Read Ngaju 2 RAJA-RAJA 9 Bible Online

2 RAJA-RAJA 9 - Ngaju bible

2 RAJA-RAJA 9

¹Metoh te Elisa mantehau ije bara marak kare nabi je iajare tuntang hamauh, “Tata-tatap uka haguet akan Ramot intu Gilead, tuntang imbit kasa je basuang undus saitun toh.

²Limbah ikau sampai intu kanih, gau Yehu anak Yosapat tuntang esom Nimsi. Imbit ie mangabuat akan ije kamar,

³tuntang nata undus toh akan hunjun takoloke, palus sanan ‘TUHAN hamauh je ie jari mangkat ikau jadi raja Israel’. Limbah malalus taloh te, lihi eka te bajeleng.”

⁴Nabi je tabela te haguet akan Ramot,

⁵palus hasondau dengan Yehu tuntang kare pangkalima je beken metoh barunding intu hete. Nabi te hamauh, “Tuan, aku mimbit barita akan tuan.” Yehu tombah, “Akan eweh?” “Akan tuan kabuat” koan nabi te.

⁶ Limbah te ewen badue tame akan huang huma te, tuntang nabi tabela te manata undus saitun akan hunjun takolok Yehu palus hamauh, “TUHAN Hatallan Israel hamauh, ‘Aku malantik ikau jadi raja, akan ungkup-Ku Israel.

⁷Ikau akan mambinasa keluarga tuan ayum Ahab. Tumon te aku mahukum Isebel je jari mampatei kare nabi aingku tuntang kare rewar-Ku je beken.

⁸Hapus keluarga tuntang anak eson Ahab musti matei, genep oloh hatue aloh bakas aloh tabela akan imbinasa-Ku.

⁹Keluargae akan iawi-Ku sama kilau Aku mawi keluarga Yerobeam tuntang keluarga Baesa, kare raja Israel.

¹⁰ Isebel dia akan ingubur. Hantue akan kinan aso intu daerah Yisreel.’ ” Limbah mangotak uras taloh te nabi tabela te balua palus hadari.

¹¹Yehu haluli manalih kare sobate, tuntang ewen misek, “Aton kabar en? Oloh gila te handak narai dengam?” “Keton jari katawan,” Tombah Yehu.

¹²“Dia, ikei dia katawan!” tombah ewen. “Ayo sanan!” Tombah Yehu, “Ie manyampai peteh TUHAN je aku iangkat TUHAN jadi raja Israel.”

¹³Bajeleng kare kawal Yehu mengkak jubah ewen tuntang mambirange hong tangga intu taharep Yehu. Palus ewen mahimon tarompet tuntang mangkariak, “Yehu raja!”

¹⁴Kalote Yehu pakat malawan Raja Yoram je metoh te aton intu Yisreel. Yoram akan hete awie manatamba himange je dinoe huang parang intu Ramot malawan Hasael raja Siria. Yehu hamauh dengan kare kawale kare pangkalima, “Amon keton satuju aku jadi raja, jaga uka ela aton samasinde oloh je balua bara Ramot uka mansanan hal te akan kare oloh intu Yisreel.”

¹⁶Limbah te ie lompat kareta parange palus haguet akan Yisreel. Metoh te Yoram hindai keleh, tuntang Ahasia raja Yuda aton intu hete maja ie.

¹⁷Metoh oloh je manjaga lewu Yisreel mite Yehu tuntang kare oloh ayue dumah, ie mangkariak, “Aton ije rombongan oloh manintu akan hetoh!” Yoram tombah, “Soho ije tantara bakuda haguet manantuani en ewen te sobat atawa musoh.”

¹⁸Palus tantara te haguet manungkang kuda uka manyondau Yehu tuntang hamauh, “Raja handak katawan en tuan dumah kilau sobat.” “Jete dia urusan ayum!” tombah Yehu. “Ayo omba dengangku.” Oloh je manjaga lewu te mite tantara te dumah intu rombongan te, tapi dia mules haluli. Palus ie malapor hal te,

¹⁹balalu ingirim ije tantara je beken. Prajurit jetoh mahin misek kalote kea dengan Yehu, tuntang sinde tinai Yehu tombah, “Jete dia urusan ayum! Ayo omba dengangku!”

