Read Ngaju 2 RAJA-RAJA 5 Bible Online

2 RAJA-RAJA 5 - Ngaju bible

2 RAJA-RAJA 5

¹ Naaman te pangkalima tantara parang karajaan Siria je paham inyinta tuntang irega awi raja Siria. Awi, mahalau Naaman, TUHAN jari manenga kamanang akan tantara Siria. Naaman te ije biti pangkalima je abas, tapi ie aton panyakit kulit je bakaike-ikeh.

²Sinde katika oloh Siria manyarang karajaan Israel. Huang sarangan te ije biti anak oloh bawi inyingkap tuntang iimbit kilau tawanan, limbah te ie jadi pelayan akan sawan Naaman.

³Sinde andau pelayan te hamauh dengan majikae, “Nyonya, jaka tuan haguet manyondau nabi je melai intu Samaria, pasti nabi te akan mampakeleh tuan.”

⁴Metoh Naaman mahining taloh te, ie haguet manalih raja tuntang manyarita taloh je insanan awi anak je bawi te.

⁵Raja hamauh, “Bahalap, lius manalih raja Israel. Aku akan manampa surat akae.” Palus Naaman haguet hayak mimbit 30.000 duit perak, 6.000 duit amas, tuntang 10 pasang pakaian je bahala-halap.

⁶Surat je iimbite te kalotoh auhe: “Mahalau surat toh aku mansanan akan Tuan tahiu perwira ayungku, arae Naaman, mangat Tuan mampakeleh ie bara panyakite.”

⁷Metoh raja Israel mambasa surat te, ie marabit pakaian awie mikeh, sambil hamauh, “Calaka, narai bukue raja Siria balaku aku mampakeleh oloh toh? Aku dia Hatalla je tempon kuasa akan mambelom atawa mampatei oloh! Pasti raja Siria te baya manggau perkara dengangku!”

⁸Nabi Elisa mahining tahiu taloh te, tuntang mangirim peteh toh akan raja Israel, “Mbuhen Tuan Raja mikeh? Soho oloh te dumah talih aku mangat ie katawan je intu Israel toh aton ije biti nabi!”

⁹Awi te Naaman haguet hapan kareta kudae akan human Elisa, tuntang tende intu batonggang.

¹⁰Elisa manyoho ije biti pelayan uka hamauh kalotoh dengan Naaman, “Lius Tuan mandoi uju kali intu Sungei Yordan, maka Tuan akan keleh samasinde.”

¹¹Mahining auh te, Naaman sangit tuntang hamauh, “Tirokku ie akan balua kabuat manyondau aku, tuntang balakudoa intu TUHAN, Hatalla, hayak manggerek lengee intu hila bitingku je pehe toh palus aku keleh.

¹²Batang danum Abana tuntang Parpar intu Damaskus labih bahalap bara kare sungei je kueh bewei intu Israel! Aku tau mandoi intu hete tuntang keleh!”

¹³Tapi kare pelayae manokep ie tuntang hamauh, “Tuan, jaka Tuan inyoho malalus taloh je bahali, pasti Tuan akan mawie. Narai tinai je inggau, toh ie baya manyoho Tuan mandoi mangat keleh!”

¹⁴Awi te Naaman haguet akan Sungei Yordan, palus maneser mampaleteng arepe akan sungei te hangkauju sama kilau je inyoho awi Elisa. Palus Naaman keleh. Bitie jari barigas haluli kilau bitin anak oloh tabela.

¹⁵Palus ie tuntang kare oloh je mampahayak ie haluli manalih Elisa. “Toh aku katawan,” koan Naaman, “je intu hapus kalunen baya aton ije Hatalla, iete Hatalla je inyembah awi oloh Israel. Awi te, keleh tuan manarima panenga bara aku.”

¹⁶Elisa tombah, “Tagal TUHAN je belom, je ilayani awiku, aku dia handak manarima panenga en bewei.” Naaman hajajuan mangat Elisa maku manarima panenga te, tapi Elisa tetep manolak.

¹⁷Palus koan Naaman, “Amon tuan dia kea maku manarima panenga aingku, soho aku mimbit buli petak tumon[8] kare je olih iimbit awi ije kapasang kalidai. Awi, nampara bara katika toh aku handak maluput parapah baya akan TUHAN, tuntang dia akan hatalla beken.

¹⁸Amon aku kareh musti mangawal rajangku haguet sombayang akan pasah dewa Rimon dewa ain oloh Siria, keleh TUHAN mampun aku.”

¹⁹Koan Elisa, “Lius dengan salamat.” Palus Naaman haguet. Dia tahi limbah Naaman haguet,

²⁰Gehasi pelayan Elisa, manirok, “Hau, mbuhen ie inalua haguet dia mambayar? Sapunae tuangku manarima panengan oloh Siria te. Tagal TUHAN je belom aku musti manggoang ie tuntang musti mandino taloh en-en bara ie!”

²¹Palus Gehasi manggoang Naaman. Metoh Naaman mite aton oloh dumah, ie mohon bara karetae tuntang misek, “Tege narai?”

²²Gehasi tombah, “Maap tuan, aku inyoho mansanan akan tuan je harue ih due nabi tabela dumah bara daerah bukit Epraim. Tuangku balaku mangat tuan manenga 3.000 duit perak tuntang due pasang pakaian je bahalap akan due biti nabi te.”

²³“Batantu!” koan Naaman, tuntang ie bajuju mangat Gehasi mimbit 6.000 duit perak. Naaman mambongkus duit te huang due kambut, tuntang manduan due pasang pakaian je bahala-halap. Uras kare taloh te inengae akan due biti pelayae, tuntang inyohoe mananjong helo bara Gehasi.

²⁴Limbah sampai intu bukit eka Elisa melai, Gehasi manduan duit tuntang pakaian te bara kare pelayan Naaman, limbah te mingkese intu huang huma. Kare pelayan te inyoho buli,

²⁵palus ie tame haluli akan huang huma. Elisa misek, “Ikau bara kueh?” “Dia bara kue-kueh, tuan!” tombah ie.

²⁶Tapi Elisa misek, “Ateiku aton intu hete metoh Naaman mohon bara karetae uka manyondau ikau. Jetoh dia katikae uka mandino duit tuntang mamili kabon saitun, kabon anggor, tabiri tuntang sapi hayak kare rewar!

²⁷Awi ikau manarima panenga te, ikau akan manarima kea panyakit Naaman. Sampai katatahie haream turunam mahin akan mandino panyakit te!” Metoh Gehasi balua bara hete, ie mandino panyakit kulit, pupuse manjadi baputi toto.