Read Ngaju 2 RAJA-RAJA 8 Bible Online

2 RAJA-RAJA 8 - Ngaju bible

2 RAJA-RAJA 8

¹ Hong sinde katika TUHAN mampadumah lau intu Israel katahin uju nyelo. Helo bara te Elisa jari mansanan taloh te akan oloh bawi je bara Sunem te je anake jari imbelome haluli. Elisa kea manyoho ie bindah dengan keluargae akan lewu beken.

²Oloh bawi te malalus taloh je insanan Elisa; ie haguet akan lewu Pilistin uka melai intu hete.

³Limbah wayah uju nyelo te ie haluli akan Israel. Palus ie haguet dengan anake manalih raja uka balaku mangat huma tuntang tanae ilian akae.

⁴Metoh te Gehasi pelayan Elisa jari ilaku awi raja uka manyarita tahiu kare taloh heran je jari ilalus awi Elisa.

⁵Tuntang metoh oloh bawi bara Sunem te dumah manaharep raja uka manyampai taloh lakue, Gehasi metoh manyarita tahiu kilen ampii Elisa mambelom haluli ije biti anak je jari matei. Koan Gehasi, “Tuan Raja, jetoh ie oloh bawi te, tuntang jetoh anake je imbelom haluli awi Elisa!”

⁶Palus raja misek tuntang oloh bawi te manyarita tahiu anak te. Limbah te raja mantehau ije biti pagawaie tuntang marentah mangat uras kare taloh je ayun oloh bawi te ilian haluli akae tamput kea regan hapus hasil tanae katahin uju nyelo ie aton intu lewun oloh luar.

⁷Hong sinde katika Elisa haguet akan Damaskus. Tabarong Raja Benhadad metoh haban. Katika raja mahining je Elisa aton intu Damaskus,

⁸ie hamauh dengan Hasael, ije biti pagawaie, “Imbit panenga akan nabi te, tuntang laku mangat ie misek dengan TUHAN, en aku toh akan keleh atawa dia.”

⁹Hasael manduan 40 onta tuntang mamuate dengan kakare macam hasil lewun oloh Damaskus, palus haguet talih Elisa. Katika sampai eka Elisa, Hasael hamauh, “Rewarm Benhadad, manyoho aku uka misek en ie akan keleh atawa dia.”

¹⁰Elisa tombah, “TUHAN mansanan akangku je ie akan matei. Tapi sanan ih akae je ie akan keleh.”

¹¹Limbah te Elisa mananture Hasael hapan tampayah je banyihi sampai Hasael balisah. Salenga Elisa manangis.

¹²Mbuhen tuan manangis, koan Hasael. “Awi katawangku kapapa je akan iawim dengan oloh Israel,” koan Elisa. “Ikau akan mangehu kare lewu je hadinding batu, mampatei kare oloh tabela je pangkahalape, tuntang mahekak kare anak awau hayak manyila kare kanain oloh je metoh batihi.”

¹³ “Lalehae, aku toh oloh je jaton rimae” tombah Hasael, “kueh aku tau tempon kuasa kalote kahaie!” “TUHAN jari maninjok akangku je ikau akan jadi raja Siria”, tombah Elisa.

¹⁴Metoh Hasael haluli akan istana, Benhadad misek, “En koan Elisa?” “Ie hamauh je Tuan Raja pasti akan keleh,” koan Hasael.

¹⁵Tapi andau jewu Hasael manduan ije kahowut, tuntang mansulop akan huang danum palus mahenyeke akan baun raja sampai ie matei buseng. Tuntang Hasael jadi raja Siria mangganti Benhadad.

¹⁶Yoram anak Yosapat jadi raja Yuda katika Raja Yoram anak Ahab jari marentah Israel lime nyelo.[11]

¹⁷Metoh te Yoram telo puluh due nyelo umure. Ie marentah intu Yerusalem hanya nyelo katahie.

¹⁸Ie kawin dengan anak Ahab, tuntang kilau je ilalus awi keluarga Ahab, ie kea badosa intu TUHAN kilau kare raja Israel.

¹⁹ Tapi TUHAN dia maku mambinasa Yuda, awi ie jari hajanji dengan Dawid reware, je turunae akan tetep jadi raja.

²⁰ Hong wayah Yoram marentah, Edom mambarontak malawan Yuda tuntang mawi karajaan kabuat.

²¹Awi te, Yoram haguet dengan hapus kareta parange manintu Sair. Intu hete ie ingapong pasukan Edom. Tapi metoh hamalem te ie tuntang kare pangkalima pasukan karetae manembus kapong musoh, tuntang kare tantara ain ewen hadari buli akan genep humae.

²²Bara katika te Edom dia tinai mamenda Yuda. Wayah te kea lewu Libna mahin mambarontak.

²³Sarita je beken tahiu Yoram incatet huang buku Sejarah Kare Raja Yuda.

²⁴Ie matei tuntang ingubur intu kubur kare raja hong Lewun Dawid. Ahasia anake jadi raja mangganti ie.

²⁵Ahasia anak Yoram jadi raja Yuda metoh Raja Yoram anak Ahab jari marentah Israel due walas nyelo.

²⁶Metoh te umur Ahasia due puluh due nyelo. Ie marentah intu Yerusalem ije nyelo katahie. Indue te bagare Atalya, anak raja Ahab tuntang eson Omri raja Israel.

²⁷Tagal panggawie, Ahasia aton hubungan keluarga dengan keluarga raja Ahab. Ahasia badosa intu TUHAN, sama kilau je ilalus awi keluarga Ahab.

²⁸Raja Ahasia omba parang hayak Yoram raja Israel malawan Hasael raja Siria. Ewen hakalahi intu Ramot, daerah Gilead. Yoram bahimang hong parang te.

²⁹Ie haluli akan lewu Yisreel uka irawat, tuntang Ahasia manyengok ie intu hete.