²⁰Oloh je manjaga lewu nah malapor tinai je sarohan te jari sampai intu eka rombongan te tapi dia mules haluli. Palus ie mandahang, “Tau Yehu ampie je mamimpin rombongan te, awi ie mimbit kareta parange sama kilau oloh gila ampie.”

²¹“Natap kareta akangku,” parentah Raja Yoram. Kareta inatap, palus Yoram tuntang Raja Ahasia haguet manyondau Yehu, ewen due te sama mimbit kareta ayue kabuat-kabuat. Ewen hasondau dengan Yehu intu bahun tanan Nabot.

²²“En ikau dumah kilau sobat?” pisek Yoram dengan Yehu. Yehu tombah, “Kilen ampie tau kilau sobat, amon intu hetoh magon are dukun, tuntang magon are oloh je manyembah dewa je inampa awi Isebel indum te?”

²³“Jetoh gawin oloh darhaka, Ahasia!” kariak Yoram sambil mules karetae palus hadari.

²⁴Yehu mambidik panahe salepah kaabase palus mamanah Yoram buah likute sampai tembus akan jantung. Yoram bahimang, tuntang matei intu karetae.

²⁵Yehu hamauh dengan ajudae Bidkar, “Duan hantue tuntang jakah akan bahun tanan Nabot. Ingat katika ikau haguet haya-hayak dengangku intu hila likut raja Ahab, bapa Yoram, Hatalla jari mansanan auh toh malawan Ahab:

²⁶ ‘Aku jari mite pampatei Nabot tuntang kare anake andau male. Tuntang Aku hajanji je Aku akan mahukum ikau hong tana jetoh kea.’ ” “Awi te, duan hantun Yoram,” koan Yehu marentah pambatue, “tuntang jakah intu tana je ayun Nabot, uka manggenep auh janjin TUHAN.”

²⁷Ahasia mite taloh je jari manjadi, palus ie mandari karetae manintu lewu Bet-Hagan. Yehu manggoang ie tuntang mangkariak dengan oloh ayue, “Patei ie kea!” Ewen mamanah ie tuntang mampahimang ie intu jalan je manintu Gur, tokep lewu Yibleam. Tapi ie olih hadari sampai akan Megido, tuntang intu hete ie matei.

²⁸Kare pagawaie manduan hantue tuntang mimbite hapan kareta haluli akan Yerusalem, palus mangubure huang kubur kare raja intu Lewun Dawid.

²⁹Ahasia jadi raja Yuda metoh raja Yoram anak Ahab jari marenrah Israel sawalas nyelo katahie.

³⁰Yehu palus dumah akan Yisreel. Limbah Isebel mahining tahiu taloh je manjadi, ie mampahalap balaue tuntang mancalak matae, palus manjengok akan penda bara basengok istana.

³¹Metoh Yehu tame mahalau lawang, Isebel mangkariak, “O Simri,[12] pamuno! Handak en ikau akan hetoh?”

³²Yehu tengak akan hila basengok tuntang hamauh, “Eweh mamihak aku?” Mahining auh te, due telo biti pagawai istana manjengok akan penda.

³³Yehu hamauh dengan ewen, “Jakah ie akan penda!” Palus ewen manjakah ie akan penda tuntang ie inantarang awi kareta sampai dahae manampurit akan dinding tuntang akan kare kudan kareta te.

³⁴Yehu balalu tame istana tuntang kuman. Limbah te ie hamauh, “Oloh bawi te puna tarasapa. Aloh kalote, ngubur ih hantue awi ie putri raja.”

³⁵Tapi metoh ewen haguet manduan hantue uka mangubure, ewen baya sondau bangon takoloke, tuntang kare tulang lengee dengan paie.

³⁶ Limbah taloh te ilapor akan Yehu, ie hamauh, “Jetoh jari inujum awi TUHAN, metoh ie hamauh kalotoh mahalau Elia reware: ‘Hantun Isebel akan indu panginan aso intu daerah Yisreel,

³⁷tuntang kare tisan hantue te akan hakalampah kilau tain meto sampai jaton oloh je tau kasene hantun eweh jete.’ ”