Read Ngaju 2 RAJA-RAJA 7 Bible Online

2 RAJA-RAJA 7 - Ngaju bible

2 RAJA-RAJA 7

¹Elisa tombah, “Hining taloh je insanan TUHAN! Jewu lakau katika kilau toh, dengan ije duit perak bewei oloh tau mamili telo kilogram gandom je pangkahalape tuntang jahawen kilogram gandom macam je beken.”

²Ajudan pribadi raja tombah, “Kueh tau! Jete taloh je mastahel, aloh matoh toh kea TUHAN mampamohon ujan labat bara langit!” “Kareh ikau mite taloh te akan manjadi, tapi ikau dia akan mangkeme panginan te aloh isut,” koan Elisa tinai.

³Andau te epat biti oloh je buah panyakit kulit je bakaike-ikeh aton intu luar lawang lewu Samaria. Ewen hamauh sama arepe, “Kanduen itah mondo-mondok intu hetoh mentai matei?

⁴Amon itah tame akan lewu, itah akan matei balau; tuntang amon itah melai hetoh itah akan matei kea. Keleh itah akan eka kare kemah oloh Siria. Paling-paling itah impatei ewen. Tapi tau kea itah dia ingguleie.”

⁵Limbah andau nampara kaput, ewen haguet akan eka kare kemah oloh Siria, tapi ewen dia mite ewe-eweh intu hete.

⁶Awi, TUHAN jari mawi oloh Siria mahining auh kilau sarangan ije pasukan tantara je hai mahapan kuda tuntang kareta. Kare oloh Siria te manyangka raja Israel jari manyewa raja Het bara Misir hayak tantarae uka manyarang ewen.

⁷Palus alem te kea ewen hadari manyalamat arepe, tuntang malihi kemah, kuda, hayak kalidai ewen kalote bewei intu eka kare kemah te.

⁸Kaepa-epat biti oloh je buah panyakit kulit te sampai intu saran eka kare kemah te, tuntang tame ije kemah. Ewen kuman mihop intu hete tuntang manduan amas, perak, hayak kare pakaian palus haguet manyahokae. Limbah te ewen haluli tinai tuntang tame kemah je beken, palus nguan gawi je sama kilau te kea.

⁹Ewen hamauh sama arepe, “Gawin itah toh dia bahalap. Kabar toh kabar bahalap, tuntang sapunae itah mansanae! Amon itah mentai sampai jewu itah pasti ihukum. Keleh itah malapor kare taloh toh akan istana.”

¹⁰Awi te ewen haluli akan Samaria tuntang mangkariak akan pangawal lawang lewu, “Ikei jari haguet akan eka kare kemah oloh Siria, tuntang ampie ije mahin jaton oloh intu hete. Kuda tuntang kalidai ewen sondau ikei magon injarat intu ekae, tuntang kare kemah ilihi kalote bewei.”

¹¹Kare pangawal mangkariak mambarita auh te sampai oloh mansanae akan istana.

¹²Metoh te magon hamalem, tapi raja balua kea bara kamar batirohe tuntang hamauh dengan kare pagawaie, “Hining! Aku katawan rencana kare oloh Siria te! Ewen katawan itah kanjeran balau, awi te ewen malihi kare kemahe tuntang haguet manyahokan intu janah uka manyoho itah balua manggau panginan. Limbah te ewen handak manyarang itah tuntang manguasa lewu.”

¹³Ije biti pagawai raja hamauh, “Tuan Raja, itah je magon aton intu huang lewu toh nasib itah sama ih dengan ewen je jari matei. Awi te keleh itah manyoho pire-pire biti oloh manongkang pire-pire kongan kuda bara marak kare kuda je magon aton, tuntang haguet akan hete uka mite kare taloh je jari manjadi.”

¹⁴Palus ewen mintih pire-pire biti, balalu raja manyoho kare oloh te haguet mahapan pire-pire kareta parang tuntang manantuani taloh je jari manjadi buah tantara Siria.

¹⁵Ewen haguet sampai akan Sungei Yordan. Hapus jalan ewen mite pakaian tuntang kare pakakas hakalampah. Uras kare taloh te injakah kalote bewei awi oloh Siria metoh mandari arep ewen. Kare sarohan te buli tuntang malapor akan raja.

¹⁶Palus oloh lewu Samaria hadari balua lewu tuntang marampok kare kemah oloh Siria. Tumon taloh je insanan TUHAN, palus manjadi je telo kilogram gandom je pangkahalap atawa jahawen kilogram gandom macam je beken, regae baya ije duit perak.

¹⁷Tabarong metoh te ajudan pribadi raja bagawi manjaga lawang lewu. Ie matei intu hete tahunje awi rayat. Taloh te manjadi manumon pansanan Elisa akan raja metoh raja manalih ie.

¹⁸Elisa jari mansanan je lakau intu katika kilau toh andau jewue, telo kilogram gandom je pangkahalape atawa jahawen kilogram gandom macam je beken akan injual intu Samaria dengan rega ije duit perak.

¹⁹Tuntang metoh te ajudan pribadi raja te hamauh, “Kueh tau. Jete mastahel, aloh metoh toh kea TUHAN mampamohon ujan labat bara langit!” Palus inombah awi Elisa, “Kareh ikau mite taloh je manjadi; tapi ikau akan dia mangkeme panginan te aloh isut.”

²⁰Kalote manjadi dengan oloh te — ie matei tahunje awi rayat intu lawang.