Read Ngaju 1 KRONIKA 14 Bible Online

1 KRONIKA 14 - Ngaju bible

1 KRONIKA 14

¹Raja Hiram bara lewu Tirus mangirim kare sarohae akan Dawid, tinai kayu seder tuntang kare tukang kayu dengan kare tukang batu akan mampendeng istana.

²Awi te Dawid percaya toto TUHAN jari mandehen ie kilau raja Israel tuntang mampaabas karajae tagal ungkup TUHAN.

³Intu Yerusalem Dawid mandahang kare sawae, tuntang mandino anak tinai.

⁴Kare anake hatue je inakan intu Yerusalem iete: Samua, Sobab, Natan, Salomo,

⁵Yibhar, Elisua, Elpelet,

⁶Nogah, Nepeg, Yapia,

⁷Elisama, Beelyada[25] tuntang Elipelet.

⁸Metoh oloh Pilistin mahining Dawid jari iangkat jadi raja hapus Israel, ewen dumah handak manyingkap ie. Awi te Dawid balua balalu parang dengan ewen.

⁹Pandehan te kea, te oloh Pilistin jari dumah intu Janah Repaim tuntang marampok janah te.

¹⁰Mahining te Dawid misek Hatalla, “TUHAN, en aku musti manyarang kare oloh Pilistin te? En TUHAN kareh manenga kamanang akangku?” “Yoh, sarang!” tombah TUHAN. “Aku kareh manenga kamanang akam!”

¹¹Palus Dawid tuntang pasukae manyarang oloh Pilistin te intu Baal-Perasim[26] tuntang mampakalah ewen. Dawid balalu hamauh, “Hatalla jari mahapan aku uka manelak kotan musoh kilau danum soho mampalongkang kare taloh handiai hong ije kapijep mate.” Jete bukue eka te inyewut Baal-Perasim.

¹²Metoh pasukan Pilistin hadari, ewen dia sampet mimbit kare hampatong dewan ewen. Dawid marentah uka kare hampatong te ingehu.

¹³Dia tahi limbah te oloh Pilistin dumah tuntang marampok tinai Janah Repaim.

¹⁴Sinde tinai Dawid misek Hatalla. Hatalla tombah, “Ela manyarang ewen intu hetoh, tapi keleh mananjong mangaliling tuntang nyarang ewen bara dipah, tokep pulau kayu baka.

¹⁵Amon ikau mahining auh kilau auh ledap pain oloh baris hong kare tarok kayu te, keleh miar, awi aku kareh mananjong intu hila baum uka mampakalah oloh Pilistin.”

¹⁶Dawid malalus taloh je irentah Hatalla akae. Ie tuntang pasukae manyarang sampai oloh Pilistin olih undur nampara bara Gibeon sampai Geser.

¹⁷Aran Dawid basewut hong hete-hete, tuntang TUHAN mawi uras kare bangsa mikeh dengan Dawid.