Read Ngaju 2 RAJA-RAJA 4 Bible Online

2 RAJA-RAJA 4 - Ngaju bible

2 RAJA-RAJA 4

¹Sinde andau balo ain ije biti nabi haguet manalih Elisa tuntang hamauh, “Bapa, banangku jari matei! Tuntang bapak katawan je ie kea oloh je baketep dengan Hatalla, tapi ie butang dengan oloh. Toh oloh te dumah uka manduan kadadue anakku tuntang mawi ewen jadi reware, kilau hapa mambayar utang taliau banangku te.”

²“Kilen aku tau mandohop ibu?” isek Elisa. “En aton taloh je iingkes ibu intu huma?” “Jaton taloh en-en,” tombah oloh bawi te, “Baya undus saitun ije kasa korik.”

³Elisa hamauh, “Lius injam kasa buang bara kare tatangga ibu sapire je olih ewen mahanjaman.

⁴Limbah te keleh ibu dengan kare anak ibu tame akan huang huma tuntang matep batonggang. Tusoh undus bara kasa korik te akan kare kasa te, tuntang ngabeken kare kasa je jari kontep.”

⁵Oloh bawi te palus buli akan humae. Limbah ie dengan kare anake tame tuntang matep batonggang huma, ie manduan kasa korik je basuang undus saitun te, palus manusoh undus te akan huang kare kasa je inenga awi anake akae

⁶Limbah kare kasa te kontep urase, ie balaku ije kasa tinai. “Jari lepah,” koan ije bara kare anake tombah. Palus undus te dia mahasor tinai.

⁷Limbah te ibu te haguet tinai manalih Nabi Elisa, tuntang Elisa hamauh, “Jual undus te akan hapa mambayar uras kare utang ibu, tuntang kalabie sukup akan mambelom ibu tuntang kare anak ibu.”

⁸Intu Sunem aton ije biti oloh bawi je tatau. Sinde andau metoh Elisa haguet akan Sunem, oloh bawi te marawei ie kuman. Bara katika te genep katika Elisa tende intu Sunem, ie kuman intu human oloh bawi te.

⁹Limbah te oloh bawi te hamauh dengan banae, “Aku yakin bapa je kinjap tende intu hetoh te toto-toto rewar Hatalla.

¹⁰Keleh itah mawi ije kamar je korik intu hunjun human itah, tuntang manatap intu hete ije eka batiroh, meja, karosi, tuntang sumbo mangat ie tau baramalem intu hetoh sining katika ie maja itah.”

¹¹Sinde andau Elisa dumah tinai akan Sunem. Limbah ie mandai akan kamare uka malayan kahekae,

¹²ie manyoho Gehasi, pelayae, haguet mantehau oloh bawi te. Limbah oloh bawi te dumah,

¹³koan Elisa dengan Gehasi, “Isek dengae kilen aku tau mambaleh kahekae akan itah. Mikeh ie nahuang aku haguet manalih raja atawa manalih pangkalima tantara parang tuntang mamander tahiu oloh je tau mangganti ie.” Oloh bawi te tombah, “Aku melai marak tundah kolangku tuntang jaton katapas en-en.”

¹⁴Elisa misek dengan Gehasi, “Amon kalote narai je tau iawiku akae?” Gehasi tombah, “Ie jaton anak, pa, tuntang banae jari bakas.”

¹⁵“Tehau oloh bawi te,” koan Elisa. Oloh bawi te dumah tuntang mendeng intu batonggang.

¹⁶ Palus koan Elisa dengae, “Nyelo naharep, hong katika kilau toh, ibu jari mentang ije anak awau hatue.” “Pa, ela nanjaro!” koan oloh bawi te. “En dia bapa rewar Hatalla?”

¹⁷Tapi toto je insanan Elisa. Intu nyelo rahian tinai, hong katika je sama oloh bawi te manak ije biti anak hatue.

¹⁸Limbah anak te hai, sinde andau intu wayah getem, anak te haguet manalih bapae je aton intu tana dengan kare oloh je manggetem.

¹⁹Salenga anak te mangkariak “Kayah! Takolokku pehe!” “Imbit anak te akan indue,” koan bapae dengan ije biti jipee.

²⁰Anak te iimbit manalih indue, palus indue mamangku ie. Hong halemei te anak te matei.

²¹Indue mimbit ie akan hunjun kamar Elisa, tuntang mampetere intu hunjun eka batiroh. Limbah te ie balua tuntang matep batonggang,

²²palus haguet mantehau banae. Ie hamauh, “Soho ije biti jipen akan hetoh dengan ije kongan kalidai. Aku musti bajeleng haguet manalih Nabi Elisa, tuntang akan bajeleng buli tinai.”

²³“Mbuhen ikau haguet metoh toh?” koan banae misek. “Andau toh dia andau Sabat tuntang dia kea andau hai Bulan Taheta.”[7] “Dia men ih,” koae tombah.

