Read Ngaju 2 RAJA-RAJA 25 Bible Online

2 RAJA-RAJA 25 - Ngaju bible

2 RAJA-RAJA 25

¹ Limbah te Sedekia mambarontak taharep Nebukadnesar raja Babel. Awi te Nebukadnesar dengan hapus pasukan parange dumah tuntang manyarang Yerusalem hong tanggal sapuluh bulan sapuluh hong nyelo kajalatien Sedekia marentah. Ewen mampendeng markas intu luar lewu, mamangun dinding hapa mangapong;

²ewen mangapong lewu te sampai nyelo kajalatien walas Sedekia marentah.

³Hong tanggal jalatien bulan epat nyelo te kea metoh lau jari paham toto sampai rayat jaton taloh kinan samasinde,

⁴ dinding lewu te inelak musoh. Alem te, aloh oloh Babel metohe mangapong lewu te, uras tantara Yuda hadari manintu Janah Yordan. Ewen mahoroi jalan mahalau kabon istana, palus balua mahalau lawang je manontong due kalapis dinding batu lewu te.

⁵Tapi tantara Babel manggoang Raja Sedekia, tuntang manawan ie intu petak rampar Yerikho. Uras oloh ayue hadari malihi ie.

⁶Limbah Raja Sedekia iimbit manalih Raja Nebukadnesar intu lewu Ribla, palus ie ihukum matei.

⁷ Kare anake impatei intu taharep baue. Limbah te Sedekia ingaroit matae, palus imasung tuntang iimbit akan Babel.

⁸Hong tanggal uju bulan lime intu nyelo kajalatien walas Nebukadnesar raja Babel marentah, te dumah akan Yerusalem ije biti oloh je bagare Nebusaradan. Ie te panasehat tuntang pangkalima tantara Nebukadnesar.

⁹ Nebusaradan manusul Human TUHAN, istana raja tuntang human kakare oloh hai hong Yerusalem.

¹⁰Palus uras kare oloh ayue manderep kare dinding lewu te.

¹¹Limbah te rayat je magon intu lewu, iete kare oloh pintar je bagawi,[27] kare oloh je belom susah tuntang kare oloh je jari hadari akan pihak oloh Babel, urase iimbit akan Babel awi Nebusaradan.

¹²Tapi belahe bara rayat je paling susah belom tuntang jaton ramon panataue, ilihi intu Yuda; ewen inyoho mawi kabon anggor tuntang kare tana.

¹³ Kare jihi tambaga tuntang kare kareta intu Human TUHAN hayak dengan balanai tambaga imusit awi oloh Babel, palus uras kare tambaga iimbit akan lewun ewen.

¹⁴ Ewen kea mimbit kare ramo toh: kare skop, eka kare kawo mesbeh, kare pakakas sumbo, kare mangkok eka mina dahan meto je inyambalih indu parapah, kare mangkok hapa manotong garo, tuntang kare ramo tambaga je beken je ihapan akan sombayang.

¹⁵Kare ramo amas tuntang perak, tatame kare mangkok korik tuntang kare piring akan barah apui induan awi Nabusaradan kabuat.

¹⁶Kare ramo tambaga je inampa awi Raja Salomo akan Human TUHAN, iete kadadue jihi, kare kareta tuntang balanai hai, urase paham babehat sampai dia taratimbang.

¹⁷Kadadue jihi tambaga te sama; gagenepe 8 meter kapanjange, dengan ije takolok jihi bara tambaga 1,3 meter kapanjange. Hakaliling genep takolok jihi te aton daree je mahapan hiasan bua delima bara tambaga.

¹⁸Beken bara te, Nabusaradan manawan Imam Hai Seraya, Sepanya imam pambantue, telo biti tukang jaga batonggang Human TUHAN, lime panasehat pribadi raja je magon aton intu lewu, pangkalima, wakil pangkalima je manantuani administrasi tantara, tuntang 60 oloh hai je beken.

²⁰Uras kare oloh te iimbite akan Raja Nebukadnesar hong lewu Ribla,

²¹intu hete ewen inyiksa palus impatei. Tumon te kare oloh Yuda iunda bara lewun ewen tuntang iimbit akan eka tawanan.

²² Limbah te Raja Nebukadnesar mangkat Gedalya anak Ahikam tuntang eson Sapan, jadi gubernur intu Yuda uka marentah uras kare oloh je magon melai intu hete.

²³Metoh kare perwira tuntang tantara Yuda je dia manyarah arepe akan Babel mahining tahiu gubernur taheta te, ewen uras dumah tangguh Gedalya intu Mispa. Kare perwira te iete Ismael anak Natanya, Yohanan anak Kareah, Seroya anak Tanhumet bara lewu Netopa, tuntang Yasanya bara lewu Maakha.

²⁴Palus Gedalya hamauh dengan ewen handiai, “Keton dia usah mikeh dengan kare pajabat pamarentah Babel. Melai ih intu lewun itah toh tuntang keleh jadi rewar raja Babel. Aku manjamin keton akan salamat.”

²⁵ Tapi hong bulan kauju nyelo te Ismael anak Netanya tuntang eson Elisama je magon turonan raja, haguet hayak 10 biti oloh akan Mispa. Ewen manyarang tuntang mampatei Gedalya intu hete.

²⁶ Balalu hapus rayat Yuda, oloh tatau atawa je belom susah, haya-hayak dengan kare perwira hadari akan Misir awi mikeh dengan oloh Babel.

²⁷Hong tanggal due puluh uju bulan due walas hong nyelo katelo puluh uju limbah Yoyakhin iimbit akan eka tawanan, Ewil-Merodakh jadi raja Babel. Hong nyelo te kea ie mamparahan kataue dengan Yoyakhin, tuntang malapas ie bara penjara,

²⁸hayak inantuani dengan bahalap. Yoyakhin inengae pangkat je labih gantong bara kare raja beken je omba iunda akan Babel.

²⁹Yoyakhin dia tinai mahapan pakaian penjara tuntang harajur kuman intu istana hayak inenga duit je akan ihapae belom.