Read Ngaju 1 KRONIKA 10 Bible Online

1 KRONIKA 10 - Ngaju bible

1 KRONIKA 10

¹Oloh Pilistin parang malawan oloh Israel. Ewen kalahi intu petak habukit Gilboa. Are oloh Israel je matei intu hete, tuntang tisae tatame Raja Saul dengan kakare anake hatue hadari.

²Tapi ewen injake awi oloh Pilistin tuntang telo biti bara kare anak hatuen Saul impatei, iete Yonatan, Abinadab tuntang Malkisua.

³Parang manyangit toto tokep Saul, tuntang ie kabuat buah panah musoh sampai bahimang.

⁴Palus koan Saul dengan oloh tabela je tukang mimbit pakakas parange, “Silak padangm tuntang nyodok aku mangat aku ela akan usik oloh Pilistin je dia kasene TUHAN te.” Tapi anak tabela te dia maku manyodok Saul awi ie paham mikeh. Awi te Saul manduan padange kabuat tuntang mampalihang arepe akan hunjun padang te.

⁵Metoh anak tabela te mite Saul jari matei, ie kea mampalihang arepe akan hunjun padang, palus matei.

⁶Maka Saul matei hayak telo anake, balalu kea turonae lepah.

⁷Metoh uras oloh Israel je melai intu Janah Yisreel mahining je tantara Israel jari mandari arepe, tuntang kea Saul dengan kakare anake jari matei, ewen hadari malihi kare lewun ewen. Balalu oloh Pilistin manguasa kare lewu te.

⁸Andau jewue metoh oloh Pilistin dumah handak marampok kare hantu, ewen sondau Saul tuntang telo anake jari matei intu petak habukit Gilboa.

⁹Ewen mengkak baju parang Saul, tuntang manetek takoloke, palus mimbite haguet. Limbah te ewen mangirim sarohan akan hapus lewun oloh Pilistin uka manyampai barita bahalap te akan kare bangsa tuntang dewa ain ewen.

¹⁰Baju parang Saul iingkes huang ije human dewa ain ewen, tuntang takoloke ingkoak intu human Dagon dewan ewen.

¹¹Metoh oloh je melai Yabes intu Gilead mahining taloh je ilalus awi oloh Pilistin dengan Saul,

¹²kare oloh je paling bahanyi marak ewen haguet manduan hantun Saul tuntang kare anake, palus mimbite akan Yabes; ewen mangubur ie hong penda upon kayu hai, limbah te ewen puasa uju andau katahie.

¹³ Saul matei metoh ie dia baketep dengan TUHAN, tuntang dia manumon kare parentah Aie. Ie dia misek TUHAN, tapi misek kare roh oloh matei. Awi te TUHAN mahukum ie tuntang manyarah padadosae akan Dawid anak Isai.