Read Ngaju 2 RAJA-RAJA 24 Bible Online

2 RAJA-RAJA 24 - Ngaju bible

2 RAJA-RAJA 24

¹ Katahin Raja Yoyakim marentah, Nebukadnesar raja Babel manyarang tuntang mampakalah Yuda. Telo nyelo katahie Yoyakim mamenda Raja Nebukadnesar, tapi limbah te ie mambarontak.

²TUHAN mangirim are garombolan je mahapan sanjata bara bangsa Babel, Siria, Moab, tuntang Amon uka malawan Yoyakim tuntang mambinasa Yuda, tumon taloh je jari insanae mahalau kare nabi reware.

³Puna kare taloh te musti manjadi, awi TUHAN jari mansanan je bangsa Yuda akan inganan bara lewu je jari inenga TUHAN akan ewen. Ewen inganan tagal kare dosa je jari iawi Raja Manase;

⁴je mambatang tagal uras kare pampatei je iawie dengan kare oloh je dia bara kasalan. TUHAN dia maku mampun Manase tagal kare gawie te.

⁵Hapus kare eka, bara Sungei Euprat sampai hila watas Misir hila utara je tame wilayah je inguasa awi raja Misir, inguasa awi raja Babel. Awi te raja Misir dia puji tinai balua bara lewue uka haguet parang. Sarita beken tahiu Raja Yoyakim incatet hong buku Sejarah Kare Raja Yuda. Limbah Yoyakim matei, anake hatue je arae Yoyakhin jadi raja mangganti ie.

⁸Yoyakhin umure 18 nyelo katika ie jadi raja Yuda, tuntang ie marentah intu Yerusalem telo bulan katahie. Indue bagare Nehusta anak Elnatan, bara Yerusalem.

⁹Kilau bapae Yoyakhin kea badosa dengan TUHAN.

¹⁰Hong wayah pamarentahan Yoyakhin, pasukan Babel je imimpin awi kare perwira Nebukadnesar, miar manyarang Yerusalem, tuntang mangapong lewu te.

¹¹Hemben lewu te ingapong, Nebukadnesar kabuat dumah akan Yerusalem.

¹² Palus Raja Yoyakin dengan indue, kare anake, kare perwirae dengan kare pegawai istana, manyarah arep ewen akan Nebukadnesar. Palus Yoyakhin inawan. Hal te manjadi hong nyelo kahanya pamarentahan Nebukadnesar.

¹³Uras pakakas amas je inampa awi Raja Salomo akan Human TUHAN, irusak awi Nebukadnesar. Palus uras kare ramo je barega je aton intu huma te tuntang intu istana iimbite akan Babel. Uras taloh te manjadi tumon taloh je jari insanan TUHAN helo bara te.

¹⁴ Raja Yoyakhin, indue, kare sawae, kare pagawaie, tuntang kare pamimpin Yuda — urase 7.000 biti oloh basewut — inawan tuntang iimbit akan Babel. Kea kare oloh pintar tuntang kare tukang sanaman karee 1.000 biti, uras kare oloh je aba-abas tuntang menteng mamot akan parang. Kare oloh turonan raja, tuntang kare oloh hai kea iimbit akan parang samandiaie aton 10.000 biti. Bilak uras oloh lewu Yerusalem iimbit, je melai lewu baya rayat je paling susah belom.

¹⁷ Limbah te Nebukadnesar mangkat Matanya, mama Yoyakhin, jadi raja Yuda, tuntang mobah arae jari Sedekia.

¹⁸ Sedekia umure 21 nyelo katika ie jadi raja Yuda. Ie marentah intu Yerusalem 11 nyelo katahie. Indue bagare Hamutal anak Yeremia bara lewu Libna.

¹⁹Kilau raja Yoyakim, Raja Sedekia kea badosa dengan TUHAN.

²⁰ TUHAN sangit toto dengan oloh lewu Yerusalem, tuntang oloh Yuda, sampai Ie dia tinai manantuani ewen.