Read Ngaju 1 KRONIKA 12 Bible Online

1 KRONIKA 12 - Ngaju bible

1 KRONIKA 12

¹Metoh Dawid hadari bara Raja Saul, ie babungkat akan Siklag, Are pangkalima je baketep tuntang are pangatawae mampahinje arepe omba mandohop Dawid.

²Ewen bara suku Benyamin kilau Saul. Ewen apik mamanah tuntang mamanting batu mahapan tali, aloh dengan lenge sambil atawa lenge gantau.

³Kapalan ewen iete Ahieser tuntang Yoas kare anak Semea bara Gibea. Jetoh ie kare aran pangkalima oloh menteng te: Yesiel tuntang Pelet kare anak Asmawet Berakha tuntang Yehu oloh Anatot Yismaya oloh Gibeon, pangkalima basewut je jadi ije bara kapala baris “Telo Puluh Pangkalima”. Yeremia, Yehasiel, Yohanan, tuntang Yosabad oloh Gedera Elusai, Yerimot, Bealya, Semarya, tuntang Sepaca oloh Harupi Elkana, Yisia, Asareel, Yoeser tuntang Yasobam bara jalahan Korah Yoëla tuntang Sebaya kare anak Yerohan oloh Gedor.

⁸Metoh Dawid aton intu eka je mahapan kota hong padang pasir are pangkalima basewut bara suku Gad dumah omba ie. Ewen te iete kare pangkalima je apik toto mahapan talawang tuntang lunju. Ewen ampie bahanyi-hanyi kilau singa tuntang balia-lias kilau bajang.

⁹Jetoh kare aran ewen je inyusun manumon pangkat: Eser, Obaja, Eliab, Mismana, Yeremia, Atai, Eliel, Yohanan, Elisabad, Yeremia, Makhbanai.

¹⁴Belahe kare oloh Gad te pangkalima je gantong pangkate je mangapala 1.000 biti; belahe tinai kare pangkalima je mangapala 100 biti.

¹⁵Puji manjadi hong bulan ije, metoh Sungei Yordan kanjerae soho kare pangkalima te dimpah batang danum te tuntang maharak kare oloh je melai janah aloh je intu hila timor aloh je hila barat sungei te.

¹⁶Sinde katika ije baris oloh bara suku Benyamin tuntang Yuda haguet akan kota eka Dawid melai.

¹⁷Dawid manyondau ewen tuntang hamauh “Amon keton kilau sobat handak mandohop aku, keleh omba ikei. Ikei manarima keton dengan sanang atei. Tapi amon keton kianat balalu mandohop musoh, aloh aku dia mawi kapapa dengan keton, Hatalla je inyembah tato hiang itah mangatawae, tuntang Ie kareh mahukum keton.”

¹⁸Ije bara ewen, iete Amasai, je limbah te jadi kapalan baris je inyewut “Telo Puluh Pangkalima”, inguasa awi Roh Hatalla palus hamauh, “Dawid, anak Isai! Ikei mandohop ikau! Keleh ikau tuntang ewen je mandohop ikau mandino kamanang. Hatalla aton intu hila ikau!” Palus Dawid manarima ewen tuntang mangkat ewen jadi pangkalima huang pasukan parange.

¹⁹Metoh Dawid dengan oloh Pilistin mamarang Raja Saul, belahe bara tantara suku Manase hadari omba hila Dawid. Je katotoe Dawid dia mandohop kare oloh Pilistin te. Kare kapalan Pilistin manyoho ie buli akan Siklag awi ewen mikeh ie kareh hadari omba akan hila Raja Saul tuntang kianat dengan ewen.

²⁰Jetoh aran kare pangkalima bara suku Manase je hadari omba hila Dawid metoh ie huang pangguete akan Siklag: Atnah, Yosabad, Yediael, Mikhael, Yosabad, Elihu tuntang Siletai. Gagenep ewen te mangapala 1.000 biti tantara.

²¹Ewen pangkalima te puna toto bahanyi tuntang mandohop Dawid malawan baris oloh garombolan.[22] Hong rahian andau ewen jadi pangkalima huang pasukan parang Israel.

²²Bilak genep andau aton oloh taheta je omba hinje Dawid, sampai dia tahi tinai pasukan Dawid jari hai toto.

²³Metoh Dawid intu Hebron are pangkalima je jari ilatih omba dengae. Ewen mandohop ie mangat ie tau jadi raja mangganti Saul, tumon janjin TUHAN. Jumlah ewen iete kilau toh: Bara suku Yuda: 6.800 biti, sukup dengan talawang tuntang lunju. Bara suku Simeon: 7.100 biti je puna jadi ilatih. Bara suku Lewi: 4.600 biti. Oloh ayun Yoyada mamimpin turonan Aron: 3.700 biti. Tondah paharin Sadok, ije biti pangkalima je bahanyi: 22 biti urase kapala keluarga. Bara suku Benyamin (suku Raja Saul): 3.000 biti, tapaare bara suku Benyamin tetep baketep dengan Saul. Bara suku Epraim: 20.800 biti oloh je basewut huang jalahan ayu-ayue. Bara suku Manase intu hila barat Sungei Yordan: 18.000 biti je ininjuk akan malantik Dawid jadi raja. Bara suku Isaskar: 200 pamimpin hayak dengan kare oloh ayue; kare pamimpin toh pintar manukas taloh je musti iawi rayat Israel intu katika je buah. Bara suku Sebulon: 50.000 biti je apik mahapan kare macam pakakas parang, tuntang harajur tata(...)

³⁸Uras pangkalima te haguet akan Hebron tuntang je jari tatap amon handak parang tuntang bulat kahandake uka mangkat Dawid jadi raja hapus Israel. Tuntang uras oloh Israel je beken kea bulat atei akan malalus taloh te.

³⁹Telo andau katahie kare pangkalima te melai intu hete dengan Dawid sambil pesta tuntang mangkeme panginan tuntang taloh ihop je inyadia akan ewen awi oloh Israel je beken.

⁴⁰Bara kare suku hila utara je kejau kea iete bara suku Isaskar, Sebulon tuntang Naptali, oloh dumah-dumaha dengan kalidai, onta, hajaran, tuntang sapi je kontep dengan taloh kinan: tepong, bua ara, kismis, anggor, tuntang undus saitun. Ewen kea mimbit sapi tuntang tabiri akan inyambalih tuntang indu kinan. Uras taloh handiai te mamparahan ampin kapaham kahanjak rayat intu hapus Israel.