²⁴Limbah ie mangkepan lapik pondoke intu kalidai te, ie hamauh dengan jipee, “Hewes kalidai toh mangat hadari balia-lias; ela mangurang kaliase amon aku dia manyoho.”

²⁵Palus oloh bawi te haguet akan bukit Karmel akan eka Elisa. Bara kejau Elisa jari mite oloh bawi te dumah. Elisa hamauh dengan Gehasi, “Item, ibu bara Sunem te dumah!

²⁶Jeleng haguet manyondau ie tuntang isek kilen ampie pambelom hapus keluarga ewen.” “Uras bahalap,” koan oloh bawi te dengan Gehasi.

²⁷Tapi metoh sampai intu taharep Elisa, ie sontop tuntang mamalok pain Elisa. Gehasi handak manyare ie bara hete, tapi Elisa hamauh, “Nauhe! Ampie ie paham pehe atei. Tapi TUHAN dia mansanan taloh en-en akangku.”

²⁸Oloh bawi te hamauh, “Pa, aku dia balaku anak dengan bapa. Tapi jari insanangku kea dengan bapa mangat ela manenga kaharap je hayang akangku.”

²⁹Elisa tampaliau akan Gehasi palus hamauh, “Jeleng! Duan sokahku tuntang lius balalu akan human ibu toh. Ela tende uka manabe eweh bewei je inyondaum intu jalan. Amon oloh manabe ikau, ela manganan katika uka mambaleh tabe. Sana dumah, ina tongkehku intu hunjun anak te.”

³⁰Oloh bawi te hamauh, “Bapak Elisa! Tagal TUHAN je belom tuntang tagal hambaruan bapa, aku dia akan malihi bapak!” Awi te Elisa palus haguet hayak oloh bawi te akan humae.

³¹Gehasi jari mananselo ewen uka mandak sokah Elisa intu bitin anak te. Tapi dia aton auh atawa kare tanda beken je anak te belom. Palus Gehasi haguet manyondau Elisa tuntang hamauh, “Anak te dia misik.”

³²Limbah sampai intu human oloh bawi te, Elisa tame kabuat akan huang kamare, tuntang mite hantun anak te kuju-kujuh intu eka batiroh.

³³Elisa matep batonggang tuntang balakudoa intu TUHAN.

³⁴ Limbah te ie mahingkep intu hunjun anak te tuntang marantep nyamae, matae tuntang lengee akan matan tuntang lengen anak te. Awi ie mawie kalote, maka bitin anak te balasut.

³⁵Elisa hingkat tuntang mananjong luli-lia huang kamar te; limbah te ie mahingkep tinai intu hunjun bitin anak te. Kajariae anak te banyen uju kali tuntang mamparenang matae.

³⁶Elisa manyoho Gehasi mantehau indu anak te, tuntang limbah indue tame, Elisa hamauh dengae, “Jetoh anak ibu.”

³⁷Ibu te sontop intu taharep Elisa palus mimbit anak te balua.

³⁸Sinde katika aton lau hong hapus karajaan. Palus Elisa haluli akan Gilgal. Metoh ie majar ije kalompok nabi, ie manyoho pelayae manduan balanai je hai tuntang mampakasak panginan akan ewen.

³⁹Ije bara kare nabi te haguet akan tana handak manggau sayur, palus ie dinon ije kamacam baloh baliar. Ie mamutik bua te sapire karee, tuntang mimbit jete buli. Sambil dia katawan bua en jete, ie palus manguae tuntang mampakasake huang balanai te.

⁴⁰Limbah masak, ie manyarongae akan kare nabi te. Tapi sana ewen mangkeme panginan te, ewen mangkariak dengan Elisa, “Pa, jetoh racun!” Palus ewen dia maku kumae.

⁴¹Maka Elisa manyoho manduan isut tepong, balalu ie manawore akan huang balanai te. Limbah te ie hamauh, “Nyarongan tinai taloh kinan te.” Ampie taloh kinan te dia aton bahayae tinai.

⁴²Hong katika je beken, ije biti oloh hatue dumah bara Baal-Salisa. Ie mimbit akan Elisa gandom je harue inggetem, tuntang kea due puluh rote je inampa bara gandom hasil getem je solake nyelo te. Elisa manyoho pelayae manyarongan rote te akan kare nabi te.

⁴³Tapi pelayan te hamauh, “Dia baka sukup akan saratus biti!” Elisa tombah, “Nyarongan bei, mangat ewen kuman, awi TUHAN hamauh je ewen akan kuman tuntang limbah kuman magon aton tisae.”

⁴⁴Pelayan te manyarongan taloh kinan te akan ewen, tuntang ewen uras kuman. Limbah kuman, magon aton tisae kilau je insanan TUHAN.