Read Ngaju 1 KRONIKA 13 Bible Online

1 KRONIKA 13 - Ngaju bible

1 KRONIKA 13

¹Raja Dawid hatahiu dengan uras pangkalima je mangapala kare baris 1.000 biti tuntang kare baris 100 biti.

²Palus ie hamauh dengan kakare oloh te, “Amon kare pahari maku, tuntang inyoho awi TUHAN, Hatallan itah, keleh itah mampait sarohan akan kare imam tuntang kare oloh Lewi intu kare kampung ewen, hayak hapus bangsa itah je beken uka manyoho ewen dumah hapumpong dengan itah intu hetoh.

³Limbah te itah haguet manduan Patin Janjin Hatalla je jari inalua katahin Raja Saul marentah.”

⁴Kakare oloh Isarel je hapumpong te sanang dengan tirok te tuntang uras manarimae.

⁵ Dawid balalu mamumpong rayat Israel hapus lewu, bara helat dengan Misir intu hila salatan sampai akan jalan Hamat intu hila utara, uka manduan Patim Janji te bara Kiryat-Yearim tuntang mimbite akan Yerusalem.

⁶ Palus Dawid haguet hayak ewen akan lewu Baala, iete Kiryat-Yearim, intu tanah suku Yuda uka manduan Patin Janjin Hatalla. Pati te inggare “TUHAN je mondok intu hunjun kerub.”

⁷Sana sampai intu Baala, ewen manduan Patin Janji te bara human Abinadab, palus mamuat jete akan hunjun ije garobak je taheta. Usa dengan Ahyo mampahayak garobak te,

⁸tinai Dawid tuntang hapus bangsa Israel manari tuntang manyanyi dengan kahanjak je paham, uka mahormat Hatalla impahayak kitara, tarabang, simbal[23] tuntang tarompet.

⁹Metoh ewen sampai eka mihik gandom ayun Kidon, kare sapi je manunda garobak te tapaleko, palus Usa manjuju lengee tuntang mimbing Patin Janji te mangat ela manjato.

¹⁰TUHAN sangit dengan Usa awi gawie te kilau manawah TUHAN. Balalu Usa impateie intu hete. Bara katika te eka te inyewut “Peres-Usa”.[24] Dawid sangit awi TUHAN mampatei Usa!

¹²Tapi Dawid tarewen kea dengan TUHAN tuntang hamauh, “Toh kilen ampie Patin Janjin TUHAN te tau iimbit awiku?”

¹³Awi te Dawid balang mimbit Pati te akan Yerusalem, tapi mingkese intu human Obed-Edom, oloh Gat.

¹⁴ Pati te melai intu hete telo bulan katahie tuntang TUHAN mamberkat keluarga Obed-Edom hayak uras kare taloh je ayue.