Read Ngaju 2 RAJA-RAJA 3 Bible Online

2 RAJA-RAJA 3 - Ngaju bible

2 RAJA-RAJA 3

¹Intu nyelo kahanyawalas Yosapat marentah karajajaan Yuda, Yoram anak Ahab jadi raja hong Israel tuntang marentah intu Samaria due walas nyelo katahie.

²Ie mawi taloh je papa intu tampayah TUHAN. Tapi ie dia sampai kilau kapaham Ahab tuntang Isebel oloh bakase. Hampatong je inampa bapae hapa manyembah Baal jari inderepe.

³Tapi kilau Yerobeam anak Nebat je marentah helo bara ie, ie kea mawi sabab oloh Israel badosa tuntang dia terai mawi taloh te.

⁴Raja Mesa tuntang Moab aton mahaga tabiri. Kilau pajak akan raja Israel, genep nyelo ie manenga 100.000 anak tabiri tuntang kea bulun tabiri bara 100.000 tabiri hatuee.

⁵Tapi limbah raja Ahab matei, Mesa mambarontak malawan Israel.

⁶Awi te Raja Yoram gulong malihi Samaria tuntang haguet manatap lepah hapus tantarae.

⁷Ie mangirim peteh toh akan Raja Yosapat bara Yuda, “Raja Moab jari mambarontak malawan aku; en ikau maku parang omba aku malawan ie?” “Yoh,” tombah raja Yosapat. “Aku tuntang kare oloh ayungku hayak tantara bakuda ayungku akan omba ikau.

⁸Mahapan jalan je kueh itah akan manyarang?” “Itah manduan jalan je mahalau padang pasir Edom,” tombah Yoram.

⁹Palus Raja Yoram haguet hayak dengan Raja Yuda tuntang Raja Edom. Limbah mawi pangguet katahin uju andau, ewen lepah danum, sampai pasukan ewen tuntang meto je meton ramon ewen dia tau mihop.

¹⁰“Calaka itah!” kariak Raja Yoram. “TUHAN jari marencana uka manyarah itah telo akan Raja Moab.”

¹¹Raja Yosapat misek, “En intu hetoh jaton nabi je tau misek dengan TUHAN akan itah?” Ije perwira bara tantara Yoram tombah, “Aton Elisa anak Sapat! Ie bihin pambantu Elia.”

¹²“Toto! TUHAN puna hamauh mahalau ie,” koan Raja Yosapat. Palus telo raja te haguet manalih Elisa.

¹³“Mbuhen balaku dohop dengangku?” koan Elisa dengan raja Israel. “Haguet ih manalih kare nabi ain oloh bakasm!” “Dia!” tombah Yoram. “Awi TUHAN je marencana uka manyarah ikei telo akan Raja Moab.”

¹⁴Elisa tombah, “Tagal TUHAN je belom, je iayang awiku, aku mansanan tara-tarang je amon dia tagal Raja Yosapat je ihormatku, aku dia maku mawi urusan dengan Tuan.

¹⁵Toh imbit akan hetoh ije biti oloh je tau main kacapi.” Metoh oloh te main kacapie, Elisa inguasa awi Roh TUHAN,

¹⁶sampai ie hamauh, “Jetoh je insanan TUHAN: ‘Tampa kare parit intu ruak[3] je teah toh!

¹⁷Aloh keton dia mite ujan mohon atawa riwut dumah, tapi danum akan mamujar intu ruak toh. Keton dengan meto je meton ramon keton akan mandino danum je sukup akan ihop salepah belai keton.’ ”

¹⁸Koan Elisa limbah te, “Tapi jete baya pakara korik akan TUHAN. Ie akan manenga kea kamanang akan keton bara kare oloh Moab te.

¹⁹Uras kare lewun ewen je hadinding batu tuntang bahala-halap akan inderep keton; uras kare batang bua ineweng keton, uras kare tahasak danum iatep keton, tuntang uras kare tanan ewen je basiwoh akan imanting keton hapan batu sampai rusak samasinde.”

²⁰Andau ijee tinai, metoh maluput parapah hanjewu, danum palus mahasor bara Edom sampai mangontep ruak[4] te.

²¹Metoh oloh Moab mahining je telo raja te jari dumah manyarang, palus kakare oloh — bara je pangkabakase sampai akan je pangkatabelae — je tau meton sanjata, iirak tuntang iina intu eka watas lewu.

²²Andau ijee tinai, metoh ewen misik hanjewu, matanandau mampalawa hunjun danum sampai gitan bahandang kilau daha.

²³Ewen mangkariak, “Daha! Pasti kare tantara bara pasukan musoh jari hakalahi tuntang hapatei! Ayo itah haguet marampok kemah ewen!”

²⁴Tapi metoh oloh Moab te sampai kemah te, ewen intakan awi oloh Israel je jua-juan miar manggoang sambil mampatei ewen sampai ewen mundur

²⁵tuntang manderep kare lewun ewen. Genep tana je bajewong je ihalau ewen, imanting ewen hapan batu. Kajariae uras kare tana kontep awi batu. Kare oloh Israel kea manutup uras kare tahasak danum tuntang maneweng uras kare batang bua. Je batisa baya lewu Kir-Hareset, batang lewu intu Moab. Kajariae lewu te mahin ingapong tuntang imedak hapan batu awi kare tukang manting batu.[5]

²⁶Limbah katawan je ie dia olih manyarenan tinai, Raja Moab mimbit 700 tantara je apik mahapan padang, palus manggau jalan manembus pertahanan Raja Edom, tapi dia olih.

²⁷Awi te ie manduan putra mahkotae, palus malupute indu parapah akan dewa Moab hong hunjun dinding lewu. Palus kare oloh Israel mikeh,[6] sampai ewen mimbit pasukan ewen mundur bara lewu te palus buli akan lewun ewen.