntang ie marentah hong Yerusalem telo bulan katahie. Indue bagare Hamutal anak Yeremia bara lewu Libna.

³²Yoahas badosa dengan TUHAN kilau tato hiange.

³³Kalepah gawin Yoahas marentah hapus katika Nekho raja Misir manawan ie intu Ribla, hong daerah Hamat, tuntang mamaksa Yuda mambayar pajak akae 3.400 kilogram perak tuntang 34 kilogram amas.

³⁴ Limbah te Raja Nekho mangkat anak raja Yosia je bagare Elyakim jadi raja Yuda, tuntang mobah aran Elyakim jadi Yoyakim. Yoahas iimbite akan Misir tuntang intu hete ie malihi kalunen.

³⁵Uka mambayar pajak je ilaku awi Misir, Raja Yoyakim manduan pajak bara rayat manumon kaolih genep bitin ewen.

³⁶ Yoyakim umure 25 nyelo metoh ie jadi raja Yuda, tuntang ie marentah intu Yerusalem 11 nyelo katahie. Indue bagare Sebuda, anak Pedaya bara lewu Ruma.

³⁷Yoyakim mawi dosa dengan TUHAN kilau tato hiange.